Karoa 7

Emu Lalokau Ginigunana Oi Hagoadaia Lou!

EFESO

IESU ese ena hadibaia hereva ginigunana be Efeso kongregesen taudia ia henidia. Unai neganai, Efeso hanuana be kone hanua badana Asia Minor dekenai bona ia be Patamo motumotuna kahirakahira dekenai ia noho. Iesu ese Ioane ia oda henia, ia gwau: “Efeso ekalesia oreana ena aneru dekenai inai hereva do oi torea: ‘Hisiu 7 iena imana idibana dekenai ia dogoatao noho, bona golo lamepa 7 edia huanai ia raka noho tauna ese hadibaia hereva ia gwauraia inai.’ ” (Apokalupo 2:⁠1) Unai hereva amo Iesu ese ena dagi badana ia gwauraia hedinarai, ma hadibaia herevadia 6 lalodiai danu ia karaia hegeregerena. Efeso ena naria elda taudia ia hamaorodia lou, ia ese elda taudia iboudiai ia naridia bona kongregesen iboudiai edia kara ia tahua. Ema bona hari inai negai, Iesu be mai ena lalokau ida ena kwarana dagina ia gaukaralaia, bona elda taudia ia naridia, bona mai ena hebogahisi ida kongregesen taudia iboudiai ia naridia danu. Nega ta ta ai, kongregesen ena heau dalana ia haidaua sisina, ena diari do ia bada totona. Oibe, Iesu be Dirava ena mamoe oreana ena Naria Tauna Badana.​—⁠Mataio 11:​28-​30; 1 Petero 5:​2-4.

² Bena Iesu ese ena hereva ia hamatamaia totona, Efeso elda taudia edia kara haida dainai ia hanamodia. Bona ma kongregesen ima ia hereva henidia neganai danu, unai bamona ia karaia. Efeso taudia ia hamaorodia, ia gwau: “Oiemu kara lau diba. Oiemu gaukara mai hekwarahi bona oiemu haheauka lau diba vadaeni. Lau diba oi ese kara dika taudia oi negea, bona sibodia idia gwauraia aposetolo taudia oi ese oi dibaia vadaeni. Oi davaria vadaeni idia be koikoi taudia. Lau diba oi haheauka noho, bona lauegu ladana dainai oi hisihisi davaria vadaeni. Bona lau diba oi hesiku lasi.” (Apokalupo 2:​2, 3) Lagani momo gunanai, aposetolo Paulo ese Efeso elda taudia ia hadibaia “uda sisia dikadia,” hereva momokani idia dadaraia dagedage taudia unai, ese mamoe do idia kara dika henia, bona Paulo ese unai elda taudia ia hamaorodia namona be idia “naria” bona ena hesiku lasi haheitalai namona idia tohotohoa. (Kara 20:​29, 31) Iesu ese ia hanamodia badina idia gaukara goadagoada, idia haheauka, bona idia hesiku lasi dainai. Unai ese ia hahedinaraia idia ese Paulo ena sisiba idia badinaia.

³ Lohiabada ena dina lalonai danu, “aposetolo koikoidia,” ‘hereva koikoi idia gwauraia, bona diba tahua taudia idia hakaua kerere’ taudia, idia noho. (2 Korinto 11:13; Kara 20:30; Apokalupo 1:10) Idia laloa tomadiho idauidau iboudiai be mai edia namo, bona idia gwau Dirava ese orea tamona ia gaukaralaia lasi, bona lagani 1914 lalonai Iesu ese Basileia siahuna ia abia lasi. Unai dala amo 2 Petero 3:​3, 4 ena peroveta herevana idia hagugurua: “Nega dokonai, tauanina ena ura sibona idia karaia taudia be do idia hedinarai. Dirava badinaia kara do idia kirikirilaia. Vadaeni, umui dekenai do idia gwau, ‘Iesu ia gwauhamata, do ia giroa mai, a? Edeseni ia noho? Do ia mai lasi. Badina be iseda tubuna idia mase vadaeni, to tanobada ia karaia negana ia mai bona harihari gau ta be idau lasi.’ ”

