Ezayi
21 Men yon mesaj kont dezè ki nan lanmè a*+:
Gen yon bagay k ap vini tankou van tanpèt k ap pote tout sa l jwenn ale nan zòn sid,
Sot depi nan dezè a al nan yon peyi ki bay laperèz+.
2 Mwen te resevwa yon vizyon ki fè m pè, yo te di m:
Nasyon ki trèt la ap aji yon fason ki trèt,
Y ap detwi nasyon k ap detwi lòt nasyon yo.
O Elam! Monte non. O Medi+! Vin ansèkle yon vil.
M ap fè tout mizè li t ap fè moun pase yo fini+.
3 Se sa k fè m boulvèse anpil*+.
Mwen pran tòde,
Tankou fi k ap akouche.
Sa twò tris pou m tande.
Tèt mwen twò chaje, m pa ka wè.
4 Kè m vin febli. M ap tranble tèlman m pè.
Lè l prèske fè nwa, lè solèy la pral kouche, mwen tranble.
5 Prepare tab la, epi ranje chèz yo!
Manje, epi bwè+!
Nou menm chèf yo, leve kanpe, vide luil sou boukliye a!
6 Paske, men sa Jewova te di m:
“Ale, al met yon moun fè pòs pou l ka di w sa l wè.”
7 Epi, li te wè yon charyo ak yon gwoup cheval k ap rale l,
Li te wè yon charyo ki gen bourik k ap rale l,
E li te wè yon charyo ki gen chamo k ap rale l.
Li te kontinye byen gade, li te pran san l pou l gade.
8 Apre sa, li fè yon rèl tankou yon lyon, li di:
“O Jewova, mwen pase tout jounen m kote m ap fè pòs la,
E mwen ret nan pòs mwen tout lannuit+.
9 Men sa m wè k ap vini:
Mwen wè sòlda ki sou yon charyo yo konn al nan lagè ak yon gwoup cheval k ap rale charyo a+!”
Apre sa, Bondye pale byen klè, li di:
“Babilòn tonbe! Li tonbe+!
Tout estati fo dye l yo kraze tonbe atè+!”
10 O pèp mwen, nou menm yo bat tankou manje angren,
Nou menm ki se manje angren* ki kote m konn bat manje angren m yo+,
Mwen di nou sa m tande Jewova, Chèf lame yo, Bondye Izrayèl la, di.
11 Men yon mesaj kont Douma*:
Gen yon moun nan Seyi+ k ap rele m, li di m:
“Veyè, ki jan nuit lan ye?
Veyè, ki jan nuit lan ye?”
12 Veyè a di:
“Li prèske jou, apre sa lannuit ap rive.
Si w vle chèche konnen, ou mèt chèche konnen.
Retounen ankò!”
13 Men yon mesaj kont plèn ki nan dezè a:
Nou menm vwayajè ki sou chamo nan Dedan yo+,
N ap pase nuit lan nan forè ki nan plèn ki nan dezè a.
14 Pote dlo pou n al rankontre moun ki swaf yo,
Nou menm moun ki ret nan peyi Tema+,
E pote manje pou moun ki nan kouri yo.
15 Paske, yo kouri pou epe, pou epe yo rale sou yo,
Yo kouri pou banza* e pou lagè a ki rèd anpil.
16 Paske, men sa Jewova di m: “Nan ennan egzakteman*, tout glwa peyi Keda+ ap disparèt. 17 Kantite sòlda ki rete nan peyi Keda ki konn sèvi ak banza yo pap anpil. Paske, se Jewova, Bondye Izrayèl la, ki di sa.”