Eeksotus

16 Xpeeter, sin se fom Eliim fat kang. Am fuftseente taach fom tsweete moonat noo se fom Ejipt lant raus kang sin, ti kans kemaynt fon Israël, is tsum xlus, tsu te tesërt fon Sim khom, woo tswixich Eliim un Sinaay playpt. 2 Tan ti kans kemaynt fon Israël hon aan kefang sich peklaae keeche Mooses un Aron im tesërt. 3 Ti israeliiter hon fer tëne kesaat: “Es weyer peser wën meyer torich Yeehoowa sayn hant im Ejipt lant kextorep weyere, wii mer noch uns pay te tiper fon flayx kesetst hon un uns mit proot sat kes hon! Awer teyer hot uns tsu tiise tesërt keprung tas tiise kans kemaynt weeche hunger xtërpe teet.” 4 Yeehoowa hot tan fer Mooses kesaat: “Ich lose fer aych proot fom himel reene. Tas folek sol raus keen, un yeete een tuut sayn teel fer te taach samele, tas ich aych in proop xtele tuun, op se in mayn kesets keen tuun orer net. 5 Awer, im sekste taach, wën se in richte tuun was se kesamelt hon, mus es tas topelte sin wii was tii in yeete anere taache kesamelt hon.” 6 Tan, hon Mooses un Aran fer ti kanse israeliiter kesaat: “Am oomt, tuut teyer sicher wise tas waar Yeehoowa woo aych fom Ejipt lant raus kehool hot. 7 Am moynt, tuut teyer Yeehoowa sayn hërlichkheet siin, wayl Yeehoowa hot keheert ayre krumele keeche tëm. Weer sin meyer tas teyer keeche uns aych peklaae tuut?” 8 Mooses hot wayter kesaat: “Oomts, wën Yeehoowa aych flayx kept fer se ese, un moynts, wën eyer aych proot kept pis teyer sat wërt, tuut teyer siin tas Yeehoowa ayre klaae keeche tëm keheert hot. Awer weer sin meyer? Teyer tuut aych net keeche uns peklaae, awer keeche Yeehoowa.” 9 Tan, hot Mooses fer Aran kesaat: “Saa fer ti kans kemaynt fon Israël: ‘Keet foer Yeehoowa, wayl eyer hot ayre krumele keheert.’” 10 Soo wii Aran tas fer ti kans kemaynt fon Israël kesaat hot, hon se sich rom ketreet un hon tsum tesërt kekukt, un Yeehoowa sayn hërlichkheet is im wolk tsum foer xayn khom. 11 Yeehoowa hot noch fer Mooses kesaat: 12 “Ich hon ti krumele fon te israeliiter keheert. Saa tas fer tëne: ‘Am oomt tuut teyer flayx ese, un am moynt tuut teyer proot ese pis iir sat sayt, un teyer tuut sicher wise tas ich Yeehoowa, ayer Kot, sin.’” 13 Am oomt, sin ti kotoorne khom un hon te akapament fol kemacht, un am moynt, hot te tau te pootem ketekt um te akampament rom. 14 Wii te tau ferkang is, waar ufm pootem fom tesërt etwas tiin un floklich, eenlich wii te rayf woo ufm pootem falt. 15 Wii ti israeliiter tas kesiin hon, hon aan kefang eene fer te anere saan: “Was is tas?” wayl tii wuste net was tas waar. Mooses hot fer tëne kesaat: “Tas is tas proot woo Yeehoowa aych wii esmitel kep hot. 16 Tas is was Yeehoowa kexikt hot: ‘Yeete een sol samele soo fiil wii eyer ese khan. Teyer solt een komor fer een persoon hoole, tëm noo ti numer fon layt woo yeete een in sayn parak hot.’” 17 Ti israeliiter hon aan kefang tas mache; etliche hon fiil kesamelt, un anere hon weenich kesamelt. 18 Wii se tas torich te komor kemest hon, weer fiil kesamelt hot, is niks iwrich keplip, un weer weenich kesamelt hot, hot aach net kefeelt. Yeete een hot kesamelt soo fiil wii eyer ese khont. 32 Mooses hot kesaat: “Tas is was Yeehoowa kexikt hot: ‘Tuut fon tas, een komor samele fer wech ketuun wëre, torich ayre kanse xeneratsyoone, tas tii siin tuun tas proot woo ich fer aych kep hon, fer im tesërt ese, wii ich aych fom Ejipt lant raus kehool hon.’” 33 Tan hot Mooses fer Aran kesaat: “Hool een kruuch un tuu tas in fiile mit een komor fon manaa, un tuu tas foer Yeehoowa fer wech ketuun wëre torich ti kanse xeneratsyoone.” 34 Un Aran hot tas foer ti Tsayung ketuun tas tas tat hale khent, soo wii Yeehoowa fer Mooses kexikt hat.