⁴ Unai peroveta hereva idia kirikirilaia taudia idia ura lasi edia abidadama idia gwauraia hedinarai. (Roma 10:10) Idia ese Kerisendom ena dubu gunalaia taudia edia heduru idia tahua, bona nius bukadia bona televisen idia gaukaralaia, guna idia bamoa taudia edia ladana idia hadikaia totona. Haraga herea abidadama taudia be idia davaria unai koikoi taudia edia hereva bona kara be koikoi. Efeso taudia ese idia karaia hegeregerena, hari idia noho Keristen taudia ‘ese kara dika taudia idia negea’ bona edia kongregesen murimurinai idia atoa.a

⁵ Iesu ese unai kongregesen 7 ia sisiba henidia; idia ima ia sisiba henidia ena badina be hekwakwanai badana ta ia vara dainai. Efeso taudia ia hereva henia, ia gwau: “To inai gau tamona dekenai oi be kerere: guna be lau oi lalokau henia bada, to hari be lasi.” (Apokalupo 2:⁠4) Unai lalokau dalana dekenai idia moru be maoro lasi, badina lagani 35 gunanai Paulo ese revareva be idia dekenai ia siaia bona unai revareva lalonai ia gwau, Dirava ena “[hebogahisi] bona iena lalokau ita dekenai be bada herea momokani,” bona ia haganidia, ia gwau: “Umui be Dirava ena natuna, iena lalokau. Unai dainai, Dirava ena kara bamona do umui karaia be namo. Lalokau ena dala dekenai do umui mauri noho, Keriso ese ita ia lalokau henia bamona.” (Efeso 2:4; 5:​1, 2) Danu, Iesu ena hereva be edia kudouna dekenai idia atoa namonamo be namo: “[Iehova] iseda Dirava be [Iehova] tamona. [Iehova] oiemu Dirava oi ura henia, mai oiemu lalona ibounai, mai oiemu lauma ibounai, mai oiemu aonega ibounai, mai oiemu goada ibounai.” (Mareko 12:​29-​31) Efeso taudia ese unai lalokau ginigunana idia haboioa vadaeni.

⁶ Herevana nega daudau gunanai o vanegai sibona kongregesen lalonai ita vareai, to gau badana be ita naria namonamo, Iehova ita lalokau henia karana ginigunana do ita haboioa garina. Unai lalokau be edena bamona ita haboioa diba? Reana iseda moni gaukarana ita laloa bada, eiava ita ura moni bada do ita abia, eiava moale karadia ita tahua, bona iseda mauri lalonai unai gaudia be gau badadia ai ita halaodia. Unai neganai, tauanina gaudia do ita laloa bada, to lauma gaudia do ita laloa maragi. (Roma 8:​5-8; 1 Timoteo 4:8; 6:​9, 10) Iehova ita lalokau henia karana ese ita do ia doria, unai bamona kerere do ita hamaoromaorodia, bona Dirava ena ‘Basileia bona iena kara maoromaoro do ita tahua guna’ noho, ‘iseda kohu be guba dekenai do ita haboua’ totona.​—⁠Mataio 6:​19-​21, 31-​33.

⁷ Namona be iseda hesiai gaukara ita karaia ena badina be Iehova ita lalokau henia bada dainai. Namona be Iehova bona Keriso ese ita totona idia karaia karadia ita laloa bada. Gabeai, Ioane ia hereva, ia gwau: “Lalokau ena anina be inai: ita ese Dirava ita lalokau henia lasi, to Dirava ese ita ia lalokau henia. Bona ia ese iena Natuna ia siaia, ia sibona be iseda dika gwauatao dalana totona.” Ioane be ma ia gwau: “Dirava be lalokau. Tau ta bema lalokau ena dala dekenai ia noho, ia be Dirava ena lalona dekenai ia noho. Dirava danu be unai tau ena lalona dekenai ia noho.” Iseda lalokau Iehova dekenai, Lohiabada Iesu Keriso dekenai, bona Dirava ena Hereva dekenai ita hamaragia lasi be namo! Unai lalokau ita hahedinaraia iseda hesiai gaukara ita karaia neganai sibona lasi, to danu Keriso ese ita ia henia taravatuna ita badinaia neganai. “Keriso ese ita dekenai ia henia taravatu be inai: Dirava ia lalokau henia tauna ese iena tadikakana danu do ia lalokau henia.”​—⁠1 Ioane 4:​10, 16, 21; Heberu 4:12; 1 Petero 4:8; Kolose 3:​10-​14; Efeso 4:15 itaia danu.

