Ezayi
66 Men sa Jewova di:
“Syèl la se twòn mwen, e tè a se ti ban kote m met pye m+.
Ki kote menm n ap bati yon kay pou mwen+?
Epi, ki kote nou ka ban m pou m repoze+?”
2 “Se mwen menm ki fè tout bagay sa yo ak men m,
E se konsa yo tout vin egziste.” Se sa Jewova di+.
“M ap voye je gade moun ki gen imilite yo,
3 Moun k ap touye towo bèf la sanble ak yon moun ki touye moun+.
Moun k ap sakrifye mouton an sanble ak yon moun ki kase kou yon chen+.
Moun k ap fè ofrann nan sanble ak yon moun k ap ofri san kochon+.
Moun ki ofri lansan blan an+ sanble ak yon moun ki bay benediksyon ak pawòl maji*+.
Yo chak chwazi wout pa yo,
E yo pran plezi* nan bagay ki bay repiyans.
4 Se sa k fè m ap chwazi fason pou m pini yo+,
E se bagay yo pè yo menm m ap fè vin sou yo.
Paske lè m t ap rele, yo youn pa t reponn.
Lè m t ap pale, pa gen youn ki te koute m+.
Yo te kontinye fè sa ki mal devan je m,
E yo te chwazi fè sa ki pa fè m plezi+.”
5 Koute pawòl Jewova, nou menm k ap tranble devan* pawòl li:
“Frè nou yo, ki rayi nou e ki mete n deyò poutèt non m, te di: ‘Glwa pou Jewova+!’
Ebyen, Bondye ap vini e l ap fè nou gen kè kontan,
Men yo menm, l ap fè yo wont+.”
6 Gen yon eskonbrit nan vil la, yon bri nan tanp lan.
Se bri Jewova k ap bay ènmi l yo sa yo merite.
7 Anvan tranche pran Siyon, li gentan akouche+.
Anvan l gen doulè tranche, li gentan pouse yon pitit gason.
8 Kiyès ki te janm tande yon bagay konsa?
Kiyès ki te wè bagay konsa?
Èske yon peyi ap fèt nan yon sèl jou?
Oswa èske yon nasyon ap vin egziste bridsoukou?
Poutan, kou Siyon gen tranche, li fè pitit li yo.
9 Men sa Jewova di: “Èske m ap ouvri matris li, epi pou m pa kite l fè pitit la?
Oubyen èske m ap kite pitit la prèske soti, epi pou m fèmen matris li?” Se sa Bondye w la di.
10 Nou tout ki renmen Jerizalèm, se pou nou rejwi avè l+ e se pou n gen kè kontan bò kote l+.
Nou tout ki nan lapenn pou li, se pou nou kontan anpil bò kote l.
11 Paske, menm jan yon manman bay pitit li tete jiskaske vant pitit la plen, se konsa Jerizalèm pral pran swen nou.
Wi, n ap gen tout sa n bezwen e n ap kontan anpil paske li resevwa anpil glwa.
12 Paske, men sa Jewova di:
“M ap fè l gen lapè tankou dlo nan rivyè+,
E l ap jwenn glwa grasa richès nasyon yo, tankou gwo dlo k ap desann+.
N ap souse glwa nasyon yo, y ap pote nou bò ranch yo,
E y ap pran swen nou avèk tandrès sou janm yo.
13 Menm jan yon manman konsole pitit li,
Se konsa tou, m ap kontinye konsole nou+,
E Jerizalèm ap yon konsolasyon pou nou+.
14 N ap wè sa, e n ap gen kè kontan.
Zo nou ap anfòm tankou zèb ki fèk ap pouse.
Epi, sèvitè Jewova yo ap wè men* l,
Sepandan, l ap denonse ènmi l yo+.”
15 “Paske, Jewova ap vini tankou yon dife+,
E charyo l yo tankou yon van tanpèt+,
Pou l ka ba yo sa yo merite avèk gwo kòlè,
Pou l ka pini yo ak flanm dife+.
16 Paske, Jewova ap sèvi ak dife pou l bay tout moun* santans yo,
Wi, l ap fè sa ak epe l la.
E moun Jewova ap touye yo ap anpil.
17 “Moun ki prepare yo e ki pirifye tèt yo pou yo antre nan jaden yo*+, ki kanpe dèyè zidòl ki nan mitan an e k ap manje vyann kochon+ ak bagay ki bay repiyans ansanm ak sourit+ ap peri ansanm.” Se sa Jewova di. 18 “Piske m konn sa yo fè ak sa k nan panse yo, m ap vin rasanble moun nan tout nasyon, moun tout lang, e y ap vin wè glwa m.”
19 “M ap fè yon gwo aksyon kòm yon siy pou yo e m ap voye kèk nan moun ki chape yo al nan nasyon yo, nan Tasis+, Poul ak Lou+, peyi moun ki konn tire flèch yo, nan Toubal ak Javan+ ansanm ak zile ki lwen yo, yon seri nasyon ki pa tande pale de mwen oswa ki pa wè glwa m. E y ap fè nasyon yo konn glwa m+. 20 Y ap pran tout frè n yo nan tout nasyon yo+ pou yo mennen yo bay Jewova kòm kado, e y ap mennen yo sou cheval, nan charyo, nan cha ki kouvri, sou milèt e sou chamo ki rapid pou yo monte nan mòn mwen an ki sakre, anpalan de Jerizalèm, tankou lè pèp Izrayèl la ap pote ofrann nan veso ki pwòp nan kay Jewova a.” Se sa Jewova di.
21 “Epitou, m ap pran kèk nan yo pou m fè yo sèvi kòm prèt e pou m fè yo sèvi kòm Levit.” Se sa Jewova di.
22 “Paske, menm jan syèl tounèf ak tè tounèf+ m ap fè a pral ret la devan m, se konsa tou, desandan nou yo* ak non nou ap rete la.” Se sa Jewova di+.