Ezayi
56 Men sa Jewova di:
“Suiv prensip ki jis yo+, epi fè sa ki dwat,
Paske, delivrans m ap bay la ap rive talè konsa,
E m ap fè jistis mwen parèt aklè+.
2 Byennere moun ki fè bagay sa yo
Ak moun ki kenbe yo djanm,
Ki obsève saba, ki respekte l+
E ki rale men yo pou yo pa fè anyen ki mal.
3 Etranje ki vin jwenn Jewova a+ pa ta dwe di:
‘Se sèten Jewova ap retire m nan pèp li a.’
E moun ki chatre a pa ta dwe di: ‘Gade! Mwen se yon pyebwa ki sèch.’”
4 Paske, men sa mwen menm, Jewova, mwen di moun ki chatre k ap obsève saba m yo, ki chwazi fè sa ki fè m plezi e ki respekte alyans mwen an:
5 “M ap ba yo yon kote nan kay mwen an e m ap sonje non yo,
Sa pi bon pase pitit gason ak pitit fi.
M ap ba yo yon non k ap la pou toutan,
Yon non ki pap disparèt.
6 Kanta pou etranje ki vin jwenn Jewova pou yo travay pou li,
Pou yo renmen non Jewova+
E pou yo vin sèvitè l,
Tout moun ki obsève saba, ki gen respè pou saba
E ki kenbe alyans mwen an byen fèm,
7 M ap mennen yo nan mòn mwen an ki sakre+,
E m ap fè kè yo kontan anndan kay mwen an, kote moun konn priye m nan.
M ap aksepte sakrifis yo boule nèt yo ak tout kalite sakrifis yo fè sou lotèl mwen an.
Paske, y ap rele kay mwen an yon kay pou tout pèp vin lapriyè+.”
8 Men sa Jewova, Seyè ki Souvren an, Sila a k ap rasanble moun Izrayèl ki te gaye yo+, di:
“M ap rasanble lòt moun ansanm avèk yo, anplis moun ki te deja rasanble yo+.”
9 Nou tout bèt nan bwa ki nan savann yo, vin manje,
Wi, nou tout bèt nan bwa ki nan forè yo+.
10 Moun k ap veye yo avèg+, pa gen youn ki remake anyen+.
Yo tout se yon pakèt chen ki pa ka fè bri e ki pa ka jape+.
Souf yo anlè, yo kouche atè e yo renmen kabicha.
11 Yo se yon bann chen saf*.
Vant yo pa janm plen.
Yo se bèje ki pa gen bon konprann+.
Yo tout al nan wout pa yo.
Yo tout nèt ap chèche jwenn avantaj pa yo nan move kondisyon, epi yo di:
12 “Vini! Kite m pran yon ti diven,
E annou bwè jis nou sou+.
Demen ap menm jan ak jodi a, e l ap pi bon lontan!”