Lik
8 Yon ti tan apre sa, li vwayaje sot nan yon vil al nan yon lòt, sot nan yon bouk al nan yon lòt, l ap preche e l ap anonse bon nouvèl Wayòm Bondye a+. Epi, 12 apot yo te ansanm avè l. 2 Te gen kèk medam li te geri anba movèzespri e anba maladi yo te genyen ki te avè l tou. Pa egzanp, te gen Mari, yo te rele moun Magdala a, yon dam Jezi te chase sèt demon sou li. 3 Epi, te gen Jàn+, madanm Chouza, yon mesye ki te responsab kay Ewòd, e te gen Sizàn ak anpil lòt medam ki te itilize sa yo te genyen pou yo rann Jezi ak disip li yo sèvis+.
4 Kounye a, yon gwo foul moun vin rasanble ansanm ak moun ki te kòmanse suiv li nan tout vil li te pase yo. Li sèvi ak yon egzanp pou l pale avèk yo, li di yo+: 5 “Gen yon moun ki soti al simen semans. Pandan l ap simen, gen enpe ladan yo ki tonbe bò chemen an, pye pile yo, epi zwazo nan syèl la manje yo+. 6 Gen enpe ki tonbe sou wòch karyann, e lè yo fin jèmen, yo seche, paske yo pa t jwenn imidite+. 7 Gen lòt ki tonbe nan mitan pye pikan, e pye pikan yo ki grandi ansanm avèk yo toufe yo+. 8 Men, gen lòt ki tonbe nan bon tè, e lè yo fin jèmen, yo bay fwi 100 fwa lavalè+.” Pandan l ap di bagay sa yo, li di byen fò: “Moun ki gen zòrèy pou l tande, tande+!”
9 Men, disip li yo kòmanse mande l sa egzanp sa a vle di+. 10 Li di: “Nou menm, yo pèmèt nou konprann sekrè sakre ki gen rapò ak Wayòm Bondye a, men pou lòt moun yo se an parabòl mwen pale+, dekwa pou byenke y ap gade, yo gade pou granmesi, e byenke y ap tande, pou yo ka pa rive konprann+. 11 Kounye a, men sa egzanp lan vle di: Semans lan se pawòl Bondye a+. 12 Sa ki tonbe bò chemen an, se moun ki tande pawòl la, epi Dyab la vini, li retire pawòl la nan kè yo pou yo ka pa kwè e pou yo pa sove+. 13 Sa ki tonbe sou wòch karyann yo, se moun ki aksepte pawòl la ak kè kontan lè yo fin tande l, men semans lan pa pran rasin nan yo. Yo kwè pou yon ti tan, e nan moman eprèv, yo tonbe+. 14 Kanta sa ki tonbe nan mitan pye pikan yo, se moun ki tande pawòl la, men enkyetid, richès+ ak plezi ki gen nan lavi sa a pran tèt yo+, bagay sa yo toufe semans lan nèt, e li pa pwodui anyen ki bon nèt+. 15 Men, sa ki tonbe nan bon tè a, se moun ki tande pawòl la ak yon kè ki pwòp e ki bon+, apre sa, yo kenbe pawòl la e yo bay fwi avèk andirans+.
16 “Pa gen yon moun ki fin limen yon lanp epi k ap kouvri l ak yon veso oswa k ap mete l anba kabann. Men, l ap mete l sou yon etajè pou moun k ap antre nan kay la ka wè limyè a+. 17 Ebyen, pa gen anyen ki kache ki pap vin devwale, ni pa gen anyen ki byen kache moun pap janm konnen e ki pap vin parèt klè devan je tout moun+. 18 Kidonk, fè atansyon ak fason n ap koute. Paske, yon moun ki genyen, y ap ba l plis+. Men, yon moun ki pa genyen, menm sa l panse l genyen an y ap pran l nan men l+.”
19 Twouve, manman l ak frè l yo+ vin kote l, men yo pa t ka rive pre l akoz foul moun yo+. 20 Konsa, gen moun ki vin di l: “Men manman w ak frè w yo kanpe deyò a, yo ta renmen wè w.” 21 Li reponn yo: “Se moun ki tande pawòl Bondye a e ki obeyi l ki manman m e ki frè m+.”
22 Yon jou, li menm ak disip li yo monte nan yon bato. Li di yo: “Ann janbe pa lòtbò lak la.” Vrèmanvre, yo derape+. 23 Men, pandan yo t ap navige, dòmi pran Jezi. Epi, gen yon gwo van tanpèt ki pran soufle sou lak la, e dlo te kòmanse plen bato yo a. Konsa, yo te an danje+. 24 Se sa k fè y al reveye Jezi, yo di l: “Anseyan! Anseyan! Nou sanlè peri!” Menm kote a, li leve, li pale di ak van an ak dlo a ki te move, epi yo bese, e vin gen yon kalmi+. 25 Apre sa, li di yo: “Kote lafwa nou?” Men yo menm, yo te gen yon sèl laperèz ki te pran yo, yo te sezi, youn t ap di lòt: “Kiyès misye ye menm? Paske, ata van ak dlo li pase lòd, e yo obeyi l+.”
