Mak
5 Epi, yo rive pa lòtbò lanmè a, nan zòn Jerazényen yo+. 2 Tousuit apre Jezi fin desann bato a, gen yon mesye ki gen yon movèzespri sou li ki sot nan simityè a* ki vin rankontre l. 3 Se nan simityè a li te rete. Pèsonn pa t janm ka mare l byen mare, menm avèk yon chenn. 4 Anpil fwa yo te mare ni men l ni pye l ak chenn, men li te konn pete chenn ki nan men l yo, e li te konn fè sa k nan pye l yo fè miyèt moso. E pèsonn pa t gen fòs pou metrize l. 5 Epi, se toutan, lajounen kou lannuit, li te konn ap rele san rete nan simityè a ak nan mòn yo, e li te konn kòche kò l ak wòch. 6 Men, lè mesye a wè Jezi nan yon distans, li kouri vin met ajenou devan l+, 7 epi li fè yon gwo rèl, li di: “Ki rapò mwen gen avè w, Jezi, Pitit Bondye a, Pitit Sila a ki nan pi gwo pozisyon an? Sèmante devan Bondye ou pap toumante m+.” 8 Paske, Jezi te di l: “Movèzespri, soti sou mesye a+.” 9 Epi, Jezi mande l: “Kòman w rele?” Li reponn: “Mwen rele Rejiman, paske nou anpil.” 10 Apre sa, li kontinye sipliye Jezi pou l pa mete l deyò nan peyi a+.
11 Twouve, te gen yon bann ak yon pakèt kochon+ ki t ap manje sou mòn nan+. 12 Konsa, movèzespri yo sipliye l, yo di: “Kite nou antre nan kochon yo.” 13 Vrèmanvre, li kite yo fè sa. Menm kote a, movèzespri yo soti sou mesye a, yo antre nan kochon yo. Tout kochon yo kouri al sou tèt falèz la, yo lage kò yo nan lanmè. Yo te anviwon 2 000, e yo tout neye nan lanmè a. 14 Men, moun ki t ap gade kochon yo kouri al rakonte sa nan vil la ak nan zòn andeyò yo. Epi, moun yo vin gade sa k te pase a+. 15 Konsa, yo vin kot Jezi, e yo wè mesye ki te gen rejiman demon sou li a chita ak rad sou li e li te ak tout bonsans li. Moun yo vin pè. 16 Epitou, moun ki te wè sa k te pase yo rakonte yo sa k te rive mesye ki te gen demon sou li a e sa k te rive kochon yo. 17 Lè sa a, yo kòmanse sipliye Jezi pou l kite zòn yo a+.
18 Twouve, pandan Jezi ap monte nan bato a, mesye ki te gen demon sou li a sipliye l pou l kite l ale avè l+. 19 Men, li pa kite l vin avè l, li di l: “Al lakay ou, al jwenn fanmi w, epi rakonte yo tout sa Jewova* fè pou ou e ki jan li te gen pitye pou ou.” 20 Epi, mesye sa a al nan tout Dekapòl la*, li kòmanse rakonte tout sa Jezi te fè pou li, e tout moun yo te sezi.
21 Lè Jezi fin travèse pa lòtbò lanmè a ankò nan bato a, gen yon gwo foul moun ki vin rasanble bò kote l pandan l te bò lanmè a+. 22 Gen youn nan mesye ki t ap dirije sinagòg la ki vin parèt. Mesye sa a rele Jayiris. Lè l wè Jezi, li met ajenou nan pye l+. 23 Li sipliye l plizyè fwa, li di: “Tipitit fi m nan malad byen mal*. Tanpri, vin poze men w sou li+ pou l ka refè e pou l ka viv.” 24 Lamenm, Jezi ale avè l, e te gen yon gwo foul moun ki t ap suiv li e ki t ap kwense l.
25 Twouve, te gen yon dam ki gen yon san k ap koule sou li+ depi 12 an+. 26 Li te soufri anpil* nan men plizyè doktè, e li te depanse tout sa l te genyen. Men, li pa t vin miyò, okontrè li te vin pi mal. 27 Etandone li te tande bagay yo t ap di konsènan Jezi, li fofile kò l nan foul la pa dèyè Jezi, epi li touche rad li+. 28 Paske, li te di tèt li: “Si m touche rad li sèlman, m ap geri+.” 29 Epi, lamenm san ki t ap koule sou li a rete, e li santi li geri anba maladi ki t ap fè l soufri a.
30 Menm kote a, Jezi santi gen yon fòs ki sot nan li+. Li vire nan foul la, e li mande: “Ki moun ki manyen rad mwen an+?” 31 Men, disip li yo di l: “Ou wè foul la ap kwense w, epi w di: ‘Ki moun ki manyen m?’” 32 Men, li t ap gade toutotou l pou l wè ki moun ki te fè sa a. 33 Dam nan ki konnen sa k sot rive l la te pè e li t ap tranble. Li parèt, li met ajenou nan pye Jezi e li di l tout verite nèt. 34 Jezi di l: “Pitit fi m, lafwa w geri w. Ale anpè+, ou geri anba maladi ki t ap fè w soufri a+.”
35 Li potko menm fin pale, gen kèk moun ki sot lakay mesye ki t ap dirije sinagòg la ki parèt. Yo di mesye a: “Pitit fi w la mouri! Poukisa w bezwen kontinye deranje Anseyan an+?” 36 Men, Jezi tande pawòl yo di a, e li di mesye ki t ap dirije sinagòg la: “Ou pa bezwen pè*, annik demontre w gen lafwa+.” 37 Lè sa a, li pa kite okenn lòt moun suiv li, eksepte Pyè, Jak ak Jan, frè Jak la+.
38 Lè yo rive kay mesye ki t ap dirije sinagòg la, li wè yon pakèt moun k ap fè bri, k ap kriye e k ap plede rele+. 39 Lè l fin antre, li di yo: “Poukisa n ap kriye e n ap fè bri konsa a? Tipitit la pa mouri, se dòmi l ap dòmi+.” 40 Lè yo tande sa, yo kòmanse ri l e yo t ap pase l nan rizib. Men, apre li fin fè yo tout sot deyò, li pran papa ak manman tipitit la ansanm ak disip ki te avè l yo, li antre kote tipitit la ye a. 41 Epi, li pran men tipitit la, li di l: “Talita koumi”, sa ki vle di: “Tifi, mwen di w: Leve+!” 42 Menm kote a, tifi a leve e li kòmanse mache. (Li te gen 12 an.) Lè sa a, papa ak manman tipitit la pa t konn kote pou yo met kò yo, tèlman yo te kontan. 43 Men, li ba yo lòd plizyè fwa* pou yo pa kite pèsonn konn sa+, e li di yo pou yo bay tipitit la yon bagay pou l manje.