Aje

1 Nan dezyèm ane rèy wa Dariyis* la, nan sizyèm mwa a, premye jou nan mwa a, men pawòl Jewova te di pwofèt Aje*+ pou l di Zowobabèl+, pitit gason Cheyaltyèl, gouvènè Jida a, ak Jozye, gran prèt la, pitit gason Jewozadak:

2 “Men sa Jewova, Chèf lame yo*, di: ‘Pèp sa a di: “Lè a poko rive pou nou bati* kay* Jewova a+.”’”

3 Epi, yon lòt fwa ankò, men pawòl Jewova te di pwofèt Aje pou l di+: 4 “Èske se moman pou nou abite nan kay nou genyen ki fèt ak bèl bwa, alòske kay pa m nan fin kraze+? 5 Kounye a, men sa mwen menm, Jewova, Chèf lame yo, di: ‘Byen reflechi* sou fason n ap aji. 6 Nou simen anpil semans, men nou pa fè gwo rekòt+. Nou manje, men vant nou pa plen. Nou bwè, men sa nou bwè a pa satisfè nou. Nou mete rad sou nou, men kò nou pa cho. Travayè a met lajan yo peye l la nan yon bous ki plen twou.’”

7 “Men sa Jewova, Chèf lame yo, di: ‘Byen reflechi* sou fason n ap aji.’

8 “‘Monte nan mòn nan pou n al chèche bwa+. Epi, bati kay mwen an+ pou l ka fè m plezi e pou m ka jwenn glwa+.’ Se sa Jewova di.”

9 “Men sa Jewova, Chèf lame yo, di: ‘Nou t ap tann anpil bagay, men se yon tikras nou jwenn. E lè nou te pote sa nou jwenn nan lakay nou, mwen te gaye l ak souf mwen+. Pou ki rezon m te fè sa? Se paske kay mwen an fin kraze, alòske nou chak okipe ap pran swen kay pa nou+. 10 Se sa k fè syèl la ki sou tèt nou an te sispann bay lawouze e tè a te sispann bay rannman. 11 Epi, mwen te kontinye lage sechrès sou tè a, sou mòn yo, sou manje angren yo, sou bon diven yo, sou luil yo, sou sa tè a bay, sou moun yo, sou twoupo bèt yo e sou tout travay nou fè ak men nou.’”

12 Zowobabèl+, pitit gason Cheyaltyèl la+, ak Jozye, gran prèt la, pitit gason Jewozadak+ la, ansanm ak tout rès pèp la te koute vwa Jewova, Bondye yo a, e yo te koute pawòl pwofèt Aje te di yo, paske se Jewova, Bondye yo a, ki te voye l, e pèp la te kòmanse gen lakrentif pou Jewova.

13 Apre sa, men mesaj Aje, mesaje Jewova te voye a, te bay pèp la ann amoni ak misyon Jewova te ba li a: “‘Mwen avèk nou+.’ Se sa Jewova di.”

14 Se konsa, Jewova te chofe+ Zowobabèl, pitit gason Cheyaltyèl la, gouvènè Jida a+, ak Jozye, gran prèt la, pitit gason Jewozadak la, ansanm ak tout rès pèp la. Epi, yo te vini e yo te kòmanse rebati kay Jewova a, li menm ki Chèf lame yo, Bondye yo a+. 15 Sa te rive nan 24^yèm jou nan sizyèm mwa a, nan dezyèm ane rèy wa Dariyis la+.