“Oiemu Kara Gunadia Do Oi Karaia Lou”

⁸ Namona be unai Efeso taudia ese edia lalokau ginigunana idia hagoadaia lou, hahenamo do idia reaia garina. Iesu ese ia hamaorodia, ia gwau: “Guna be kara namodia oi karaia, to inai kara oi rakatania, bona oi moru vadaeni. Unai dainai unai kara namodia dalana do oi laloa lou, bona oiemu lalona do oi giroa, ma oiemu kara gunadia do oi karaia lou. Bema oiemu lalona oi giroa lasi neganai, lau be do lau mai, oiemu lamepa be iena gabu dekenai amo do lau kokia.” (Apokalupo 2:⁠5) Efeso Keristen taudia ese unai hereva edena bamona idia laloa? Ita diba lasi. Iseda helaro be idia helalo-kerehai bona edia lalokau Dirava dekenai idia hagoadaia lou. Bema lasi, edia diari do ia bodo vadaeni, bona edia lamepa be Iesu ese do ia kokia. Hereva momokani ena diari idia halasia hahenamona do idia haboioa.

⁹ To, Iesu ese Efeso taudia be inai bamona ia hagoadaia, ia gwau: “To oiemu namo sisina be inai: Nikolaita taudia edia kara oi badu henia noho, lau ese lau badu henia hegeregerena.” (Apokalupo 2:⁠6) Idia ura lasi momokani Keristen taudia be orea maragidia dekenai idia parara, hegeregerena Lohiabada Iesu Keriso danu be unai kara ia ura lasi momokani. To lagani haida murinai, kongregesen momo ese Iesu ena hereva idia badinaia lasi. Iehova, hereva momokani, bona edia orea taudia idia lalokau henidia momokani lasi dainai, lauma dalanai dibura lalonai idia noho. Tomadiho orea maragidia dekenai idia parara bona idia hepapahuahu heheni. “Keristen” toretore taudia, Iehova idia lalokau henia lasi taudia unai, ese Dirava ena ladana be Keristen Greek Revarevadia gunadia edia amo idia kokia. Edia lalokau ia goada lasi dainai, dala idia kehoa Babulono bona Greek ena hahediba koikoi, hegeregere hel ena lahi, pegatori, bona Toi Tamona be Keriso ena ladanai do idia abia dae totona. Dirava bona hereva momokani idia lalokau henia lasi dainai sibodia idia gwauraia Keristen taudia momo herea ese Dirava ena Basileia ena sivarai namona idia harorolaia lasi. Dubu gunalaia taudia, sibodia edia namo idia tahua guna taudia, ese edia orea idia biagudia. Edia basileia be inai tanobada dekenai idia haginia.​—⁠Korinto Ginigunana 4:⁠8 itaia danu.

¹⁰ Lagani 1918 ai Dirava ese ena orea taudia ia hahemaoro henidia guna. Unai neganai, Kerisendom ena pris bona pasto taudia ese Tanobada Ibounai Tuarina Ginigunana idia durua, bona kahana rua dekenai idia gini Katolik bona Protestan taudia idia hagoadaia do idia ala-ala heheni totona. (1 Petero 4:17) Efeso kongregesen taudia ese Nikolaita ena orea taudia edia kara idia inai henia, to Kerisendom ena tomadiho oreadia be idau. Dirava dadaraia hahediba herevadia idia abia dae, bona edia pris bona pasto taudia ese inai tanobada ena ura idia badinaia. Iesu ia gwau ena hadibaia taudia be inai tanobada ena lasi. (Ioane 15:​17-​19) Kerisendom ena kongregesen taudia ese Baibel ena hereva badana, Dirava ena Basileia unai, idia diba lasi dainai, Buka Helaga ena hereva momokani amo idia diari lasi bona edia memba taudia be Iehova ena lauma dubu badana lalonai idia noho lasi. Edia gunalaia tataudia (bona hahinedia) be hisiu lasi, to ia hedinarai idia be “Tau Dika Rohorohona” taudia.​—⁠2 Tesalonika 2:3; Malaki 3:​1-3.

