Zakari
11 “O Liban, ouvri pòt ou yo
Pou dife ka boule pye sèd ou yo.
2 Nou menm pye jenevriye yo, se pou nou rele paske pye sèd yo tonbe.
Yo detwi gwo pyebwa yo!
Nou menm pye bwadchèn ki nan Bazan yo, se pou n rele
Paske yo detwi forè ki te chaje ak pyebwa a.
3 Koute! Men bèje yo ap rele,
Paske glwa yo te genyen an disparèt.
Koute! Men jenn lyon* yo ap gwonde,
Paske yo detwi touf bwa ki sou tout bò Rivyè Jouden an.
4 “Men sa Jewova, Bondye m nan, di: ‘Pran swen mouton yo pral touye yo+, 5 mouton moun ki te achte yo te touye+ e yo pa kondane moun yo pou sa. Epi, moun ki te vann mouton yo+ di: “Glwa pou Jewova paske m ap vin rich.” Epi, bèje yo te genyen yo pa gen okenn pitye pou yo+.’
6 “Men sa Jewova di: ‘Paske mwen pap gen pitye ankò pou moun ki ret nan peyi a. Se sa k fè m ap lage chak moun anba men moun parèy li e anba men wa k ap dirije l la. Y ap kraze peyi a, e mwen pap sove yo anba men yo.’”
7 Mwen te kòmanse pran swen twoupo mouton yo t apral touye a+. Se sa mwen te fè pou nou, nou menm k ap soufri nan twoupo a. Se sa k fè, mwen te pran de baton. Mwen te rele youn Favè, mwen te rele lòt la Tèt ansanm+, e mwen te kòmanse pran swen twoupo a. 8 Mwen te revoke twa bèje nan yon sèl mwa, paske mwen* te vin pèdi pasyans avèk yo, epitou, yo* te rayi m. 9 Apre sa, mwen te di: “Mwen pap kontinye pran swen nou. Sa k ap mouri a mèt mouri e sa k ap peri a mèt peri. Epi, sa k rete yo, se pou youn manje lòt.” 10 Apre sa, mwen te pran baton m genyen ki rele Favè a+, mwen kase l, konsa mwen kraze alyans mwen te fè ak pèp mwen an. 11 Se konsa, alyans lan te kraze jou sa a. Epi, moun ki t ap soufri nan twoupo a e ki t ap gade m yo te konnen pawòl sa a se pawòl Jewova.
12 Apre sa, mwen te di yo: “Si nou vle, nou mèt peye m. Men, si nou pa vle, nou mèt kenbe sa n t ap ban m nan.” Epi, yo te peye m 30 pyès monnen ann ajan+.
13 Epi, Jewova di m: “Kokenn pri sa a yo di mwen vo a, lage l kote yo mete trezò yo+.” Se konsa, mwen te pran 30 pyès monnen ann ajan yo e mwen te lage yo kote yo mete trezò yo nan kay Jewova a+.
14 Apre sa, mwen te kase dezyèm baton m nan, sa ki rele Tèt ansanm nan+, konsa mwen te fè Jida ak Izrayèl pa viv tankou frè ankò+.
15 Epi, Jewova te di m: “Kounye a, pran ekipman yon bèje ki pa itil+. 16 Paske, m ap fè vin gen yon bèje nan peyi a. Li pap pran swen mouton k ap peri yo+. Li pa pral chèche sa k piti yo, li pap geri sa k blese yo+, e li pap bay sa ki ka kanpe yo manje. Okontrè, l ap manje vyann sa ki gra yo+ e l ap chire zago mouton yo+.