26 Apre sa, yo fè tè nan zòn Jerazényen yo+ ki te anfas Galile. 27 Etan Jezi ap met pye atè, gen yon mesye nan vil la ki gen demon sou li ki vin rankontre l. Mesye sa a gen yon bon ti tan depi li pa met rad sou li. Epi, li pa rete nan kay, se nan simityè a* li rete+. 28 Lè l wè Jezi, li rele byen fò, epi li met ajenou devan l, li di byen fò: “Ki rapò mwen gen avè w, Jezi, Pitit Bondye a, Pitit Sila a ki nan pi gwo pozisyon an? M ap priye w, pa toumante m+.” 29 (Paske, Jezi te pase movèzespri a lòd pou l sot sou mesye a. Movèzespri a te antre sou mesye a souvan*, e pandan plizyè fwa+, yo te mare ni men mesye a ni pye l ak chenn e yo te konn met veye l, men, li te konn kase chenn yo, e demon an te konn mennen l nan zòn ki izole.) 30 Jezi mande l: “Ki jan w rele?” Li di: “Rejiman”, paske mesye a te gen anpil demon sou li. 31 E yo sipliye l pou l pa ba yo lòd pou y al nan twou san fon an+. 32 Twouve, te gen yon bann ak yon pakèt kochon+ ki t ap manje nan mòn nan. Konsa, yo sipliye l pou l kite yo antre nan kochon yo. Li kite yo fè sa+. 33 Lè sa a, demon yo soti sou mesye a, yo antre nan kochon yo, e kochon yo kouri al sou tèt falèz la, yo lage kò yo nan lak la e yo neye. 34 Lè moun ki t ap gade kochon yo wè sa k pase a, yo kouri al di sa nan vil la ak nan zòn andeyò yo.
35 Lè sa a, moun yo vini pou yo wè sa k te pase a. Yo vin kot Jezi, e yo jwenn mesye ki te gen demon sou li a chita nan pye Jezi. Misye te gen rad sou li e li te ak tout bonsans li. Moun yo vin pè. 36 Moun ki te wè sa k te pase yo rakonte yo kòman mesye ki te gen demon sou li a fè geri. 37 Epi, gen yon pakèt moun ki te soti ozalantou zòn Jerazényen yo ki mande Jezi pou l ale, paske yo te pè anpil. Vrèmanvre, li monte nan bato a l ale. 38 Mesye ki te gen demon sou li a pa t sispann mande l pou l ret avè l, men, li voye misye ale, li di l+: 39 “Al lakay ou, epi kontinye rakonte sa Bondye fè pou ou.” Vrèmanvre, misye ale e li mache di nan tout vil la sa Jezi fè pou li.
40 Lè Jezi tounen pa lòtbò lak la, foul moun yo byen akeyi l, paske yo tout t ap tann li+. 41 Epi, gen yon mesye ki rele Jayiris ki vin parèt. Se mesye sa a ki t ap dirije sinagòg la. Li met ajenou nan pye Jezi, li kòmanse sipliye l pou l vin lakay li+, 42 paske misye te gen yon sèl pitit fi ki te gen 12 an ki te prèt pou mouri.
Pandan Jezi sou wout pou l ale, foul moun yo t ap kwense l toupatou. 43 Twouve, te gen yon dam ki gen yon san k ap koule+ sou li depi 12 an, e pèsonn pa t ka geri l+. 44 Dam sa a pwoche pa dèyè, epi li touche franj rad Jezi+, e menm moman an, san an sispann koule sou li. 45 Lè sa a, Jezi di: “Kiyès ki touche m nan?” Tout moun di se pa yo menm. Epi, Pyè di: “Anseyan, se yon foul moun ou gen toutotou w la a k ap kwense w+.” 46 Men, Jezi di: “Gen yon moun ki touche m, paske mwen santi gen yon pisans+ ki sot nan mwen.” 47 Lè dam nan wè yo dekouvri l, li avanse tou ap tranble epi li met ajenou nan pye Jezi, li rakonte devan tout moun pou ki rezon li te touche l e ki jan li te geri menm kote a. 48 Lè sa a, li di fi a: “Pitit fi m, lafwa w geri w. Ale anpè+.”
49 Li potko menm fin pale, gen yon moun ki soti lakay mesye ki t ap dirije sinagòg la ki parèt e ki di: “Pitit fi w la mouri. Ou pa bezwen kontinye deranje Anseyan an+.” 50 Lè Jezi tande sa, li di l: “Ou pa bezwen pè, annik gen lafwa, e pitit fi w la ap sove+.” 51 Lè l rive nan kay la, li pa kite pèsonn antre avè l, eksepte Pyè, Jan, Jak ansanm ak papa ak manman tifi a. 52 Men, tout moun yo t ap kriye e yo t ap frape lestomak yo tèlman yo te nan lapenn akoz tifi a ki te mouri a. Men, li di yo: “Sispann kriye+, paske tifi a pa mouri, se dòmi l ap dòmi+.” 53 Lè yo tande sa, yo kòmanse ri l e yo t ap pase l nan rizib, paske yo te konnen tifi a mouri. 54 Epi, li pran men tifi a, li di l: “Tipitit, leve+!” 55 Epi, lespri* tifi a+ retounen sou li, li leve menm moman an+. Li mande pou yo bay tifi a yon bagay pou l manje. 56 Paran yo pa t konn kote pou yo met kò yo, tèlman yo te kontan. Men, li di yo pou yo pa di pèsonn sa k te pase a+.