Jij
11 Jefte+, moun Galaad, te yon sòlda vanyan. Se te pitit gason yon pwostitye, e papa l te rele Galaad. 2 Men, madanm Galaad te fè pitit gason pou Galaad tou. Lè pitit gason madanm li yo te vin gran, yo te mete Jefte deyò e yo te di l: “Ou pap eritye okenn nan byen papa nou yo, paske w se pitit yon lòt fi.” 3 Se konsa, Jefte t al lwen frè l yo e li t al abite nan peyi Tòb. Gen yon seri mesye ki pa t gen travay ki t al jwenn Jefte e yo te konn suiv li lè l pral fè kèk atak.
4 Apre yon tan, desandan Amon yo t al fè lagè ak Izrayelit yo+. 5 Lè yo atake Izrayelit yo, ansyen nan Galaad yo kouri al chèche Jefte nan peyi Tòb. 6 Yo di Jefte: “Vini pou w kapab chèf nou, pou nou ka batay ak desandan Amon yo.” 7 Men, Jefte di yo: “Èske se pa nou menm ki te tèlman rayi m nou te mete m deyò lakay papa m nan+? Kòman fè nou vin kote m kounye a lè nou nan pwoblèm?” 8 Epi, ansyen nan Galaad yo di l: “Se pou rezon sa a menm nou vin kote w kounye a. Si w vin avèk nou pou w al batay ak desandan Amon yo, w ap vin chèf sou tout moun ki Galaad yo+.” 9 Lè sa a, Jefte di ansyen nan Galaad yo: “Si nou fè m tounen pou m batay ak desandan Amon yo e si Jewova fè m bat yo, m ap dakò vin chèf nou.” 10 Ansyen nan Galaad yo di Jefte: “Se pou Jewova sèvi nou temwen e se pou l jije nou si nou pa fè tout sa w di yo.” 11 Vrèmanvre, Jefte ale ak ansyen nan Galaad yo, e pèp la fè l vin chèf yo. Jefte te repete tout pawòl li te di yo devan Jewova nan Mispa+.
12 Annapre, Jefte voye moun al pote yon mesaj bay wa desandan Amon yo+. Li voye di l: “Sa w gen avè m ki fè w vin atake peyi m nan?” 13 Men sa wa desandan Amon yo di moun Jefte te voye yo: “Mwen vin goumen avè w paske pèp Izrayèl la te pran yon pati nan tèritwa peyi m nan+, soti Anon+ rive Jabòk e rive jis nan Rivyè Jouden an+, lè yo te sot ann Ejip la. Kounye a, se pou w remèt mwen li san bri san kont.” 14 Men, Jefte voye moun yo tounen kot wa desandan Amon yo 15 pou y al di l:
“Men sa Jefte di: ‘Pèp Izrayèl la pa t pran okenn pati nan tèritwa moun Mowab yo+ ak tèritwa desandan Amon yo+. 16 Paske, lè yo te sot ann Ejip la, yo te mache nan dezè a, jis nan Lanmè Wouj+. Annapre, yo te rive Kadès+. 17 Lè sa a, pèp Izrayèl la te voye kèk moun pote mesaj bay wa Edòm nan+, yo te di l: “Tanpri, kite nou pase nan peyi w la.” Men, wa Edòm nan pa t kite yo pase. Yo te voye di wa Mowab la+ menm bagay la, men li menm tou, li pa t dakò. Se sa k fè pèp Izrayèl la te kontinye rete Kadès+. 18 Lè yo t ap mache nan dezè a, yo te pase akote peyi Edòm+ ak peyi Mowab. Yo te pase alès peyi Mowab+ e yo te tabli kan yo nan zòn Anon. Yo pa t antre nan peyi Mowab paske Anon se te limit peyi Mowab+.
19 “‘Apre sa, pèp Izrayèl la te voye kèk moun pote yon mesaj bay Siyon, wa Amorit yo, ki t ap dirije nan Esbon, e yo te di l: “Tanpri, kite nou pase nan peyi w la pou n al nan peyi pa nou an+.” 20 Men, Siyon pa t kite pèp Izrayèl la pase nan peyi l la paske l pa t fè yo konfyans. Li te rasanble tout pèp li a e li te tabli kan l Jahaz pou l goumen ak pèp Izrayèl la+. 21 Lè sa a, Jewova, Bondye Izrayèl la, te lage Siyon ak tout pèp li a nan men Izrayèl. Se sa k fè pèp Izrayèl la te bat yo e yo te pran peyi a nan men Amorit yo ki te rete nan zòn sa a+. 22 Yo te pran tout tèritwa Amorit yo, soti Anon rive Jabòk e soti nan dezè a rive nan Rivyè Jouden an+.
