Ariara Hahinena Badana Ena Moru

“Babulono badana be ia moru vadaeni, oibe, unai hanua badana ia dika vadaeni. Oibe, Babulono ese bese ibounai iena uaina aukana ia henidia, ia hakaudia kerere, vadaeni iena heudahanai karadia idia karaia. To harihari Babulono ia moru vadaeni, ia moru momokani!”​—⁠APOKALUPO 14:⁠8.

Lagani 1988 bona 1989 lalonai Iehova ena Witness taudia edia Dirava ena Hahemaoro Goevagoeva Distrik Hebouheboudia dekenai hereva toi mai edia sinado ‘Nega ia Kahirakahira Vadaeni’ idia henia. Henuai ia noho herevana bona hereva gabena be unai hereva ihatoina amo ai abia.

“ARIARA hahine” dika rohorohona​—⁠ia be daika? Badina be dahaka ita kikilaia be namo? Buka, muvini piksa, televisen bona vidio ese sihari kava karadia idia hahedinaraia momo, ani? Momokani! To unai ariara hahine be idau! Ia be mai ena siahu bada herea, ia dika rohoroho, bona ia ala-ala momo. Ariara karadia be lagani 4,000 lalodiai ia karaia! Gau badana be unai hahine ena kara ita diba, badina ita diba neganai do ita moru lasi. Apokalupo 14:​8 dekenai aneru ta ese unai ariara hahine ena ladana ia hatoa “Babulono badana” bona ia gwau ia ese tanobada besedia ia hakaudia kerere. Ena kara be unai bamona idia dika dainai, ita moale badina ita diba Iehova ese ena davana do ia henia negana “be ia kahirakahira vadaeni.”​—⁠Apokalupo 1:⁠3.

 2. Unai ariara hahine ese ena ladana be edeseni amo ia abia, bona inai tanobada ena tomadiho basileiana be edena bamona ia vara matamaia?

² Lagani 4,000 bona ma haida gunanai, “labana tauna mai goada danu Iehova ena vairanai,” Nimrod, ese hekokoroku hanuana Babulono be Mesopotamia dekenai ia haginia. Unai ariara hahine ese ena ladana be Babulono gunana amo ia abia. Babulono taudia ese tomadiho koikoi kohorona ta idia haginia matamaia neganai, Iehova ese edia gado ia haidaua bena tanobada ibounai lalonai ia luludia. Edia tomadiho koikoi idia abia lao, bona unai dala amo tomadiho koikoi ia vara matamaia. Momokani, ia be Babulono BADANA. (Genese 10:​8-10; 11:​1-9) Unai nega amo ema bona hari, inai tanobada ena tomadiho hahediba herevadia bona edia tomadiho karadia lalodiai Babulono gunana ena tomadiho karadia idia hedinarai. (Apokalupo 17:⁠7) Babulono ena ladana Heberu gado ai be Babel, anina be “Daradara.” Unai ladana be hari inai negai idia noho tomadiho koikoi idauidau dekenai be ia hegeregere vaitani!

 3. (a) Lagani hida lalonai Babulono ese Dirava ena orea taudia ia guidia, bona unai dainai idia be dahaka bogaragidiai idia noho? (b) Babulono be edena negai ia moru, bona badina be dahaka ena dokona be unai neganai ia vara lasi?

³ Babulono gunana ia moru murinai ia goada lou bona, Asuria be lagani 632 B.C.E. ai ia halusia murinai, tanobada basileia badadia ihatoina ai ia lao. Ena hairai ia ore haraga​—⁠lagani 100 idia do ore lasi neganai. To unai lagani kahirakahira 70 lalodiai, Babulono ese Dirava ena orea taudia, Israel unai, be ia guia. Unai dainai idia guidia Israel taudia be inai gaudia bogaragidiai idia noho: Babulono ena dubu bona daiutu helagadia tausen momo, ena toi tamona diravadia, ena toi tamona demonidia, ena sinana-bona-natuna tomadiho henia karana, ena babalau karadia, idia gwau idia mase diba lasi diravadia matauraidia karadia unai. Unai amo, lagani 539 B.C.E. ai, Babulono ia moru negana ai, idia guia Israel taudia be tomadiho koikoi ena hanua badana lalonai idia noho. To Babulono ena dokona be unai neganai ia vara lasi! Babulono idia halusia taudia ese idia gaukaralaia noho edia tomadiho gabuna badana bamona.

