Jij
13 Yon lòt fwa ankò, Izrayelit yo te fè sa ki mal nan je Jewova+ e Jewova te lage yo nan men moun Filisti yo+ pandan 40 an.
2 Nan epòk sa a, te gen yon mesye ki moun Sora+, ki soti nan tribi Dann+, ki te rele Manowa+. Madanm li pa t gen pitit e madanm nan pa t ka fè pitit+. 3 Yon lè, yon zanj Jewova parèt devan madanm nan e li di l: “Ou pa gen pitit e w pa ka fè pitit. Men, ou pral vin ansent e w ap fè yon pitit gason+. 4 Ou dwe veye pou w pa bwè ni diven ni okenn lòt bwason ki gen alkòl+ e w pa dwe manje anyen ki pa pwòp+. 5 Tande, ou pral vin ansent e w ap fè yon pitit gason. Ou pa dwe koupe cheve l+, paske, l ap yon Nazireyen* pou Bondye depi lè l fèt*. L ap pran latèt pou l sove pèp Izrayèl la anba men moun Filisti yo+.”
6 Apre sa, madanm nan al pale ak mari l sou sa. Men sa l te di l: “Gen yon sèvitè vrè Dye a ki te vin pale avè m. Li te sanble ak yon zanj vrè Dye a. Li te fè m pè anpil. Mwen pa t mande l ki kote l soti e li pa t di m ki jan l rele+. 7 Men, li te di m: ‘Tande, w ap vin ansent e w ap fè yon pitit gason. Ou pa dwe bwè ni diven ni okenn lòt bwason ki gen alkòl e w pa dwe manje anyen ki pa pwòp paske tigason an ap yon Nazireyen pou Bondye depi lè l fèt* pou jiskaske l mouri.’”
8 Annapre, Manowa sipliye Jewova e li di l: “Eskize m Jewova. Gen yon sèvitè w, ou menm vrè Dye a, ou fèk sot voye vin pale ak nou, tanpri, voye l kote nou ankò pou li ka di nou sa pou n fè pou timoun ki pral fèt la.” 9 Vrèmanvre, vrè Dye a koute Manowa e li fè zanj li an retounen kot madanm nan pandan li te chita nan savann nan. Manowa, mari l, pa t avè l lè sa a. 10 Lè sa a, madanm nan kouri al di mari l: “Men mesye ki te vin kote m lòt jou a vin kote m ankò+.”
11 Lè sa a, Manowa leve epi li ale ak madanm li. Lè l rive kot mesye a, li di l: “Èske se ou menm ki te pale ak madanm mwen an?” Lè sa a, mesye a di l: “Wi, se mwen.” 12 Epi, Manowa di l: “Mwen swete pou sa w te di yo reyalize! Ki jan pou nou leve timoun nan? E ki kalite travay l ap gen pou l fè+?” 13 Lè sa a, zanj Jewova a di Manowa: “Madanm ou dwe suiv tout sa m te di l yo+. 14 Li pa dwe manje anyen ki soti nan pye rezen, li pa dwe bwè ni diven ni okenn lòt bwason ki gen alkòl+ e li pa dwe manje anyen ki pa pwòp+. Se pou l suiv tout sa mwen te di l yo.”
15 Apre sa, Manowa di zanj Jewova a: “Tanpri, ret avèk nou. Kite n prepare yon ti kabrit pou ou+.” 16 Men, zanj Jewova a di Manowa: “Si m rete, mwen pap manje manje w prepare a, men, si w vle ofri Jewova yon sakrifis ki boule nèt, ou mèt ofri l li.” Manowa pa t konnen se te yon zanj Jewova. 17 Apre sa, Manowa di zanj Jewova a: “Ki jan w rele+? Nou ta renmen onore w lè sa w di yo reyalize.” 18 Men, zanj Jewova a di l: “Poukisa w vle konnen non m alòske non m se yon non ki estrawòdinè?”
19 Apre sa, Manowa pran ti kabrit la ansanm ak ofrann manje angren an e li ofri yo bay Jewova sou yon gwo wòch. E Bondye te fè yon bagay estrawòdinè pandan Manowa ak madanm li t ap gade. 20 Pandan flanm dife ki te sou lotèl la t ap monte byen wo nan syèl la, zanj Jewova a antre nan flanm dife a epi l monte nan syèl la pandan Manowa ak madanm li t ap gade. Lè yo wè sa, yo lage kò yo fas atè. 21 Se lè sa a, Manowa te rann li kont se te yon zanj Jewova+. Zanj Jewova a pa t parèt devan Manowa ak madanm li ankò. 22 Apre sa, Manowa di madanm li: “N ap mouri kach paske se Bondye nou te wè+.” 23 Men, madanm li di l: “Si Jewova te vle touye nou, li pa t ap aksepte bèt nou te ofri l kòm sakrifis nou te boule nèt la+ ak manje angren nou te ofri l la. Li pa t ap montre nou tout bagay sa yo e li pa t ap di nou tout bagay sa yo.”
24 Annapre, madanm Manowa te fè yon pitit gason e li te rele l Samson+. Jewova te kontinye beni pitit sa a pandan li t ap grandi. 25 Rive yon lè, lespri Jewova te kòmanse pouse Samson aji+ pandan l te Maanedann+, yon zòn ki ant Sora ak Echtawòl+.