1 Korentyen

5 Wi, yo rapòte gen fònikasyon* pami NOU, e yon fònikasyon konsa pa menm egziste pami nasyon yo: gen yon mesye ki ak madanm papa l. 2 Epi NOU fyè pou sa? Okontrè, èske se pa tris pou NOU ta tris pito, dekwa pou NOU ta mete moun ki fè aksyon sa a deyò nan mitan NOU? 3 Menmsi m pa la an pèsòn, mwen la ann espri, e mwen deja jije moun ki fè aksyon sa a, kòmsi m te la. 4 Konsa, lè NOU reyini ansanm nan non Seyè nou an, Jezi, e mwen avèk NOU ann espri ansanm ak pisans Seyè nou an, Jezi, 5 NOU va lage yon moun konsa bay Satan pou NOU elimine enfliyans chanèl la*, yon fason pou lespri a* ka prezève nan jou Seyè a.

6 Rezon ki fè N ap vante tèt NOU an pa bon. Èske NOU pa konnen yon tikras ledven fè tout pat la leve? 7 Retire ledven ki rasi a, pou NOU ka vin yon pat fre, piske anfèt, NOU pa gen ledven nan NOU. Paske, an reyalite, yo te sakrifye Kris, Timouton fèt Pak nou an. 8 Kidonk, se pa ak yon ledven ki rasi, ni ak ledven malveyans, ni ak ledven mechanste pou nou fete fèt la, men, annou fete l avèk pen ki pa gen ledven, pen senserite ak verite.

9 Nan lèt mwen an, mwen te ekri NOU pou NOU sispann frekante moun k ap fè fònikasyon yo. 10 Mwen pa t vle di pou NOU pa pran kontak ditou ak moun nan monn nan k ap fè fònikasyon, oswa ki ava, oswa ki dechèpiyè, oubyen k ap adore zidòl. Si se ta sa, NOU t ap oblije kite monn nan toutbon. 11 Men kounye a, m ap ekri NOU pou NOU sispann frekante nenpòt moun ki di li se yon frè, men k ap fè fònikasyon, oubyen ki ava, oubyen k ap adore zidòl, oubyen k ap joure moun, oubyen ki bwasonyè, oubyen ki dechèpiyè, e pou NOU pa menm manje ak yon moun konsa. 12 Annefè, ki sa m gen pou m wè nan jije moun ki deyò yo? Èske se pa moun ki anndan yo N ap jije, 13 tandiske Bondye ap jije moun ki deyò yo? “Retire mechan an nan mitan NOU.”