1 Samyèl

3 Pandan tan sa a, Samyèl, ki te yon timoun, t ap fè sèvis+ Jewova anba kontwòl Eli. Men, nan epòk sa a, se yon lè konsa Jewova te konn fè moun konnen pawòl li. Pa t konn gen anpil vizyon+ menm.

2 Je Eli te vin febli e li pa t ka wè+. Yon jou, pandan l te kouche nan kabann li, 3 lanp Bondye a+ potko etenn, Samyèl te kouche nan tanp Jewova a*+, kote Lach Bondye a te ye a, 4 epi, Jewova rele Samyèl. Li reponn: “Men mwen wi.” 5 Li kouri al kot Eli, li di l: “Men mwen wi. Mwen tande w rele m.” Men, Eli di l: “Mwen pa rele w. Tounen nan kabann ou.” Epi, l al kouche. 6 Jewova rele l ankò: “Samyèl!” Menm moman an, Samyèl leve l al kot Eli. Li di l: “Men mwen wi. M tande w rele m.” Men, Eli di l: “Mwen pa rele w, pitit gason m. Tounen nan kabann ou.” 7 (Twouve, Samyèl potko byen konnen Jewova, e Jewova potko fè l konn pawòl li+.) 8 Epi, Jewova rele l yon twazyèm fwa: “Samyèl!” Menm moman an, li leve l al kot Eli, li di l: “Men mwen wi. M tande w rele m.”

Lè sa a, Eli vin konprann se Jewova ki t ap rele tigason an. 9 Se sa k fè Eli di Samyèl: “Al kouche. Si l rele w ankò, di: ‘Ou mèt pale, Jewova, paske sèvitè w la ap koute w.’” Epi, Samyèl al kouche nan kabann li.

10 Jewova vini, li rele l menm jan l te fè anvan yo, li di: “Samyèl, Samyèl!” Menm kote a, Samyèl di: “Ou mèt pale, paske sèvitè w la ap koute w.” 11 Jewova di Samyèl: “Gade! M ap fè yon bagay ann Izrayèl, nenpòt moun ki tande sa ap sezi*+. 12 Jou sa a, m ap fè tout sa m te di konsènan Eli ak fanmi l reyalize, depi sou premye sa m te di a rive sou dènye a+. 13 Ou dwe di l m ap pini moun lakay li yo nètale pou peche yo a+, paske li konnen pitit gason l yo ap derespekte Bondye+, men li pa blame yo+. 14 Se poutèt sa, mwen fè sèman bay moun lakay Eli yo, pa gen okenn sakrifis oswa ofrann k ap janm pèmèt moun lakay Eli jwenn padon pou peche yo+.”

15 Samyèl te ret kouche pou jis demen maten. Apre sa, li ouvri pòt kay Jewova a. Samyèl te pè rakonte Eli vizyon l te fè a. 16 Men, Eli rele Samyèl: “Samyèl, pitit gason m!” Li reponn li: “Men mwen wi.” 17 Eli mande l: “Ki sa l te di w? Tanpri, pa kache m anyen. Se pou Bondye pini w, e se pou l pini w ankò, si w kache m menm yon pawòl nan tout sa l te di w yo!” 18 Lè sa a, Samyèl rakonte l tout bagay. Li pa t kache l anyen. Epi, Eli reponn li: “Se volonte Jewova. Li mèt fè sa ki fè l plezi.”

19 Samyèl te kontinye grandi, Jewova te ansanm avè l+ e li pa t kite youn nan tout pawòl Samyèl te di yo rete san li pa reyalize*. 20 Tout pèp Izrayèl la, soti Dann rive Beyècheba, te rekonèt Samyèl se bonjan pwofèt Jewova. 21 Jewova te kontinye parèt nan Silo, paske se nan Silo Jewova te sèvi ak pawòl li pou l fè Samyèl konnen kiyès Jewova ye+.