Tanobada Ibounai Tomadiho Basileiana Ta

⁴ Iehova ena peroveta taudia ese ena hahemaoro herevana idia gwauraia hedinarai, idia gwau: Iehova ese ‘Babulono be hadikaia ore darona amo do idia daroa’​—⁠‘Dirava ese Sodoma bona Gomora . . . ia hadikaia ore negana hegeregerena.’ Unai peroveta herevadia be idia vara momokani, a? Oibe! Lagani haida murinai Babulono be nadi senudia ai ia lao​—⁠ia be noholaia tauna ta lasi, gaigai bona uda sisiadia sibona ese idia noholaia​—⁠peroveta herevana hegeregerena! (Isaia 13:​9, 19-22; 14:23; Ieremia 50:​35, 38-40) To, unai Babulono idauna, Babulono Badana be ia do noho. Ia be tanobada ena tomadiho basileiana dainai, Babulono gunana ena hahediba herevadia koikoidia bona ena hekokoroku ia hahedinaraia noho. Ia be Satana ena gaukara gauna badana taunimanima edia matana hakepuludia totona bona Iehova ena Basileia ena gwauhamata dekenai idia lalo-parara lasi totona.​—⁠2 Korinto 4:​3, 4.

 5. (a) Babulono ena siahu be bada herea neganai dahaka tomadiho idia vara matamaia, to dahaka dainai Satana be ia hegeregere lasi tanobada ibounai be tomadiho koikoi amo ia hahonua? (b) Keristen tomadihona idia hamatamaia murinai, Satana be edena bamona tomadiho koikoi ia gaukaralaia?

⁵ Lagani 550 bamona Iesu ia do vara lasi neganai, Babulono ena siahu ia bada herea negana ai, Hindu, Buddhist, Confucianist bona Shinto tomadihodia idia vara matamaia. To Satana ese tanobada ibounai be tomadiho koikoi amo ia hahonua, a? Lasi, badina Iehova ena witness taudia gunadia haida be Babulono amo idia giroa lou Ierusalem dekenai, Iehova ena tomadiho do idia haginia lou totona. Unai dainai, lagani 600 bamona murinai kamonai Iuda taudia idia noho, Mesia idia abia dae bona Keristen kongregesen ena memba taudia ginigunadia ai idia lao totona. Tomadiho koikoi taudia ese Dirava ena Natuna idia hamasea, bona Iesu bona ena aposetolo ese idia perovetalaia hegeregerena, Satana ese ia gaukaralaidia bada, Keristen tomadiho korikorina do idia koua toho totona.​—⁠Mataio 7:15; Kara 20:​29, 30; 2 Petero 2:⁠1.

