Jeremi
49 Men sa Jewova di konsènan desandan Amon yo+:
“Èske Izrayèl pa gen pitit gason?
Èske l pa gen eritye?
Poukisa Malkam+ pran tèritwa Gad la pou li+?
E poukisa moun k ap sèvi l yo ap viv nan vil ki ann Izrayèl yo?”
2 “‘Se sa k fè, tande sa! Gen yon jou k ap vini’, se sa Jewova di,
‘Kote m ap fè tande siyal k ap fè konnen lè a rive pou yo* atake Raba+, vil ki pou desandan Amon yo+.
L ap tounen yon ti mòn ki pa gen moun abite ladan l,
E y ap met dife nan ti vil ki sou kont li yo*.’
‘Izrayèl gen pou l pran tè moun ki te pran tè l yo+.’ Se sa Jewova di.
3 ‘O Esbon, se pou w rele, paske, yo kraze Ayi!
Nou menm ti vil ki sou kont Raba yo, se pou nou rele.
Mete twal sak sou nou.
Se pou nou rele, se pou nou monte desann nan mitan pak ki antoure ak wòch yo*.
Paske, yo gen pou yo mennen Malkam ann egzil
Ansanm ak prèt li yo ak chèf k ap sèvi l yo+.
4 Poukisa w ap vante tèt ou pou vale w yo
Ak plèn ou an ki gen dlo, ou menm pitit fi ki pa fidèl la,
Ou menm ki met konfyans ou nan trezò w yo
E ki di: “Kiyès k ap vin atake m?”’”
5 “‘M ap lage yon gwo malè sou ou.’ Se sa Jewova, Chèf lame yo, Seyè ki Souvren an, di.
‘Malè sa a ap soti nan tout nasyon ki antoure w yo.
Y ap gaye w nan tout direksyon,
E pèsonn pap rasanble moun ki chape yo.’”
6 “‘Men, apre sa, m ap rasanble desandan Amon yo te pran kòm prizonye yo.’ Se sa Jewova di.”
7 Men sa Jewova, Chèf lame yo, di konsènan Edòm:
“Èske pa gen moun nan Teman ki gen sajès ankò+?
Èske moun ki gen bon konprann yo pa kapab bay bon konsèy ankò?
Èske sajès yo genyen an pa gen okenn valè ankò?
8 Nou menm ki abite Dedan, chape poul nou, kase tèt tounen!
Al kache kote ki fon yo+.
Paske, m ap lage yon malè sou Ezaou
Lè lè a rive pou m regle avè l.
9 Si moun k ap rekòlte rezen ta vin nan peyi nou an,
Èske yo pa t ap kite rezen dèyè pou moun ranmase?
Si vòlè ta vin vòlè afè nou nan nuit,
Èske se pa sa yo vle sèlman yo t ap pran+?
10 Men, mwen menm, m ap pran tout sa Ezaou genyen.
M ap fè konnen kote li kache yo
Pou l pa ka kache ankò.
Pitit li yo, frè l yo ak vwazen l yo, yo tout ap peri+,
E li menm l ap sispann egziste antanke pèp+.
11 Kite timoun ou genyen ki san papa yo,
E mwen menm, m ap prezève lavi yo.
Vèv ou yo ap met konfyans yo nan mwen.”
12 Paske, men sa Jewova di: “Tande sa! Si moun ki pa resevwa santans pou yo bwè nan koup la dwe bwè ladan l, èske ou menm w ap rete san w pa jwenn okenn pinisyon? Ou pap rete san w pa jwenn pinisyon. Paske, w ap bwè nan koup la kanmenm+.”
13 “Paske, mwen menm, mwen fè sèman”, se sa Jewova di, “moun yo ap pè lè yo wè sa k rive Bozra+, yo gen pou yo pale l mal, l ap kraze nèt, y ap sèvi ak sa k rive l la pou yo bay madichon e tout vil li yo ap kraze pou toutan+.”
14 Mwen tande yon nouvèl e se Jewova ki bay nouvèl sa a.
Gen yon moun yo voye nan mitan nasyon yo pou l di yo:
“Mete tèt nou ansanm epi vin atake l.
Prepare nou pou batay la+.”
15 “Paske, tande sa! Mwen fè w pa gen okenn enpòtans nan mitan nasyon yo,
Mwen fè lèzòm meprize w+.
16 Ou te konn fè moun tranble, ou te pran tèt ou pou yon pakèt afè,
Se sa k fè kè w twonpe w,
O ou menm ki abite nan twou ki sou tèt mas wòch la,
Ou menm ki abite nan mòn ki pi wo a.
Menmsi w fè nich ou byen wo tankou yon èg,
M ap fè w desann kote w ye a.” Se sa Jewova di.
