Matye
18 Nan moman sa a, disip yo pwoche kot Jezi, yo di: “Kiyès ki pi enpòtan nan wayòm syèl la?” 2 Lè sa a, Jezi rele yon timoun piti vin jwenn li, li mete l nan mitan yo, 3 e li di: “Anverite m ap di NOU sa: Si NOU pa chanje pou NOU vin tankou timoun piti, NOU pa gendwa antre nan wayòm syèl la. 4 Se sa k fè, nenpòt moun ki rabese tèt li pou l vin tankou tipitit sa a, se li ki pi enpòtan nan wayòm syèl la. 5 E nenpòt moun ki resevwa yon timoun piti ki tankou timoun sa a poutèt non mwen, se mwen li resevwa tou. 6 Men, kèlkeswa moun ki fè youn nan tipiti sa yo ki gen lafwa nan mwen yo peche*, li t ap pi bon pou moun sa a si yo ta mare yon wòch moulen nan kou l, tankou wòch moulen bourik yo konn vire a, epi yo lage l nan fon lanmè.
7 “Malè pou monn nan akoz obstak pou fè moun peche li gen ladan l! Se vre, fòk gen obstak pou fè moun peche, men malè pou moun ki lakòz sa rive! 8 Se sa k fè, si yon men w oswa yon pye w soti pou fè w peche, koupe l, voye l jete lwen w. Li pi bon pou ou pou w antre nan lavi a ak yon men oswa ak yon pye olye pou yo lage w ak de men w oswa ak de pye w nan dife ki pap janm etenn nan. 9 Menm jan an tou, si yon je w soti pou fè w peche, rache l, voye l jete lwen w. Li pi bon pou ou pou w antre nan lavi a ak yon sèl grenn je olye pou yo lage w ak toule de je w nan dife jeyèn* nan. 10 Fè atansyon pou NOU pa meprize youn nan tipiti sa yo. Paske, m ap di NOU sa, yo gen zanj yo nan syèl la ki toujou la devan Papa m ki nan syèl la. 11 *——
12 “Sa NOU panse? Si yon nonm gen san mouton e youn ladan yo pèdi, èske li pap kite katreven diznèf lòt yo sou mòn nan pou l al chèche sa ki pèdi a? 13 E si l rive jwenn li, wi, m ap di NOU sa, l ap pi kontan pou li pase pou katreven diznèf lòt yo ki pa t pèdi a. 14 Menm jan an tou, Papa m ki nan syèl la pa ta renmen pou menm youn nan tipiti sa yo peri.
15 “Anplis de sa, si yon frè w peche kont ou, al kote l poukont ou, fè l wè fot li fè a. Si l koute w, ou ramne frè w la. 16 Men si l pa koute w, pran youn oswa de lòt moun avè w, dekwa pou tout bagay ka regle selon pawòl de oubyen twa temwen. 17 Si l pa koute yo, pale ak kongregasyon an. Si menm kongregasyon an li pa koute, konsidere l menm jan ak yon moun ki nan nasyon yo, menm jan ak yon pèseptè.
18 “Anverite m ap di NOU sa: Nenpòt sa NOU mare sou tè a, se bagay k ap deja mare nan syèl la, e nenpòt sa NOU demare sou tè a, se bagay k ap deja demare nan syèl la. 19 Anverite m ap di NOU sa yon lòt fwa: Si de nan NOU sou tè a dakò pou NOU mande yon bagay ki enpòtan, Papa m ki nan syèl la ap reyalize sa pou NOU. 20 Paske, kote de ou twa moun reyini nan non mwen, mwen la nan mitan yo.”
21 Epi, Pyè avanse, li di l: “Seyè, konbyen fwa pou yon frè m peche kont mwen pou m padone l? Jiska sèt fwa?” 22 Jezi di l: “M ap di w sa, se pa jiska sèt fwa, men, jiska swasanndisèt fwa.
23 “Se sa k fè, wayòm syèl la sanble ak yon mesye, yon wa, ki vle fè regleman ak esklav li yo. 24 Lè l kòmanse fè regleman avèk yo, yo mennen youn ba li ki te dwe li 10 000 talan*. 25 Men, kòm misye pa t gen mwayen pou l peye dèt la, mèt li bay lòd pou yo vann ni misye, ni madanm li, ni pitit li ansanm ak tout sa l posede, pou peye dèt la. 26 Lè sa a, esklav la met ajenou e li kòmanse sipliye mèt li, li di l: ‘Pran pasyans pou mwen, e m ap remèt ou tout sa m dwe w la.’ 27 Mèt la vin pran pitye pou li, li kite l ale e li anile dèt li a. 28 Men, esklav la sot deyò a, li jwenn youn nan esklav parèy li yo ki te dwe l san denye*. Li met men sou li, li kòmanse trangle l, li di l: ‘Remèt mwen sa w dwe m nan.’ 29 Lè sa a, esklav parèy li a met ajenou e li kòmanse sipliye l, li di l: ‘Pran pasyans pou mwen, e m ap remèt ou kòb la.’ 30 Men, lòt la pa t vle. L al fè met esklav parèy li a nan prizon pou jiskaske l peye l sa l dwe l la. 31 Ebyen, lè lòt esklav yo wè sa k pase a, sa fè yo mal anpil, e y al esplike mèt yo tout sa k te pase. 32 Lè sa a, mèt esklav la fè rele l, epi li di l: ‘Esklav mechan! Mwen te anile tout dèt ou a pou ou lè w te sipliye m nan. 33 Èske ou menm tou, ou pa t dwe gen pitye pou esklav parèy ou a, menm jan mwen menm, mwen te gen pitye pou ou a?’ 34 Menm moman an, mèt la vin an kòlè, li lage misye nan men gadyen prizon yo, jiskaske l fin peye tout sa l dwe a. 35 Se konsa Papa m ki nan syèl la ap aji avèk NOU tou, si NOU chak NOU pa padone frè NOU ak tout kè NOU.”