⁶ Lagani 70 C.E. murinai, Ierusalem idia hadikaia negana iharuana murinai, Satana ese aposetolo koikoidia ia gaukaralaidia bada, Keristen hahediba herevadia do ia hamirodia totona; Babulono ena hehuni tomadiho karadia bona Greek aonega taudia edia lalohadai be Keristen hahediba herevadia danu ia bulodia. Unai dala amo, toi tamona diravana be Bible ese ia gwauraia “Iehova tamona” ena gabu ai idia atoa. (Deuteronomi 6:4; Mareko 12:29; 1 Korinto 8:​5, 6) Bona idia ese tomadiho koikoi tauna Plato ena hahediba herevana, taunimanima edia lauma ia mase diba lasi herevana unai, idia gaukaralaia Bible ena hereva namodia, Keriso ena boubou bona toreisi lou herevadia unai, do idia hakoikoia totona. Unai ese dala ia kehoa taunimanima ese hel ena lahi bona pegatori edia hahediba herevana do idia abia dae totona. (Salamo 89:48; Esekiel 18:​4, 20) Unai Dirava hadikaia herevadia ese taunimanima idia hagaridia, bona idia gari dainai moni bada idia henia dubu dekenai. Danu, Katolik taudia ese idau tomadiho taudia idia dagedage henidia negana bona Protestant taudia ese Katolik taudia momo idia hamasea negana lalonai, pasto bona pris taudia idia ura bada hel ena lahi ese taunimanima ia hahisihisidia. Katolik bona Protestant taudia ese Bible ena hereva momokani idia ura henia bona Babulono ena hahediba herevadia koikoidia idia dadaraidia taudia tausen momo be lahi dekenai idia gabudia. To do ita itaia hegeregerena, Babulono Badana ese hahediba herevadia koikoidia ia halasidia, to ena ariara karana be unai sibona lasi.

Iehova ena Hahemaoro Dinana

⁷ Iehova ese hari ariara hahinena ia hahemaoro henia dinana ia ginidae be namo! (Heberu 10:30) Unai dina vairana negana ia hegaegaelaia totona, lagani 1870 murinai Iehova ese ena “gwaukau tauna” ia siaia​—⁠Bible be mai edia momokani ida idia stadilaia taudia edia orea ta unai​—⁠Bible ena hereva momokanidia do idia haginia lou, bona Babulono ena hahediba herevadia edia koikoi do idia hahedinaraia totona. (Malaki 3:1a) Inai “gwaukau tauna” ese Apokalupo 4:11 ena peroveta herevadia ia abia dae; herevadia be inai: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai oi do idia henia, bona oiemu siahu henunai do idia noho. Badina be gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.” Inai “gwaukau tauna” danu ese Iesu ena boubou karana ena sivarai ia harorolaia goadagoada, Dirava ese taunimanima ia hamauridia dalana ena sivarai unai. Do ia hamauridia taudia ginigunadia be “orea maragi,” Iesu ena guba Basileiana lalonai ia ida do idia lohia hebou taudia unai, bona, gabeai, paradaiso tanobadana dekenai do idia mauri hanaihanai taudia milion momo do ia hamauridia​—⁠idia momo be mase amo do ia hatoredia isi. (Luka 12:32; 1 Ioane 2:2; Kara 24:15) Oibe, Bible Student taudia ese inai hereva momokanidia idia haginidia lou, bona Babulono ena hahediba herevana ta, hel ena lahi lalonai hisihisi ania hanaihanai herevana, ena siahu idia habodoa momokani!a

 8. (a) Kerisendom ena haroro taudia be edena dala ai Tanobada Tuarina Ginigunana idia gaukaralaia, Bible Student taudia do idia haoredia toho totona? (b) Watch Tower Society ena gunalaia taudia 8 idia samanidia neganai, diadi ta ese gwaumaoro ia henidia lasi beil moni do idia henia, to dibura rumana ai ia koudia. Unai diadi dekenai dahaka ia vara?

⁸ Lagani 40 bamona lalodiai Bible Student taudia idia haroro goadagoada, idia gwau idau bese taudia edia nega be lagani 1914 lalonai do ia doko. Edia helaro hegeregerena, tanobada ibounai tuarina ginigunana bona ma hisihisi badadia haida be unai lagani lalonai idia vara. Babulono Badana ena kahana badana, Kerisendom, ena haroro taudia ese dala idia tahua, unai haroro goadagoada Bible Student taudia haoredia totona! Lagani 1918 lalonai idia ese Watch Tower Society ena gunalaia taudia 8 idia samanidia koikoi bena gavamani taudia ese dibura rumana lalonai idia koudia. To hua 9 idia ore murinai idia ruhadia nege, bona gabeai idia gwau idia kerere lasi. Dibura rumana lalonai idia noho neganai, United States ena kota badana ena biaguna ta ladana Martin T. Manton idia noia, do ia gwaumaoro dibura rumana amo do idia ruhadia totona, bena murimuri ai do idia noho ela bona do idia kota henidia lou, to ia ura lasi. Gabeai Pope Pius Namba 11 ese unai kota biaguna ia hanamoa bada. To ena hairai ia noho daudau lasi, badina lagani 1939 lalonai unai tau idia kota henia bona dibura rumana dekenai idia siaia, unuseniai do ia noho ela bona lagani rua do idia ore, bona idia fainia danu. Badina be dahaka? Badina be nega 6 kota gaukara ia hagagevaia bona hagagevaia totona taunimanima haida ese $186,000 idia henia dainai!