¹¹ To tanobada ibounai tuarina ginigunana murinai, Ioane oreana taudia ese Iehova bona hereva momokani idia lalokau henia noho, bona unai lalokau ese ia doridia, mai edia lalo-goada ida Iehova ena hesiai gaukara idia karaia totona. Watch Tower Society ena presiden ginigunana, Charles T. Russell, be lagani 1916 ai ia mase. Unai murinai, haida idia ura ia idia tomadiho henia, bona dala maorona amo idia gini siri, to Ioane oreana taudia ese unai taudia idia dadaraia. Unai bamona dagedage bona hekwakwanai idia davaria bona idia gini goada dainai, unai Keristen oreana taudia edia Biaguna be idia dekenai ia gwau “Namo herea!” bona ia boiridia ia ida do idia moale hebou totona. (Mataio 25:​21, 23) Tanobada dekenai idia vara gaudia bona idia dekenai idia vara gaudia dainai, idia lalo-parara Iesu ese ia gwauraia gauna, Basileia lalonai ia lohia hehuni ena toana unai, be ia guguru. Lagani 1919 amo idia goada idia lao, Iesu ena peroveta herevana ma idia hagugurua lao totona. Iesu ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Mataio 6:​9, 10; 24:​3-​14) Edia lalokau Iehova dekenai be guna ia maragi reana, to unai negana amo ia bada ia lao.

¹² September 5-​13, 1922 ai, Cedar Point, Ohio, U.S.A., dekenai unai Keristen taudia 18,000 idia hebou. Unai neganai, inai boiboi badana idia halasia, idia gwau: “Atai Herea Diravana ena natudia e, umui lao haroro! . . . Gau badana be tanobada taudia idia diba Iehova be Dirava bona Iesu Keriso be pavapava edia Pavapava bona lohia edia Lohia. . . . Unai dainai umui haroro, haroro, haroro; Pavapava bona iena basileia umui harorolaia.” Iehova ena ladana hereadaena idia abia isi unai. Lagani 1931 lalonai unai Keristen taudia be Columbus, Ohio, U.S.A., dekenai hebouhebou ta idia karaia negana lalonai, mai edia moale ida ladana matamatana ta, Isaia ena peroveta herevana lalonai Dirava ese ia gwauraia hedinarai gauna, idia abia dae​—⁠Iehova ena Witness taudia. (Isaia 43:​10, 12) March 1, 1939 lalonai, unai orea taudia edia magasin badana ena ladana idia haidaua, bona idia hatoa The Watchtower Announcing Jehovah’s Kingdom. Unai dala amo ita ia havaraia Diravana bona ena pavapava gavamanina idia matauraia bada. Iehova ena Witness taudia ese edia lalokau idia hagoadaia lou vadaeni; nega gunanai Iehova ena ladana hereadaena bona iena Basileia idia matauraia lasi bona idia abia isi lasi dainai, idia helalo-kerehai vadaeni.​—⁠Salamo 106:​6, 47, 48.