17 “Moun ap pè lè yo wè sa k rive Edòm+. Tout moun k ap pase bò kote l ap ret kanpe gade, y ap sezi, y ap pè akoz tout malè ki rive l yo. 18 Menm jan sa te ye pou Sodòm ak Gomò ak lòt vil ki te toupre vil sa yo apre m te fin detwi yo+, se konsa sa ap ye pou Edòm.” Se sa Jewova di. “Pa gen moun k ap rete la, ni pa gen moun k ap vin abite la+.
19 “Gade! Gen yon moun k ap vin atake patiraj ki an sekirite a tankou yon lyon+ ki sot nan rakbwa ki bò Rivyè Jouden an, e nan yon batje, m ap fè l* kouri lwen l. E m ap mete moun mwen chwazi a chèf sou li. Paske, kiyès ki tankou m, kiyès ki kapab ban m defi? Ki bèje ki ka kanpe devan m+? 20 Kidonk, tande sa Jewova deside k ap rive Edòm ak sa li gen nan lide l pou l fè moun ki abite Teman yo+:
Wè pa wè, y ap trennen jenn ti bèt ki nan twoupo a ale.
Akoz yo menm, l ap fè kote yo abite a rete san l pa gen moun ladan l+.
21 Tout tè a tranble lè yo tande bri li fè lè l tonbe a.
Gen yon gwo rèl ki fèt!
Moun tande rèl la jis bò Lanmè Wouj+.
22 Gade! Menm jan ak yon èg, l ap monte, l ap plonje desann+,
E l ap ouvri zèl li sou Bozra+.
Nan jou sa a, kè sòlda Edòm yo
Ap vin menm jan ak kè yon fi k ap akouche.”
23 Yon mesaj pou Damas+:
“Amat+ ak Apad vin wont,
Paske, yo tande yon move nouvèl.
Yo pèdi fòs tèlman yo pè.
Lanmè a move, li pa ka kalme.
24 Damas pèdi fòs.
Li vire pou l chape poul li, men, li panike.
Laperèz anvayi l, doulè pran l
Tankou yon fi k ap akouche.
25 Kòman fè yo pa abandone vil ki gen glwa a,
Vil ki bay kè kontan an?
26 Jou sa a, jèn gason l yo ap tonbe sou plas piblik li yo
E tout sòlda l yo ap peri.” Se sa Jewova, Chèf lame yo, di.
27 “M ap met dife nan miray Damas la,
E dife sa a ap boule fòtrès Bennadad genyen yo+.”
28 Men sa Jewova te di konsènan Keda+ ak wayòm ki Azò yo, yo menm Nebikadneza*, wa Babilòn nan, te kraze:
“Leve, monte Keda,
Epi detwi moun ki nan Lès yo.
29 Pran tant yo ak twoupo bèt yo,
Pran twal tant yo ak tout byen yo.
Pran chamo yo,
E di yo byen fò: ‘Toupatou se laperèz!’”
30 “Chape poul nou, ale byen lwen!
O nou menm ki abite Azò, ale, al kache kote ki fon yo.
Paske, Nebikadneza*, wa Babilòn nan, planifye yon bagay kont nou,
Wi, li planifye yon bagay kont nou.” Se sa Jewova di.
31 “Leve, al atake nasyon ki anpè
E ki abite an sekirite a!” Se sa Jewova di.
“Li pa gen pòtay ki gen travès ladan yo. L ap viv apa poukont li.
32 Y ap pran chamo l yo,
Y ap pran bèt li genyen an kantite yo.
Moun ki koupe cheve yo rive bò tanp yo,
M ap gaye yo nan tout direksyon*+.
M ap lage yon malè sou yo e malè sa a ap soti nan tout direksyon.” Se sa Jewova di.
33 “Azò ap tounen yon kote chen sovaj rete,
Yon kote ki pa gen moun ladan l pou toutan.
Pa gen moun k ap rete la,
Ni pa gen moun k ap vin abite ladan l.”
34 Men sa Jewova te di pwofèt Jeremi konsènan Elam+ nan epòk Sedesyas, wa Jida a+, te kòmanse dirije a: 35 “Men sa Jewova, Chèf lame yo, di: ‘M ap kraze banza* Elam nan+, m ap kraze sa k fè yo gen fòs konsa a. 36 E m ap fè kat van ki soti nan kat kwen tè a soufle nan Elam, m ap gaye moun Elam yo nan tout direksyon. Pa gen yon nasyon kote moun Elam yo pa prale.’”
37 “M ap fè laperèz anvayi moun Elam yo akoz ènmi yo, akoz moun k ap chèche touye yo*. M ap lage yon malè sou yo, m ap vide gwo kòlè m nan sou yo, e m ap lage yon epe dèyè yo jiskaske mwen fin elimine yo nèt.” Se sa Jewova di.
38 “M ap met twòn mwen nan Elam+ e m ap detwi wa ak chèf ki ladan l yo.” Se sa Jewova di.
39 “Men, nan dènye jou yo, m ap rasanble moun Elam ki prizonye yo.” Se sa Jewova di.