 9. Malaki ena peroveta herevana be edena bamona Iehova ena orea taudia ese idia davaria hahetohodia ia gwauraia, unai dainai Dirava ese daika ia kota henia guna?

⁹ Ita itaia vadaeni hegeregerena, lagani 1918 lalonai Iehova ena orea taudia ese hahetoho badadia idia davaria matamaia. Peroveta tauna ena hereva ma haida Malaki 3:​1-3 dekenai ese unai hahetoho inai bamona idia gwauraia: “Bona Lohiabada momokanina [Iehova], umui tahua noho Diravana, be Iena dubu helagana dekenai do ia mai haraga bona gwauhamata ena gwaukau tauna [Iesu] danu.” Oibe, Iehova be mai ena Keriso ida idia mai hahemaoro karaia totona. Iehova be ma ia henanadai, ia gwau: “Daika ese ena mai dinana do ia haheaukalaia diba, bona do ia hedinarai neganai, daika do ia gini diba? Badina be ia be golo hagoevaia tauna ena lahi bona dabua huria tauna ena sopu bamona.” Petero Ginigunana 4:​17 ia gwau, Dirava ese sibodia na “iena orea taudia” idia gwauraia taudia do ia kota henidia guna. Unai hegeregerena, Keristen taudia momokanidia ia hagoevadia, Iehova ena hesiai gaukara do idia karaia totona.

“LAUEGU OREA TAUDIA E, IA DEKENA AMO DO UMUI RAKA SIRI”!

¹⁰ Kerisendom ena haroro taudia be edena bamona? Idia be Babulono Badana ena orea taudia bona idia helalo-kerehai lasi, unai dainai unai hahemaoro negana lalonai idia gini diba lasi. Tanobada ibounai tuarina ena ala-ala bada idia durua bona Keristen taudia momokanidia idia dagedage henidia neganai, idia be sibodia edia dabua idia hamiroa momokani. (Ieremia 2:34) Keriso ena guba Basileiana idia hanamoa lasi, to taunimanima ese idia haginia oreana, League of Nations idia hanamoa, idia gwau unai orea ese “Dirava ena Basileia na politikol dalana amo ia hahedinaraia tanobada dekenai.” Lagani 1919 lalonai Iehova ia hahedinaraia ia ese Kerisendom bona tomadiho koikoi ibounai ia hahemaoro henia vadaeni. Babulono Badana ia moru vadaeni, Dirava ese ena mase herevana ia gwauraia vadaeni! Nega ia ginidae, hereva momokani bona kara maoromaoro idia ura henia taudia iboudiai ese peroveta haheganina Ieremia 51:45 dekenai do idia badinaia; unai hahegani be inai: “Lauegu bese taudia e, ia bogaragina amo umui raka lasi. Umui ibounai ta ta ena mauri ena mauri daladia do umui tahua, Iehova ena badu ena siahu amo do umui roho mauri.”

