Ita Sibona Eda Stadi Bona Ruma Bese Ena Stadi Ita Karaia be mai Anina Bada!

¹ Aposetolo edia negai, Hakaua Oreana be Iehova ena taunimanima edia namo idia laloa bada. (Kara 15:​6, 28) Hisihisi badana ia mai kahirakahira noho lalonai, namona be Basileia harorolaia taudia ta ta be edia hetura karana Iehova ida idia hagoadaia. Guna Kongrigeisen Buka Stadi totona oi atoa negana be hari edena bamona do oi gaukaralaia? Umui ibounai ai hagoadaia unai nega be ruma bese ena tomadiho negana totona umui gaukaralaia. Bema nega ita gaukaralaia namonamo, ita be Dirava ena Hereva do ita stadilaia namonamo bona ena hahediba herevadia amo namo bada do ita abia.​​—Sal. 1:​1-3; Roma 11:​33, 34.

² Ruma Bese Ena Tomadiho Negana: Ruma bese kwaradia e, Iehova ena vairanai emui maduna be hanaihanai ruma bese stadi umui karaia be namo. (Deu. 6:​6, 7) Headava lasi bona natudia lasi tadikaka bona taihu e, namona be guna Kongrigeisen Buka Stadi totona umui atoa negana umui gaukaralaia umui sibona ese Baibel umui stadilaia o tahua namonamo totona. Ena be ‘nega dikana’ ai ita noho, to ita ibounai eda hetura karana Iehova ida ia goada be gau badana. Unai bamona ia vara totona, namona be ‘iseda nega do ita gaukaralaia namonamo’ Dirava ena Hereva ita stadilaia bona laloa dobu totona.​​—Efe. 5:​15, 16.

³ Dahaka Gaudia Umui Stadilaia Diba: Gima Kohorona Bukadia Baibel Siri Indeks eiava nao gado Watch Tower Publications Indeks o Watchtower Library CD-ROM ese oi do ia durua emu ruma bese Baibel stadi umui moalelaia totona. Ruma bese be reana Gima Kohorona lalonai inai kahana idia itaia diba, hegeregere “Famili Ena Moale Havaraia Daladia,” “Emui Natudia Hadibaia,” bona “Iseda Matamata Taudia Totona.” Danu Awake! lalonai be “Memero Kekeni Edia Henanadai” ena kahana ia noho, bona Dirava ese ia havaraia gaudia haida edia sivarai idia herevalaia.

⁴ Ruma bese be Baibel idia duahia haragaharaga lasi, to idia duahia namonamo neganai, unai ese idia ibounai do ia durua Dirava ena hakaua herevadia idia laloatao bona badinaia totona. (Heb. 4:​12) Nega ma haida ai, reana Iehova ena orea ese idia halasia vidio haida umui itaia bena herevalaia hebou. Momokani, stadi gaudia be momo herea. Unai dainai, emui ruma bese oi nanadaia, dahaka gaudia idia ura stadilaia be namo.

⁵ Dahaka Dainai Hari Unai Bamona Stadi Karana be mai Anina Bada: Iseda hetura karana Iehova ida ita hagoadaia neganai, unai ese ita do ia durua ita gini goada, Iehova ena hahemauri do ita itaia totona. (Eso. 14:13) Inai tanobada taudia dikadia edia huanai, namona be tama sina ese Dirava ena hakaua herevadia amo edia natudia idia gimaia. (Fili. 2:​15) Hari inai negai, natudia ese heduru idia abia be namo, badina sikuli gabudiai natudia momo be kara maoromaoro taravatudia idia badinaia lasi. (Aon. 22:​3, 6) Headava taudia ese edia headava ena “varo toi” idia hagoadaia be namo​​—unai varo toi anina be tau, hahine bona Iehova. (Had. 4:​12) Namona be inai nega kwadogina ita gaukaralaia namonamo, unai amo eda “abidadama helagana” do ita hagoadaia!​​—Iuda 20.

Magasin Herevalaia Daladia

The Watchtower Sept. 1

“Bema ita ura mai anina bada abia hidi haida ita karaia, oi laloa edeseniai heduru hereva namodia ita abia diba? [Haere naria. Aonega Herevadia 3:​5, 6 duahia.] Inai magasin ese ia hahedinaraia Dirava amo aonega ita abia be namo, unai amo gau ibounai do ita laloa namonamo guna, bena abia hidi do ita karaia.” Rau 8 ai ia noho kahana hahedinaraia.

Awake! Sept.

“Oi laloa Dirava ena ura dainai hari tanobada dekenai taunimanima idia hitolo, a? [Haere naria.] Dirava ese unai hekwakwanai do ia haorea dalana mani oi laloa. [Salamo 72:16 duahia.] Inai magasin ese ia hahedinaraia edena dala ai tanobada ai Dirava ese Paradaiso do ia havaraia lou.” Rau 7 ai ia noho kahana hahedinaraia.

Gima Kohorona Oct.-Dec.

“Bema ita lalokau henia tauna ta ia mase, ita ibounai ita lalohisihisi. Unai bamona negadiai, oi laloa Baibel ese ita ia durua diba, a? [Haere naria. Bena Salamo 55:22 duahia.] Baibel be lalometau hanaia dalana ia herevalaia, bona inai magasin be unai ia hahedinaraia.”

Awake! Oct.

“Internet be gau namona ta, to unai gauna ese natudia ia hadibaia kerere diba. Oi laloa edena dala ai ita ese natudia ita gimaia diba? [Haere naria.] Mani inai hereva oi laloa. [Aonega Herevadia 18:1 duahia bona herevalaia.] Inai magasin lalonai inai bamona siri siks ese tama sina do ia durua edia natudia idia gimaia namonamo totona.” Rau 8 ai ia noho kahana hahedinaraia.