Ezayi
7 Twouve, nan epòk Ahaz+, pitit gason Jotam, pitit gason Ozyas, wa peyi Jida, Rezin, wa peyi Siri, ansanm ak Peka+, wa peyi Izrayèl, pitit gason Remalya a, te monte vin fè lagè ak moun Jerizalèm yo, men yo* pa t ka pran peyi a+. 2 Gen moun ki te vin bay moun lakay David yo yon nouvèl, yo te di yo: “Siri met ansanm ak lame Efrayim nan*.”
Epi, kè wa Ahaz ak kè pèp la t ap bat, yo te pran tranble kou fèy bwa van ap souke nan yon forè.
3 Apre sa, Jewova di Ezayi: “Tanpri, soti al rankontre Ahaz, ou menm ansanm ak Cheyajachoub*+, pitit gason w lan, nan dènye bout kanal ki sot nan basen ki anwo a+, bò wout ki mennen nan teren mesye ki konn fè lesiv la. 4 Men sa pou w di l: ‘Ou pa bezwen bay tèt ou pwoblèm. Ou pa bezwen pè, e pinga w pèdi fòs poutèt de chouk bwa sa yo k ap boule, akoz Rezin, wa peyi Siri a, ak pitit gason Remalya a an kòlè anpil+. 5 Paske, Siri ak Efrayim fè konplo ak pitit gason Remalya a pou yo fè w mal. Yo di: 6 “Ann monte al fè lagè ak Jida, ann al dechire l* e ann al mache pran l*. Annou met pitit gason Tabeyèl la wa sou li+.”
7 “‘Men sa Jewova, Seyè ki Souvren an, di:
“Sa pap mache
E sa pap fèt.
8 Paske tèt Siri se Damas,
E tèt Damas se Rezin.
Nan 65 an sèlman,
Efrayim ap kraze nèt e li pap yon pèp ankò+.
9 Tèt Efrayim se Samari+,
E tèt Samari se pitit gason Remalya a+.
Si w pa gen yon lafwa ki djanm,
Ou pap an sekirite.”’”
10 Jewova kontinye pale ak Ahaz, li di l: 11 “Mande m, mwen menm, Jewova, Bondye w la+, pou m ba w yon siy, yon siy ki fon tankou Tonm nan* oswa ki wo tankou syèl la.” 12 Men, Ahaz di: “Mwen pap mande anyen, e mwen pap pase Jewova anba eprèv.”
13 Lè sa a, Ezayi di: “Tanpri, koute, nou menm moun lakay David. Èske sa pa ase pou n ap fè moun pèdi pasyans? Èske nou dèyè fè Bondye pèdi pasyans tou+? 14 Se sa k fè, men yon siy Jewova menm ap ba ou: Gade! Jèn fi a ap vin ansent, l ap fè yon pitit gason+ e l ap rele l Emànyèl*+. 15 Distans pou tigason an konn jan pou l evite sa ki mal e pou l chwazi sa ki byen, l ap manje bè e l ap bwè siwo myèl. 16 Paske anvan l konn ki jan pou l evite sa ki mal e pou l chwazi sa ki byen, peyi toule de wa sa yo ou pè anpil yo pap gen yon moun ladan yo+. 17 Jewova ap fè ou menm ak pèp ou a ansanm ak moun lakay papa w yo viv yon tan nou pa t janm viv depi lè Efrayim te separe ak Jida+, paske l ap voye wa Asiri a vin atake nou+.
18 “Jou sa a, Jewova pral soufle pou l rele mouch k ap soti byen lwen nan tout branch Rivyè Nil la nan peyi Ejip e l ap rele myèl ki nan peyi Asiri yo. 19 Yo tout ap vini, y ap poze nan vale yo, nan fant wòch yo, sou tout ti touf pikan ak tout kote ki byen wouze yo.
20 “Jou sa a, Jewova ap sèvi ak razwa Ahaz te lwe nan zòn Rivyè a*, l ap sèvi ak wa Asiri a+ pou l kale tèt peyi Jida, pou l retire plim nan pye l, e razwa a ap fè bab li tou.
21 “Jou sa a, yon moun ap sove yon jenn manman bèf ak de mouton nan twoupo bèt li yo. 22 E piske ap gen anpil lèt, l ap manje bè, paske tout moun ki rete nan peyi a se bè ak siwo myèl sèlman y ap gen kòm manje.
23 “Jou sa a, kote ki te konn gen 1 000 pye rezen ki te koute 1 000 pyès ann ajan, se pikan ak move zèb sèlman k ap genyen. 24 Mesye yo prale nan peyi sa a avèk banza*, avèk flèch, paske tout peyi a ap vin chaje pikan ak move zèb. 25 Epi, ou pa pral pre okenn mòn yo te konn netwaye ak wou, paske w ap pè pikan ak move zèb yo, y ap tounen yon kote pou yo mennen towo bèf al manje ak yon kote pou yo lage mouton.”