¹¹ Babulono Badana be ia moru vadaeni! To Dirava ese unai orea ia do hadikaia ore lasi. Ia be tanobada ibounai ena tomadiho koikoi basileiana bona nega kwadogi lalonai Satana ese do ia gaukaralaia noho taunimanima koidia totona. Dirava ena hahemaoro karana ginigabena ia latanai be dahaka? Unai ita daradaralaia diba lasi. Mani iseda Bible be Apokalupo 17:​1, 2 dekenai ita kehoa. Aneru ta ese aposetolo Ioane ia hereva henia, ia gwau: “Oi mai, ariara hahine badana do idia panisia dalana oi dekenai do lau hedinaraia. Ia be unai hanua badana, sinavai momo edia badinai idia haginia hanuana. Tanobada ena king ese ia danu matabodaga karadia idia karaia. Bona tanobada noho taudia ese iena matabodaga uaina idia inua, vadaeni idia kekero.” Hari “sinavai momo” anina be tanobada besedia, nega daudau lalonai ariara hahinena badana ese ia lohiadia bona ia hahisidia. Bona peroveta herevana ia gwau, “Tanobada noho taudia ese iena matabodaga uaina idia inua, vadaeni idia kekero.” Babulono Badana ena hahediba hereva koikoidia bona matabodaga karadia idia abia dae, bena unai ese uaina dikana bamona ia hakekerodia.

11, 12. (a) Apokalupo 17:​1, 2 dekenai aneru ta ese Dirava ena hahemaoro Babulono Badana dekenai edena bamona ia gwauraia? (b) “Sinavai momo,” ariara hahinena be idia latanai ia helai ranudia, edia anina be dahaka, bona tanobada besedia be edena bamona “iena matabodaga uaina idia inua, vadaeni idia kekero”?

¹² Iakobo 4:4 ia gwau: “Umui be headava kara ena taravatu umui makohia noho taudia bamona. Umui diba lasi, a, bema umui ura tanobada danu umui turana karaia neganai Dirava umui tuari henia noho?” Hari inai nega lalonai tomadiho oreadia ese tanobada idia tura henia momo, bona Kerisendom ese unai kara ia goadalaia momokani. Ena haroro taudia ese Iehova ena Basileia ena sivarai namona idia harorolaia lasi, to Bible ena taravatu idia hamanokaia, bona idia ese edia dubu orea taudia be gwaumaoro idia henidia, tanobada ena lebulebu karadia do idia karaia. Dubu oreadia edia haroro taudia be tauanina dalanai idia heudahanai, unai kara be aposetolo Paulo ese ia gwauraia dika, ia gwau: “Umui sibona umui koia lasi, Lebulebu taudia, kaivakuku idia tomadiho henia taudia, heudahanai taudia, eiava lebulebu hahine edia kara idia tohotohoa tatau, eiava tatau ese tatau danu hemarai karadia idia karaia taudia . . . Inai bamona taudia ta lasi be Dirava ena Basileia do ia davaria diba. Umui haida be guna unai bamona umui karaia. To Dirava ese umui emui kara dika ia huria vadaeni.”​—⁠1 Korinto 6:​9-11.

“Kopukopu Dekenai ma Ia Giroa Lou”

¹³ Dirava ese Kerisendom ena haroro taudia edia “kara dika ia huria vadaeni” a? Britain dekenai idia vara gaudia mani oi laloa, guna unai tano dekenai Protestant tomadiho oreadia idia goada herea. November 1987 lalonai, Britain ena praiminista ese haroro taudia ia noidia, taunimanima be kara maoromaoro dalana dekenai do idia gunalaidia, to Anglican dubu naria tauna ta be ia gwau: “Taunimanima iboudiai hegeregeredia, tatau idia sihari henidia tataudia be mai edia maoro edia ura karadia do idia karaia; namona be edia kara ena namo ita tahua, bona ita hagoadadia, idia ta ta ena bamona ena bamona do idia badinadia namonamo totona.” London ena niuspepa ta ia gwau: “Anglican dubu oreana ena kolesi ta lalonai uhau momo ese edia bamodia idia sihari henidia momo dainai, kolesi ma ta ena naria taudia ese unuseniai idia lao bona diba idia tahua taudia idia taravatudia, unai Anglican kolesi do idia vadivadi henia lasi.” Haida ese haroro taudia edia kara idia tahua namonamo murinai, idia gwau: “London ena kahana ta lalonai, haroro taudia iboudiai amo, reana 50 pesen bona ma haida ese unai matabodaga karadia idia ura henia.” Church of England ena gunalaia taudia edia hebou ta lalonai, hereva ta idia halasia, idia gwau sihari kava karadia bona heudahanai karadia be kara dikadia, to tatau ese tatau idia sihari henidia karadia be kara dikadia lasi; unai neganai unai hebou taudia 100 100 amo 95 95 ese unai hereva idia hamomokania. Niuspepa torea tauna ta ese unai ibounai ia herevalaia, ia gwau namona be Church of England ena ladana matamatana idia hatoa Sodoma bona Gomora. London ena niuspepa ma ta ia gwau: “Uru ta ena nega lalonai lebulebu karadia idia koua toho lasi dainai inai dika ia vara; Britain taudia ese unai kara idia laloa neganai idia lalohisihisi bada.”

