Revelasyon
21 Epi, mwen wè yon syèl tounèf ak yon tè tounèf. Paske, ansyen syèl la ak ansyen tè a disparèt, e lanmè a pa la ankò. 2 Mwen wè vil ki sen an, Nouvo Jerizalèm nan, k ap desann sot nan syèl la bò kot Bondye. Li abiye tankou yon lamarye ki fè l bèl pou mesye li pral marye avè l la. 3 Lè sa a, mwen tande yon vwa ki soti nan twòn nan ki di byen fò: “Gade! Tant Bondye a avèk lèzòm. Bondye pral abite avèk yo, e yo pral vin pèp li. E Bondye li menm ap avèk yo. 4 L ap siye tout dlo nan je yo, pap gen lanmò ankò, e moun pap gen chagren ankò akoz moun pa yo ki mouri. Pap gen ni rèl, ni doulè ankò. Ansyen bagay yo disparèt.”
5 E Moun ki chita sou twòn nan di: “Gade! Kounye a, m ap fè tout bagay vin tounèf.” Li di tou: “Ekri sa, paske pawòl sa yo, moun ka fè yo konfyans, e yo se laverite.” 6 Epi li di m: “Yo reyalize! Mwen se Alfa a ak Omega a, kòmansman an ak finisman an. Nenpòt moun ki swaf, m ap ba l dlo ki soti nan sous dlo lavi a gratis. 7 Moun ki pote laviktwa a ap resevwa* bagay sa yo. M ap vin Bondye l, e l ap vin pitit mwen. 8 Men, kanta pou moun ki lach, moun ki pa gen lafwa, moun ki repiyan nan fè salte, asasen, moun k ap fè fònikasyon, moun k ap pratike bagay ki gen rapò ak movèzespri, moun k ap adore zidòl, ansanm ak tout moun k ap bay manti, pòsyon pa yo se nan letan ki gen dife ak souf la l ap ye. Sa reprezante dezyèm lanmò a.”
9 Epi, gen youn nan sèt zanj ki te gen sèt bòl ki te plen ak sèt dènye kalamite yo ki vini, li pale avè m, li di: “Vin isit, mwen pral montre w lamarye a, madanm Timouton an.” 10 Lè sa a, pa mwayen lespri sen, li mennen m sou yon gwo mòn ki wo anpil, epi li montre m Jerizalèm, vil ki sen an, k ap desann sot nan syèl la bò kot Bondye 11 e ki gen glwa Bondye. Fason l te klere a te sanble ak yon pyè presye ki gen anpil valè, tankou yon pyè jasp ki klere kou kristal. 12 Vil la te gen yon gwo miray byen wo, e li te gen douz pòtay, e te gen douz zanj, youn nan chak pòtay. Te gen non ki ekri sou pòtay yo, se te non douz tribi pitit Izrayèl yo. 13 Nan lès te gen twa pòtay, nan nò te gen twa pòtay, nan sid te gen twa pòtay, e nan lwès te gen twa pòtay. 14 Epitou, fondasyon miray vil la te fèt ak douz wòch, e yo te gen non douz apot Timouton an ekri sou yo.
15 Twouve, moun ki t ap pale avè m nan te gen yon wozo annò nan men l. Li te sèvi avè l kòm mezi pou l mezire ni vil la, ni pòtay yo, ni miray la. 16 Vil la te gen yon fòm kare, longè l te egal ak lajè l. Epi, zanj lan mezire vil la ak wozo a, li jwenn li mezire 12 000 estad*. Ni longè l, ni lajè l, ni wotè l te egal. 17 Epitou, li mezire miray la, li jwenn li mezire 144 koude*, ki se yon mezi ni moun ni zanj itilize. 18 Miray la te fèt ak jasp, e vil la te fèt ak lò pi ki klè kou kristal. 19 Fondasyon miray vil la te fèt ak tout kalite pyè presye: premye wòch nan fondasyon an te an jasp, dezyèm nan te an safi, twazyèm nan te an kalsedwàn, katriyèm nan te ann emwòd, 20 senkyèm nan te an sadoniks, sizyèm nan te an sadwàn, setyèm nan te an krizolit, uityèm nan te an beril, nevyèm nan te an topaz, dizyèm nan te an krizopraz, onzyèm nan te an yasent, e douzyèm nan te ann ametis. 21 Epitou, douz pòtay yo se te douz grenn pèl, chak pòtay te fèt ak yon pèl. Gran wout vil la te fèt ak lò pi ki klè kou kristal.
22 E mwen pa t wè tanp nan vil la, paske se Jewova Dye, li menm ki Toupisan an, ak Timouton an ki te tanp li. 23 E vil la pa t bezwen ni solèy ni lalin pou klere l, paske glwa Bondye te klere l, e se Timouton an ki te lanp li. 24 Limyè l pral pèmèt nasyon yo mache, e wa latè yo ap pote glwa yo genyen an ladan l. 25 Pòtay li yo pap janm fèmen lajounen, e lannuit pap egziste la menm. 26 Y ap pote glwa ak onè nasyon yo ladan l. 27 Men, pa gen anyen ki pa pwòp k ap antre anndan l, ni moun k ap fè zak ki repiyan, ni moun ki pa onèt. Sèl moun k ap antre ladan l, se moun non yo ekri nan woulo lavi a ki pou Timouton an.