Ezayi
32 Gade! Gen yon wa+ ki pral dirije pou sa ki jis fèt+,
E gen prens ki pral dirije yon fason ki dwat.
2 Yo chak ap vin tankou yon kote pou moun kache* lè gen van,
Yon kote pou moun abrite yo* lè gen gwo lapli,
Tankou rivyè dlo k ap koule nan yon tè ki sèk+,
Tankou lonbray yon gwo mas wòch nan yon tè ki sèk.
3 Lè sa a, je moun k ap gade yo pap fèmen ankò,
E zòrèy moun k ap tande yo ap byen koute.
4 Moun ki gen kè cho yo ap pran san yo pou yo reflechi sou sa konesans ye.
Moun ki bege yo ap pale byen klè, san pwoblèm+.
5 Moun ap sispann di moun ki pa gen bonsans lan se yon moun ki donan,
E yo pap di moun ki san prensip la se yon moun debyen.
6 Paske, moun ki pa gen bonsans lan ap di pawòl ki pa gen sans.
L ap kalkile move bagay nan kè l+
Pou l fè moun vire do bay Bondye* e pou l bay manti sou Jewova,
Pou l fè moun ki grangou a* ale san manje,
E pou l anpeche moun ki swaf la jwenn yon bagay pou l bwè.
7 Plan moun ki san prensip la ap fè yo pa bon+.
L ap ankouraje moun gen konduit ki fè moun wont
E li sèvi ak manti pou l fini ak moun k ap soufri a+,
Menm lè malere a ap di sa ki dwat.
8 Men, moun ki renmen bay la bay moun konsèy pou yo renmen bay,
E li toujou renmen bay.
9 “Nou menm medam kè pòpòz yo, leve kanpe pou n koute vwa m.
Nou menm pitit fi ki pouryanis yo+, byen tande sa m ap di.
10 Nan yon tikras plis pase ennan, nou menm ki pouryanis, n ap tranble,
Paske moun pap ranmase okenn fwi lè rekòt rezen an fini+.
11 Nou menm medam kè pòpòz yo, se pou n tranble!
Nou menm pouryanis, se pou n gen latranblad!
Retire tout rad sou nou,
E mare ren nou ak twal sak+.
12 Se pou n bat lestomak nou paske nou nan lapenn
Akoz sa k rive jaden ki donnen anpil yo ak jaden rezen ki bay rannman yo.
13 Paske, tè pèp mwen an ap chaje ak tout kalite pye pikan,
Y ap kouvri tout kay ki te gen kè kontan ladan yo,
Wi, y ap kouvri vil ki te gen gwo kè kontan ladan l lan+.
14 Paske, moun yo kite fò ki byen pwoteje a.
Yo abandone vil ki gen anpil bri ladan l lan+.
Ofèl*+ ak kote yo konn fè pòs la tounen yon savann k ap toujou dezole.
Bourik mawon yo alèz ladan l,
E li se yon patiraj pou twoupo bèt yo+,
15 Jiskaske Bondye vide lespri l sou nou+,
E dezè a vin tounen yon jaden,
Epi yo konsidere jaden an kòm yon forè+.
16 Lè sa a, se sa ki jis k ap toujou la nan dezè a,
E se sa ki dwat k ap ret nan jaden an+.
17 Grasa bagay ki dwat toutbon moun yo ap fè, ap gen lapè+.
Grasa bagay ki dwat toutbon moun yo ap fè, ap gen kè poze ak sekirite nètale+.
18 Pèp mwen an ap rete yon kote ki gen lapè, yon kote yo an repo,
Y ap abite kote ki gen sekirite e ki trankil+.
19 Men, lagrèl ap kraze forè a plat atè,
Epi, vil la ap kraze rapyetè.