13, 14. (a) Dahaka sivarai ese idia hahedinaraia, Dirava ese hari inai negai idia noho dubu gunalaia taudia edia ‘kara dika ia huria’ lasi? (b) Church of England ena gunalaia taudia edia hebou ta lalonai tatau ese tatau idia sihari henidia karadia be edena bamona idia gwauraia, bona niuspepa torea tauna ta ia gwau namona be Church of England ena ladana matamatana idia hatoa be dahaka? (c) Hereva momokani idia dadaraia dubu gunalaia taudia edia kara be edena kara, Petro ese ia gwauraia karadia, hegeregeredia?

¹⁴ Hereva momokani idia dadaraia dubu gunalaia taudia edia kara be aposetolo Petero ena hereva hegeregerena: “Inai kara idia karaia, be aonega hereva momokani rua bamona, idia gwau, ‘Sisia be iena mumuta dekenai ma ia giroa lao noho,’ bona ‘Boroma be idia huria, to kopukopu dekenai ma ia giroa lou.’ ”​—⁠2 Petero 2:⁠22.

15. (a) Kerisendom lalonai kara maoromaoro be edena bamona idia negea vadaeni? (b) Idia vara hekwakwanaidia dainai daidia danu be mai edia kerere?

¹⁵ Kerisendom lalonai, bona tanobada ibounai lalonai, kara maoromaoro idia negea vadaeni. Bese haida lalodiai idia laloa headava be anina lasi, bona headava taudia idia laloa heudahanai karadia be dika lasi. Taunimanima momo lasi ese edia headava idia rejista, bona edia headava idia rejista vadaeni taudia momo be murinai edia headava idia hadokoa. United States lalonai, hanaia laganidia 25 lalodiai, edia headava idia hadokoa taudia edia namba be nega toi amo ia daekau ela bona lagani ta ta lalodiai milion ta ia hanaia. Britain lalonai, lagani 1965 amo ema bona lagani 1985, edia headava idia hadokoa taudia edia namba be nega 4 ia bada daekau, 41,000 amo ela bona 175,000. Headava lasi taudia be matabodaga karadia momo idia karaia. Unai kara amo idia abia goreredia, AIDS gorerena bona gorere ma haida, be idia lalohisihisilaia, to idia gwau unai kara bodagadia idia karaia noho be maoro. Kerisendom ena dubu orea taudia be unai bamona idia kara kerere neganai, edia haroro taudia ese idia matahakani henidia lasi. Matabodaga karadia idia lalohisihisilaia lasi dainai, idia danu be mai edia kerere.​—⁠Ieremia 5:​29-31.

16. (a) Dahaka ese ia hahedinaraia goevagoeva Babulono Badana ia moru vadaeni, bona Apokalupo 18:2 dekenai aneru ta ese dahaka hereva maorona ia boiboilaia? (b) Idia ura tanobada ena dokona amo do idia roho mauri taudia iboudiai ese dahaka idia karaia be gau badana?

