Ezayi
38 Nan epòk sa a, Ezekyas te vin malad e li te prèske mouri+. Pwofèt Ezayi+, pitit gason Amòz la, te vin kote l e li di l: “Men sa Jewova voye di w: ‘Fè moun lakay ou konnen sa pou yo fè, paske w ap mouri. Ou pap refè+.’” 2 Lè Ezekyas tande sa, li vire fas li bay mi kay la e li pran priye Jewova. Li di l: 3 “O Jewova, mwen sipliye w, tanpri+, sonje jan m te mache devan w ak fidelite e ak tout kè m+. Mwen te fè sa ki byen nan je w.” Epi, Ezekyas tonbe kriye.
4 Apre sa, Jewova pale ak Ezayi. Li di l: 5 “Tounen kot Ezekyas+, e men sa pou w di l: ‘Jewova, Bondye David, zansèt ou a, voye di w: “Mwen tande priyè w la+. Mwen wè dlo ki nan je w+. M ap ajoute 15 an sou lavi w+ 6 e m ap delivre ni ou menm ni vil sa a anba men wa Asiri a. M ap defann vil sa a+. 7 Men siy Jewova bay pou montre w Jewova ap fè sa l di a+: 8 Pandan solèy la ap desann, m ap fè lonbray ki sou mach eskalye* Ahaz la fè bak sou dis mach+.”’” Vrèmanvre, solèy la te fè bak sou dis mach li te gentan desann yo.
9 Men sa Ezekyas, wa Jida a, te ekri lè l te malad e li te leve anba maladi l la.
10 Mwen te di: “Nan mwatye lavi m,
Fò m antre nan pòtay Tonm nan*.
M ap pèdi rès ane m ret pou m viv yo.”
11 Mwen te di: “Mwen pap wè Ja* ankò, mwen pap wè Ja nan peyi moun ki vivan yo+.
Mwen pap wè okenn moun ankò
Lè m ansanm ak moun ki rete kote tout bagay fini an.
12 Kote m rete a tankou tant yon bèje,
Yo rache l epi y al avè l+.
Mwen vlope lavi m tankou yon twal moun ki konn fè twal yo fin fè e yo vlope l.
L ap kase m tankou fil l ap retire nan yon kad yo konn fè twal.
Soti maten rive aswè, ou kontinye fini avè m+.
13 Mwen rete dousman jis demen maten.
Menm jan ak yon lyon, Bondye kontinye kraze tout zo m.
Soti maten rive aswè, ou kontinye fini avè m+.
14 Mwen kontinye rele tankou yon pipirit oswa yon wosiyòl+,
Mwen kontinye plenn tankou pijon+.
Je m bouke ret ap gade anwo+.
Mwen di: ‘O Jewova, m ap soufri anpil.
Ede m+!’
15 Ki sa pou m di?
Li pale avè m e li aji.
M ap mache byen trankil pandan tout lavi m
Paske m ap soufri anpil*.
16 Mwen te di: ‘O Jewova, se bagay sa yo* ki fè moun viv
E se nan yo fòs lavi m ye.
W ap fè m refè e w ap fè m kontinye viv+.
17 Gade! Olye m te jwenn lapè, se nan gwo soufrans mwen te ye.
Men, paske w renmen m*,
Ou pa t kite m ale nan twou kote moun fini an+.
18 Paske, Tonm nan* pa ka ba w glwa+,
Lanmò pa ka fè louwanj pou ou+.
Moun ki desann nan twou a pa ka gen espwa nan fidelite w+.
19 Se moun ki vivan, wi, se moun ki vivan ki kapab fè louwanj pou ou,
Tankou jan m ap fè sa jodi a.
Yon papa ka aprann pitit li jan w fidèl+.
20 O Jewova, sove m,
E n ap chante chante m yo avèk enstriman ki gen kòd+
Pandan tout lavi nou nan kay ou a, o Jewova+.’”
21 Apre sa, Ezayi di: “Pote fig frans yo seche e yo byen peze ansanm yo, epi mete yo sou gwo bouton an pou wa a ka refè+.” 22 Lè sa a, Ezekyas mande: “Ki siy k ap fè m konnen m ap monte al nan kay Jewova a+?”