23 “‘Se Jewova, Bondye Izrayèl la, ki te mete Amorit yo deyò devan pèp Izrayèl la+ e kounye a, nou menm nou vle mete pèp Izrayèl la deyò? 24 Èske nou pa posede tout sa Kemòch+, dye nou an, ban nou? Menm jan an tou, se moun Jewova, Bondye nou an, vle mete deyò devan nou yo n ap met deyò+. 25 Èske nou pi bon pase Balak+, pitit gason Zipò a, wa Mowab la? Èske l te janm lite ak pèp Izrayèl la, oubyen èske l te janm fè lagè avèk yo? 26 Lè pèp Izrayèl te rete Esbon ak nan ti vil ki sou kont li yo*+, lè l te rete Awoyè ak nan ti vil ki sou kont li yo e lè l te rete nan tout vil ki arebò Rivyè Anon an pandan 300 an, poukisa nou pa t janm chèche repran tèritwa sa yo lè sa a+? 27 Mwen pa fè n anyen ki mal, e nou pa gen rezon atake m. Jodi a, se Jewova, Jij la+, ki pou jije, se li ki konnen si se pèp Izrayèl la oubyen si se desandan Amon yo ki gen rezon.’”
28 Men, wa desandan Amon yo pa t vle koute sa Jefte te voye di l la.
29 Lespri Jewova vin sou Jefte+ e Jefte pase nan Galaad ak nan Manase, l al Mispe ki nan Galaad. Apre sa, li sot Mispe ki nan Galaad+ e li kontinye l al nan peyi desandan Amon yo.
30 Lè sa a, Jefte fè Jewova yon ve+, li di l: “Si w lage desandan Amon yo nan men m, 31 kèlkeswa moun ki soti nan pòt lakay mwen pou l vin rankontre m lè m retounen sennesòf sot nan peyi desandan Amon yo, moun sa a ap pou Jewova+, e m ap ofri moun sa a tankou se te yon sakrifis yo boule nèt+.”
32 Vrèmanvre, Jefte al goumen ak desandan Amon yo e Jewova lage yo nan men l. 33 Jefte touye anpil nan yo soti Awoyè rive jis Minit, 20 vil antou, epi rive jis Abèlkeramim. Vrèmanvre, anpil moun te mouri. Se konsa Bondye te lage desandan Amon yo nan men Izrayelit yo.
34 Annapre, Jefte retounen lakay li nan Mispa+, epi, pitit fi l la soti vin rankontre l toutpandan l ap danse e l ap bat yon tanbouren. Se sèl pitit sa a li te genyen. Li pa t gen okenn lòt pitit, ni pitit gason, ni pitit fi. 35 Lè l wè l, li chire rad sou li e li di: “O non, pitit fi m nan! Kè m ap dechire*, paske se ou menm m ap voye ale. Mwen fè Jewova yon ve e mwen pa kapab fè bak+.”
36 Men, li di l: “Papa, si w te fè Jewova yon pwomès, se pou w fè m sa w te di ou t ap fè m nan+, paske, Jewova te fè w tire revanj sou ènmi w yo, desandan Amon yo.” 37 Apre sa, li di papa l: “Men sa pou w fè pou mwen: Kite m rete poukont mwen pandan de mwa, kite m al nan mòn yo ansanm ak medam ki zanmi m yo pou m kriye poutèt m ap rete vyèj*.”
38 Lè sa a, li di: “Ou mèt ale!” Vrèmanvre, li kite l ale pou de mwa. Konsa, demwazèl la t al pase de mwa nan mòn yo ansanm ak zanmi l yo pou l te ka kriye poutèt l ap rete vyèj. 39 Apre de mwa a, li retounen al jwenn papa l. Lè sa a, papa l te fè sa l te di li t ap fè l la+. Demwazèl la pa t janm gen relasyon ak okenn gason. E men koutim ki te vin gen ann Izrayèl: 40 Chak ane, pandan kat jou nan ane a, ti medam nan peyi Izrayèl yo te konn al felisite pitit fi Jefte a, moun Galaad la.