Ezekyèl
33 Jewova pale avè m, li di m: 2 “Pitit lòm, pale ak moun nan pèp ou a+ e se pou w di yo:
“‘Ann sipoze m ta voye atake yon peyi ak epe+, e tout moun ki nan peyi sa a pran yon moun yo mete l veye peyi a. 3 Si moun sa a wè y ap vin atake peyi a e li ta sonnen kòn pou l avèti moun yo+, 4 si yon moun tande son kòn nan men li pa okipe avètisman an+, epi ènmi an vini li touye l*, moun sa a ap responsab pwòp san l+. 5 Paske, li te tande son kòn nan, men li pa t okipe avètisman an. Se li ki responsab san l. Si l te koute avètisman an, li t ap sove lavi l*.
6 “‘Sepandan, si moun k ap veye a wè y ap vin atake peyi a, men li pa sonnen kòn nan+ pou l avèti moun yo, epi ènmi an vini, li touye youn nan yo, moun sa a ap mouri pou peche l fè, men m ap mande moun k ap veye a san moun sa a*+.’
7 “Kanta pou ou, pitit lòm, mwen chwazi w pou w sèvi kòm moun k ap veye pou pèp Izrayèl la. Lè m di w yon bagay, se pou w avèti yo pou mwen+. 8 Lè mwen di yon moun ki mechan: ‘W ap mouri kanmenm+’, men ou menm ou pa di anyen pou w avèti moun ki mechan an pou l chanje fason l ap aji, l ap mouri pou peche l fè paske li mechan+, men m ap mande w san l. 9 Men, si w avèti moun ki mechan an pou l kite move chemen li pran an, men li refize chanje fason l ap aji, l ap mouri pou peche l fè+, men ou menm, se sèten w ap sove lavi w*+.
10 “Pitit lòm, men sa pou w di moun Izrayèl yo: ‘Nou di: “Zak rebelyon nou yo ak peche nou yo tankou yon chay ki lou sou do nou, se fini y ap fini ak nou+. Kòman n ap fè rete an vi+?”’ 11 Se pou w di yo: ‘“Menm jan li klè mwen vivan, mwen fè sèman, mwen pa pran plezi nan lanmò moun ki mechan+, e mwen ta pito wè yon moun ki mechan chanje fason l ap aji+ pou l ka rete an vi+. Kase tèt tounen! Kite move chemen nou pran an+! Pou ki rezon pou n ta oblije mouri, o nou menm moun Izrayèl yo+?” Se sa Jewova, Seyè ki Souvren an, di.’
12 “Kanta pou ou, pitit lòm, men sa pou w di moun ki nan pèp ou a: ‘Bon bagay moun ki jis la fè yo pap sove l si l vin ap fè sa k pa bon+, nitou move bagay mechan an t ap fè yo pap fè l peri si l sispann fè move bagay li t ap fè yo+. Okenn moun ki jis pap kontinye viv akoz bon bagay li te konn fè si l vin ap pratike peche+. 13 Lè mwen di moun ki jis la: “Se sèten w ap kontinye viv”, si l met nan tèt li bon bagay li te konn fè yo ap sove l e li tonbe fè sa k pa bon*+, mwen pap sonje okenn nan bon bagay li te konn fè yo e l ap mouri poutèt move bagay li fè yo+.
14 “‘Lè mwen di mechan an: “W ap mouri kanmenm”, si li sispann fè peche li t ap fè yo, li vin ap fè sa ki jis ak sa ki dwat+, 15 si li remèt sa yo te ba l kenbe kòm garanti+, si li remèt sa li te vòlè+, si li mache nan lwa m yo ki bay lavi e li sispann fè sa ki mal, se sèten l ap kontinye viv+. Li pap mouri. 16 Mwen pap fè l rann kont pou okenn nan peche li te konn fè yo+. Se sèten l ap kontinye viv poutèt li vin ap fè sa ki jis ak sa ki dwat+.’
