1 Samyèl

7 Konsa, moun Kiriyatjeyarim yo vin pran Lach Jewova a, yo monte avè l, y al mete l lakay Abinadab+, sou ti mòn nan e yo pirifye Eleyaza, pitit gason l lan, pou l veye Lach Jewova a.

2 Anpil tan te pase depi jou Lach la vin Kiriyatjeyarim. Sa te fè 20 an antou. Epi, tout pèp Izrayèl la te kòmanse chèche* Jewova+. 3 Lè sa a, Samyèl di yo: “Si nou retounen vin jwenn Jewova ak tout kè nou+, retire dye lòt nasyon yo+ ak estati Achtorèt+ nou gen nan mitan nou yo. Epi, bay Jewova kè nou san nou pa janm chanje e se li menm sèl pou n sèvi+, konsa l ap sove nou anba men moun Filisti yo+.” 4 Menm moman an, Izrayelit yo retire estati Baal yo ak estati Achtorèt yo te gen nan mitan yo e yo sèvi Jewova sèlman+.

5 Apre sa, Samyèl di: “Fè tout pèp Izrayèl la rasanble nan Mispa+, epi m ap priye Jewova pou nou+.” 6 Konsa, yo te rasanble nan Mispa, yo tire dlo e yo vide l devan Jewova. Epi, pou yo te montre jan yo nan lapenn, yo pa t manje jou sa a+. Pandan yo la, yo te di: “Nou peche kont Jewova+.” Konsa, Samyèl te kòmanse sèvi kòm jij+ pou Izrayelit yo nan Mispa.

7 Lè moun Filisti yo aprann Izrayelit yo rasanble nan Mispa, chèf nan Filisti yo+ monte pou y al atake pèp Izrayèl la. Lè Izrayelit yo tande sa, yo pè paske moun Filisti yo t ap vin atake yo. 8 Lè sa a, Izrayelit yo di Samyèl: “Pinga w sispann priye Jewova, Bondye nou an, pou l ede nou+ e pou l sove nou anba men moun Filisti yo.” 9 Epi, Samyèl pran yon ti mouton ki poko sevre, li bay li kòm yon sakrifis yo boule nèt+ pou Jewova. Samyèl te priye Jewova pou l mande l ede pèp Izrayèl la e Jewova te reponn priyè l+. 10 Pandan Samyèl t ap ofri sakrifis yo boule nèt la, moun Filisti yo te vin fè lagè ak pèp Izrayèl la. Jou sa a, Jewova te fè loray gwonde byen fò+ sou moun Filisti yo e li te lage konfizyon nan mitan yo+, epi pèp Izrayèl la te pot laviktwa sou yo+. 11 Lè sa a, mesye Izrayelit yo soti Mispa, yo pati dèyè mesye Filisti yo, yo pran touye yo rive jis nan sid Bètka. 12 Apre sa, Samyèl pran yon wòch+ e li mete l ant Mispa ak Jechana. Li te rele wòch la Ebenezè*, paske men sa l te di: “Jis jodi a, Jewova kontinye ede nou+.” 13 Se konsa, yo te vin sou tèt moun Filisti yo, e moun Filisti yo pa t antre nan tèritwa pèp Izrayèl la ankò+. Jewova te kontinye aji kont moun Filisti yo pandan tout tan Samyèl te vivan+. 14 Epitou, tout vil moun Filisti yo te pran nan men pèp Izrayèl la te vin pou pèp Izrayèl la ankò, soti Ekwon rive Gat. Pèp Izrayèl la te repran tèritwa ki te pou yo nan men moun Filisti yo.

Te toujou gen lapè ant pèp Izrayèl la ak moun Amorit yo+.

15 Samyèl te kontinye sèvi kòm jij pou pèp Izrayèl la pandan tout vi l+. 16 Chak ane, li te konn vwayaje al Betèl+, Gilgal+ ak Mispa+ e li te sèvi kòm jij pou pèp Izrayèl la tout kote sa yo. 17 Men, li te konn retounen Rama+ paske se la kay li te ye, epi lè l Rama, li te sèvi kòm jij pou pèp Izrayèl tou. Li te bati yon lotèl nan Rama pou Jewova+.