Jòb
29 Jòb te kontinye pale*, li di:
2 “Si m te ka retounen viv nan tan lontan,
Nan epòk Bondye t ap voye je sou mwen,
3 Lè li te fè lanp li klere m,
Lè limyè l te konn ede m mache nan fènwa+,
4 Lè* mwen te gen tout fòs mwen sou mwen,
Lè Bondye te bon zanmi m e li te nan tant mwen+,
5 Lè Toupisan an te avè m toujou,
Lè pitit* mwen yo te antoure m,
6 Lè pye m t ap tranpe nan bè,
E luil t ap koule sot nan mas wòch pou mwen+,
7 Lè m te konn soti al nan pòtay vil la+,
E lè m te konn chita sou plas piblik la+.
8 Lè jèn gason yo te wè m, yo te konn met kò yo sou kote,
E menm granmoun yo te konn leve e yo te konn ret kanpe+,
9 Prens yo te konn sispann pale.
Yo te konn met men sou bouch yo,
10 Moun pa t tande vwa gwo potanta yo,
Lang yo te konn vin lou nan bouch yo.
11 Kèlkeswa moun ki te tande m ap pale te fè elòj pou mwen,
E moun ki te wè m te konn pale an byen de mwen.
12 Paske m te konn delivre malere k ap mande sekou yo+,
Ansanm ak timoun ki san papa yo, ak moun ki pa gen pèsonn pou ede yo+.
13 Moun ki sou wout pou yo peri yo te konn mande benediksyon pou mwen+,
E mwen te fè kè vèv yo kontan+.
14 Mwen te abiye ak ladwati tankou yon rad,
Jistis mwen te tankou yon rad long* ak yon gwo mouchwa tèt.
15 Mwen te tounen je pou moun ki avèg yo,
E mwen te tounen pye pou moun ki enfim yo.
16 Mwen te yon papa pou moun ki malere yo+,
Mwen te konn chèche konnen si yo fè moun mwen pa konnen yo jwenn jistis+.
17 Mwen te konn kraze machwè moun k ap fè mechanste yo+,
E mwen te konn retire moun y ap devore yo anba dan yo.
18 Mwen te konn di: ‘M ap mouri lakay mwen+.
E kantite jou m ap viv ap anpil tankou grenn sab bò lanmè.
19 Rasin mwen yo ap gaye nan dlo,
Lawouze ap ret sou branch mwen tout lannuit.
20 Moun toujou onore m,
E m ap kontinye tire flèch ki nan men m yo.’
21 Moun te konn anvi koute sa m ap di,
Yo te ret an silans pou yo koute konsèy mwen+.
22 Lè m te fin pale, yo pa t gen anyen pou yo di ankò,
Pawòl mwen yo te antre dous* nan zòrèy yo.
23 Yo te konn tann mwen tankou lè y ap tann lapli,
Yo te ouvè bouch yo byen laj pou yo bwè sa m di tankou tè k ap bwè dlo lapli nan sezon prentan+.
24 Lè m te konn souri ba yo, yo pa t ka kwè sa,
Lajwa ki te parèt sou figi m te fè yo santi yo alèz*.