17 “Men, pèp ou a di: ‘Fason Jewova aji a pa bon.’ Alòske, se fason yo menm yo aji a ki pa bon.
18 “Lè yon moun ki jis sispann fè sa ki dwat e li vin ap fè sa ki mal, l ap mouri poutèt sa+. 19 Lè yon moun ki mechan sispann fè move bagay li te konn fè yo e li vin ap fè sa ki jis ak sa ki dwat, l ap kontinye viv poutèt sa+.
20 “Men, nou di: ‘Fason Jewova aji a pa bon+.’ M ap jije nou chak selon sa nou fè, o nou menm moun Izrayèl.”
21 Nan 12yèm ane nou te ann egzil la, nan dizyèm mwa a, nan senkyèm jou nan mwa a, gen yon mesye ki te chape sot nan vil Jerizalèm ki te vin kote m+ e ki te di m: “Yo kraze vil la+.”
22 Lavèy jou mesye ki te chape a te vin kote m nan, nan aswè, pisans Jewova te desann sou mwen e li te ouvè bouch mwen anvan mesye a te vin jwenn mwen nan demen maten. Vrèmanvre, Bondye te ouvè bouch mwen, mwen te vin kapab pale ankò+.
23 Apre sa, Jewova pale avè m, li di m: 24 “Pitit lòm, men sa moun ki abite nan pil mazi sa yo+ ap di konsènan peyi Izrayèl la: ‘Abraram te poukont li, poutan l te pran peyi a+. Nou menm nou anpil, se sèten peyi a ap ret pou nou.’
25 “Kidonk, se pou w di yo: ‘Men sa Jewova, Seyè ki Souvren an, di: “Nou manje vyann avèk san ladan l+, nou leve je nou gade zidòl nou yo ki bay degoutans* e nou pa sispann fè san koule+. Ki jan pou nou ta fè gen peyi a kòm byen pa nou? 26 Se nan epe nou nou kwè+, n ap pratike yon seri bagay ki bay degoutans e nou kouche ak madanm pwochen nou+. Kòman pou nou ta fè gen peyi a kòm byen pa nou+?”’
27 “Men sa pou w di yo: ‘Men sa Jewova, Seyè ki Souvren an, di: “Menm jan li klè mwen vivan, mwen fè sèman, moun ki abite nan mazi yo ap tonbe anba kout epe, moun ki nan savann yo, m ap fè bèt sovaj manje yo e moun ki nan fòtrès yo ak nan twou wòch yo ap mouri anba maladi+. 28 M ap fè peyi a vin tankou yon dezè+, tout gwo kòlèt li t ap fè yo ap fini, e mòn Izrayèl yo ap vin vid+. Pèsonn pap pase ladan yo. 29 Lè m fè peyi a vin tankou yon dezè+ poutèt tout bagay ki bay degoutans moun yo t ap fè yo+, lè sa a y ap konnen mwen se Jewova.”’
30 “Kanta pou ou, pitit lòm, moun nan pèp ou a ap pale de ou bò mi yo ak nan papòt kay yo+. Y ap pale youn ak lòt, yo chak ap pale ak frè yo, y ap di: ‘Vini, ann al tande ki sa Jewova gen pou l di nou.’ 31 Y ap vin an foul bò kote w, y ap chita devan w antanke pèp mwen. Y ap koute pawòl ou yo, men yo pap obeyi yo+. Paske, y ap flate w ak bouch yo, men sèl sa k nan kè yo se jwenn avantaj nan move kondisyon. 32 Tande! Pou yo, ou tankou yon moun ki gen bèl vwa, ki jwe enstriman akòd byen, k ap chante yon chante ki pale sou lanmou. Y ap tande sa w ap di yo, men pèsonn pap fè sa ou di yo. 33 Lè pawòl sa yo reyalize, paske y ap reyalize kanmenm, lè sa a y ap konnen te gen yon pwofèt nan mitan yo+.”