¹⁶ Tanobada ibounai ena tomadiho koikoi basileiana be matabodaga karadia amo ia honu; unai ese ia hahedinaraia goevagoeva Babulono Badana ia moru vadaeni. Dirava ese ia hahemaoro henia vadaeni, ia gwau do ia hadikaia ore. Unai dainai aneru ena hereva Apokalupo 18:⁠2 dekenai be ia maoro; ia boiboi goadagoada, ia gwau: “Babulono badana be ia moru vadaeni. Io, unai hanua badana be ia dika vadaeni. Lauma dikadia edia noho gabuna dekenai ia halaoa vadaeni. Satani ena lauma dikadia be ia lalonai idia noho. Manu dikadia bona manu dagedagedia be iena ruma lalonai idia noho.” Idia ura tanobada ena dokona amo do idia roho mauri taudia ese siri 4 ena hereva idia badinaia be mai anina bada; unai siri ena hereva be inai: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina!” “Hisihisi badana” be kahirakahira do ia vara; unai hisihisi amo do idia roho mauri totona, tomadiho koikoi idia rakatania be gau badana. (Apokalupo 7:​14, NW ) To unai sibona idia karaia be hegeregere lasi!

[Footnotes]

 1. “Ariara hahine” dika rohorohona be daika, bona badina be dahaka ita dibaia be gau badana?

 4. (a) Iehova ena peroveta taudia ese dahaka idia gwauraia Babulono dekenai, bona Babulono dekenai dahaka ia vara? (b) Dahaka Babulono idauna ta ia do noho bona tanobada taudia ia hadikadia noho?

 6. (a) Satana be edena bamona Keristen hahediba herevadia ia hamirodia bona dahaka Dirava hadikaia herevadia idia hadibaia? (b) Bible ena hereva momokani idia ura henia bona Babulono ena hahediba herevadia idia dadaraia taudia tausen momo dekenai dahaka ia vara?

 7. (a) Iehova be edena negai bona edena dala ai Bible ena hereva momokanidia ia haginia lou, bona Babulono ena hahediba herevadia edia koikoi edena bamona ia hahedinaraia? (b) Bible Student taudia ese dahaka hereva momokanidia idia haginidia lou?

10. Lagani 1919 lalonai Iehova ia hahedinaraia ia ese edena hahemaoro be Kerisendom bona tomadiho koikoi ibounai ia henia? Unai dainai Babulono Badana dekenai dahaka ia vara?

[Box on page 10]

DUBU GUNALAIA TAUDIA EDIA KARA

“Tama sina, kwara gorerena idia tahua taudia, pulisi ofisa bona loia idia gwau, idia hanai lagani 5 lalonai United States ena Katolik pris ese idia kara bodaga henia maragidia handred momo ese gorere badana be edia lalona ai idia davaria.”​—⁠Akron Beacon Journal, January 3, 1988.

“Ruma bese momo ese pris be kota lalonai idia samania, idia gwau pris ese edia natudia idia kara bodaga henidia. Unai dainai United States ena Katolik Dubu ese kina milion momo be unai ruma bese ia henidia, pris edia kara dika ena davana bamona. To, herevana, unai hekwakwanai do ia bada ia lao. Unai dainai loia bona unai hekwakwanai idia davaria taudia momo idia gwau, dubu ese unai kara dika ia tahua lasi bona ia hunia.”​—⁠The Miami Herald, January 3, 1988.

[Pictures on page 8]

Toi tamona diravadia edia kaivakuku​—⁠Aigupito gunana ena bona Kerisendom ena

[Credit Lines]

Saint-Remi Museum collection, Reims, photo by J. Terrisse

Louvre Museum, Paris

[Picture on page 11]

Bible ia gwau, kara bodaga dubu gunalaia taudia be idia huria bena kopukopu dekenai ia giroa lou boromana ta bamona

[Blurb on page 11]

Idia gwau Dirava idia diba, to edia kara dekena amo idia ese Dirava idia negea. Idia be dika bada, Dirava idia kamonai henia lasi, bona kara namona ta idia karaia diba lasi.​—⁠Tito 1⁠:⁠16.