“Kwalimu Taudia Dekenai”

¹³ Bena, Iesu be kongregesen iboudiai ia henidia herevadia ma haida lalodiai ia karaia hegeregerena, ia gwau Dirava ena lauma ese Iesu ena amo kara maoromaoro ena davana namona ia hahedinaraia. Efeso Keristen taudia dekenai ia gwau: “Mai ena taiana tauna, namona be Lauma Helaga ena hereva ekalesia oreadia dekenai do ia kamonai. ‘Kwalimu taudia dekenai lau ese gwau maoro do lau henia, mauri auna ena huahua do idia ania. Inai mauri auna be Dirava ena uma gabu dekenai ia gini noho.’ ” (Apokalupo 2:⁠7) Kamonai momokani taudia be mai edia moale ida do idia ura unai hereva badana do idia badinaia, badina idia diba unai hereva ena badina be Iesu lasi, to Lohiabada Iehova ese unai hereva ia havaraia, bona Iena lauma helaga o gaukara siahuna amo ia halasia. Edena dala amo do idia “kwalimu”? Iesu ena aena gabuna dekenai idia raka karana amo do idia kwalimu. Iesu ese ena kara maoromaoro ia rakatania lasi, to ia gini goada ela bona ia mase; unai dainai ia gwau diba: “Umui goada noho, badina be lau ese tanobada lau halusia vadaeni.”​—⁠Ioane 8:28; 16:33; 1 Ioane 5:4 itaia danu.

¹⁴ Horoa Keristen taudia, unai Efeso taudia hegeregeredia, ese tanobada paradaisona lalonai do idia mauri lasi. Unai dainai, edena bamona “mauri auna ena huahua do idia ania . . . Dirava ena uma gabu dekenai,” edia davana namona bamona? Dirava ese horoa Keristen taudia 144,000, idia haida be unai Efeso kongregesen taudia, be taunimanima huana amo ia hoidia, Mamoe Natuna, Keriso Iesu, ida guba Siona Ororona dekenai Dirava ena lauma natudia bamona do idia lohia totona. Unai dainai ita diba unai hereva ese tanobada dekenai do ia vara lou Paradaisona ia gwauraia lasi. (Efeso 1:​5-​12; Apokalupo 14:​1, 4) Unai dainai unai hereva ese guba ia herevalaia. Guba be uma gabuna ta bamona, bona unai kwalimu taudia ese do idia abia. Unuseniai, “Dirava ena uma gabu dekenai,” oibe, Iehova ena kahirakahira noho gabuna dekenai, Dirava ese ia doko diba lasi maurina be unai kwalimu taudia do ia henidia, bena do idia mauri ela bona hanaihanai. Mauri auna amo idia aniani karana ese unai ia laulaulaia.

¹⁵ To horoa taudia 144,000 idia durudia tanobada taudia ese dahaka do idia davaria? Unai Witness bamodia hutuma bada herea taudia idia kwalimu noho danu. To edia helaro be tanobada paradaisona lalonai do idia vareai, bona unuseniai “mauri ranuna ena sinavai” amo do idia inuinu bona unai sinavai badinai idia hadoa ‘mauri audia edia rau’ amo do idia aniani. Unai taudia ese do ia hanamodia lou. (Apokalupo 7:​4, 9, 17; 22:​1, 2) Bema oi be unai orea tauna ta, namona be emu lalokau Iehova dekenai oi hahedinaraia bona abidadama dekenai oi kwalimu. Unai dala amo Paradaiso tanobadana lalonai mauri hanaihanai do oi moalelaia diba.​—⁠Ioane Ginigunana 2:​13, 14 itaia danu.

[Footnote]

[Study Questions]

 1. Iesu ena hadibaia herevana ginigunana be edena kongregesen ia henia, bona elda taudia dekenai dahaka ia gwau?

 2. (a) Dahaka gau namodia dainai Iesu ese Efeso kongregesen ia hanamoa? (b) Efeso elda taudia idia hahedinaraia dahaka sisiba, aposetolo Paulo ese ia henia sisibana unai, idia badinaia?

 3. (a) Hari iseda nega lalonai “aposetolo koikoidia” be edena bamona kamonai momokani taudia idia koidia toho? (b) Kongregesen idia dadaraia taudia be Petero ese edena bamona ia gwauraidia?

 4. (a) Peroveta herevadia idia kirikirilaia taudia ese edia hekokoroku bona gwau-edeede karadia be edena bamona idia hahedinaraia? (b) Hari inai negai idia noho Keristen taudia be koikoi dagedage taudia edena bamona idia kara henidia dainai, idia hahedinaraia idia be Efeso taudia bamona?

