Nonb

6 Apre sa, Jewova pale ak Moyiz, li di l: 2 “Pale ak Izrayelit yo, di yo: ‘Si yon gason oswa yon fi fè yon ve espesyal pou l viv antanke Nazireyen*+ pou Jewova, 3 li pa dwe bwè ni diven ni okenn lòt bwason ki gen alkòl. Li pa dwe bwè vinèg ki fèt ak diven, ni vinèg ki fèt ak lòt bagay ki gen alkòl+. Li pa dwe bwè okenn bwason ki fèt ak rezen, ni li pa dwe manje rezen, kit rezen an fre, kit li sèk. 4 Pandan tout tan l ap viv antanke Nazireyen an, li pa dwe manje anyen ki sot nan pye rezen, ni rezen vèt, e menm po rezen.

5 “‘Pandan tout tan li anba ve li fè antanke Nazireyen an, okenn razwa pa dwe pase nan tèt li+. Li dwe rete sen lè l kite cheve nan tèt li pouse jiskaske tan li rete apa pou Jewova a fini. 6 Li pa dwe pwoche bò kote kadav yon moun* pandan tout tan li rete apa pou Jewova a. 7 Menmsi papa l, manman l, frè l oswa sè l ta mouri, li pa gen dwa kontamine tèt li+, paske siy li genyen antanke Nazireyen pou Bondye l la sou tèt li.

8 “‘Pandan tout tan l ap viv antanke Nazireyen an, li sen pou Jewova. 9 Men, si yon moun ta mouri sibit bò kote l+ e sa ta fè l kontamine cheve l, sa vle di siy ki montre li apa pou Bondye a, li dwe koupe cheve l+ jou l ap tounen vin sen pou Bondye a. Li dwe koupe yo sou setyèm jou a. 10 Sou uityèm jou a, li dwe pote de toutrèl oswa de jenn pijon bay prèt la nan antre tant reyinyon an. 11 Prèt la ap prepare youn kòm yon sakrifis pou peche e lòt la kòm yon sakrifis yo boule nèt pou Nazireyen ki te peche a+ ka jwenn padon piske li te kontamine tèt li akoz kadav yon moun*. Jou sa a, Nazireyen an dwe pirifye cheve nan tèt li. 12 Li dwe mete tèt li apa ankò pou Jewova pandan tan l ap viv antanke Nazireyen an, e l ap pote yon jenn mal mouton ki gen ennan oswa ki pi piti kòm sakrifis ki montre li koupab. Men, tan l te pase anvan sa antanke Nazireyen an pap konte paske l te kontamine tèt li.

13 “‘Kounye a, men lwa konsènan yon moun ki Nazireyen: Lè l fin fè tan li te gen pou l fè antanke Nazireyen an+, y ap mennen l nan antre tant reyinyon an. 14 Lè l rive la, men sa l dwe prezante kòm ofrann devan Jewova: yon jenn mal mouton ki pa gen okenn domaj ki gen ennan oswa ki pi piti kòm yon sakrifis y ap boule nèt+, yon ti femèl mouton ki pa gen okenn domaj ki gen ennan oswa ki pi piti kòm sakrifis pou peche+, yon mal mouton ki pa gen okenn domaj kòm sakrifis kominyon*+, 15 yon pànye pen san ledven ki won, ki gen yon twou nan mitan yo, ki fèt ak farin bon kalite yo melanje ak luil ansanm ak bisuit sèk yo pase luil sou yo. Y ap ansanm ak manje angren yo bay kòm ofrann nan+ ak bwason y ap vide kòm ofrann nan+. 16 Prèt la ap prezante yo devan Jewova e l ap bay ofrann pou peche a ak sakrifis l ap boule nèt la. 17 L ap bay Jewova mal mouton an kòm sakrifis kominyon ak pànye pen san ledven an e l ap prezante ofrann manje angren an+ ak ofrann bwason ki ansanm avè l yo.

18 “‘Apre sa, Nazireyen an dwe koupe cheve nan tèt li+ nan antre tant reyinyon an, l ap pran cheve ki te pouse nan tèt li lè l te Nazireyen an e l ap mete l sou dife ki anba sakrifis kominyon an. 19 Apre prèt la fin koupe cheve Nazireyen an, anpalan de siy ki montre li se yon Nazireyen, li dwe pran youn nan palèt mouton an ki fin kuit+, yon pen san ledven ki won e ki gen yon twou nan mitan l ak yon bisuit sèk yo pase luil sou li nan pànye a e li dwe mete yo nan men Nazireyen an. 20 Prèt la dwe balanse yo devan Jewova+ kòm yon ofrann balanse. Se yon bagay ki sakre pou prèt la. Pwatrin mal mouton yo bay kòm ofrann balanse a ak jigo mal mouton yo bay kòm kontribisyon an+ sakre pou li tou. Annapre, Nazireyen an ka bwè diven.

21 “‘Men lwa konsènan yon Nazireyen+ ki fè yon ve: Si li fè yon ve e li gen posiblite pou l fè yon ofrann devan Jewova ki depase sa yo mande Nazireyen yo, li dwe fè sa l di a pou l montre li respekte lwa Nazireyen an.’”

22 Apre sa, Jewova di Moyiz: 23 “Di Arawon ak pitit gason l yo: ‘Men ki jan nou dwe beni+ pèp Izrayèl la. Di yo:

24 “Se pou Jewova beni nou+ e se pou l pwoteje nou!

25 Se pou Jewova fè limyè ki sot nan figi l klere nou+ e se pou l fè nou favè!

26 Se pou Jewova voye je gade nou* e se pou l ban nou lapè+!”’

27 Epi, yo dwe sèvi ak non m lè y ap beni pèp Izrayèl la+ pou m ka beni pèp la+.”