 5. (a) Iesu ia gwau Efeso taudia edia manoka be dahaka? (b) Efeso taudia ese dahaka hereva haida idia laloatao be namo?

 6. (a) Herevana ita be nega daudau eiava nega kwadogina sibona kongregesen dekenai ita noho, to dahaka kara kereredia dainai ita naria namonamo be namo? (b) Dirava ita lalokau henia dainai, namona be unai lalokau ese ita ia doria dahaka do ita karaia totona?

 7. (a) Namona be Iehova ena hesiai gaukara ita karaia ena badina be dahaka? (b) Ioane ese lalokau karana edena bamona ia herevalaia?

 8. Iesu ia gwau namona be Efeso taudia ese dahaka idia karaia?

 9. (a) Iesu ese Efeso taudia edia lalona edena bamona ia hagoadaia? (b) Ioane ena nega murinai, kongregesen be edena bamona Iesu ena sisiba Efeso taudia dekenai idia laloa lasi?

10. Lagani 1918 ai Kerisendom ena tomadiho karana be edena bamona?

11. (a) Lagani 1918 ai edena Keristen oreana tanobada dekenai ese Iesu ena sisiba Efeso taudia dekenai ia badinaia? (b) Lagani 1919 negana amo Ioane oreana taudia ese dahaka idia karaia?

12. (a) Lagani 1922 ai hebouhebou badana dekenai dahaka boiboi idia halasia? (b) Lagani 1931 ai Keristen taudia momokanidia ese dahaka ladana idia abia dae, bona dahaka kara amo idia helalo-kerehai?

13. (a) Bema Efeso taudia idia “kwalimu,” dahaka hahenamo do idia abia? (b) Efeso Keristen taudia be edena bamona do idia “kwalimu” diba?

14. Iesu ese “Dirava ena uma gabu” ia gwauraia; unai uma ena anina be dahaka?

15. Iesu ese Efeso taudia ia hagoadaia, do idia kwalimu totona; badina be dahaka hari inai negai unai be mai anina bada hutuma bada herea taudia dekenai?

[Box on page 36]

Mai Edia Lalokau ida Iehova Bona Ena Natuna Idia Hanamoa

Lagani 1905 lalonai Iehova ena orea taudia ese ane bukana ta idia karaia. Unai buka lalonai Iesu hanamoa anedia edia namba be nega rua amo Iehova hanamoa anedia edia namba idia hanaia. Lagani 1928 ai idia karaia ane bukana lalonai Iesu hanamoa anedia bona Iehova hanamoa anedia edia namba be tamona. To lagani 1984 ai idia karaia ane bukana lalonai Iehova hanamoa anedia edia namba ese Iesu hanamoa anedia edia namba be nega hani amo ia hanaia. Unai be Iesu ena hereva hegeregerena, ia gwau: “Egu Tamana ese lau ia hanaia.” (Ioane 14:28) Iehova ita lalokau henia guna, murinai Iesu ita lalokau henia bada danu, bona namona be Iesu ena boubou namona ita laloa bada bona ita lalo-parara Dirava ese Iesu ia gwauraia Hahelaga Tauna Badana bona Pavapava.

[Chart on page 34]

Iesu ese Sisiba Ia Henia Dalana

(Apokalupo ena karoa bona siri ai torea)

Efeso 2:1 2:​2, 3 2:4 2:​5, 6  2:7

Semurana 2:8 2:9 ​—⁠ 2:10 2:⁠11

Peregamo 2:12 2:13 2:​14, 15 2:16 2:⁠17

Tuatira 2:18 2:19 2:​20, 21 2:​24, 25 2:​26-​28

Sadi 3:1 ​—⁠ 3:​1, 2 3:​3, 4  3:5

Filadelefia 3:7 3:8 ​—⁠ 3:​8-​11 3:⁠12

Laodikea 3:14 ​—⁠ 3:​15-​17 3:​18-​20 3:⁠21