Ezayi
63 Kiyès sa a k ap sot Edòm nan+,
K ap sot Bozra+ ak rad li byen klere*,
Sila a ki gen bèl rad
E k ap mache ak tout fòs li?
“Se mwen menm, Sila a k ap pale sa ki dwat la,
Sila a ki gen anpil pouvwa pou l sove moun nan.”
2 Poukisa rad ou wouj konsa?
Poukisa rad ou tankou rad moun k ap kraze rezen ak pye yo nan près diven+?
3 “Mwen kraze yo anba pye m poukont mwen tankou rezen ki nan basen yo konn fè diven.
Pa gen okenn moun nan pèp yo ki te avè m.
Mwen te kontinye kraze yo ak kòlè.
Piske m te an kòlè anpil, mwen te kontinye pilonnen yo anba pye m+.
San yo te vole sou rad mwen,
E mwen te tache tout rad mwen.
4 Paske, mwen chwazi yon jou pou m fè vanjans+,
E ane pou moun mwen yo delivre a rive.
5 Mwen te gade, men mwen pa t wè okenn moun pou vin ede m.
Sa te fè m mal dèske okenn moun pa t vin ede m.
Se sa k fè, se bra m ki te fè m pot laviktwa+,
E se kòlè m ki te ede m.
6 Mwen te pilonnen pèp yo anba pye m, tèlman m te an kòlè.
Mwen te fè yo sou ak kòlè m+,
E mwen te vide san yo atè.”
7 M ap fè konnen aksyon Jewova fè ki montre lanmou fidèl li genyen.
M ap fè louwanj pou Jewova pou aksyon li fè yo,
Pou tout sa Jewova fè pou nou+,
Tout bon bagay li fè pou moun Izrayèl yo,
Paske, li gen mizèrikòd, li gen anpil lanmou.
8 Paske li te di: “Vrèmanvre, yo se pèp mwen, yo se yon seri pitit k ap ret fidèl*+.”
Se sa k fè li te vin yon Sovè pou yo+.
9 Pandan tout tan yo t ap soufri a, sa te fè l soufri+.
Se mesaje pa l* ki te sove yo+.
Grasa lanmou ak pitye li genyen, li te fè yo sot ann egzil+,
Li te leve yo anlè e li te pote yo pandan tout tan ki te pase yo+.
10 Men, yo te fè rebèl+ e yo te fè lespri sen l lapenn+.
Lè sa a, li te vin tounen ènmi yo+
E li te fè lagè ak yo+.
11 Yo te sonje tan lontan yo,
Epòk Moyiz, sèvitè l la, e yo te di:
“Kote Sila a ki te fè pèp li a pase lanmè a+ ansanm ak bèje pèp li a+?
Kote Sila a ki te met lespri sen l sou Moyiz la*+,
12 Sila a ki te sèvi ak ponyèt li ki gen fòs pou l dirije men dwat Moyiz+,
Sila a ki te fann dlo yo devan yo+,
Pou l fè moun pale de non l pou toutan+,
13 Sila a ki te fè yo pase nan mitan gwo dlo*,
Pou l fè yo mache san yo pa bite,
Tankou yon cheval ki nan yon savann*?
14 Menm jan yon twoupo bèt desann nan yon plèn pou y al pran repo,
Lespri Jewova fè yo jwenn repo+.”
Se konsa ou te dirije pèp ou a,
15 Detan w nan syèl la, kote w rete ki wo e ki sen an e kote ki gen glwa a*,
Gade anba pou w wè.
Kote devouman ak pisans ou te genyen yo?
Epi, kote tout konpasyon*+ ak mizèrikòd ou te genyen yo+?
Ou pa itilize yo pou w ede m ankò.
16 Paske, ou se Papa nou+.
Byenke Abraram ka pa konnen nou
E Izrayèl ka pa rekonèt nou,
Ou menm, o Jewova, ou se Papa nou.
17 O Jewova, poukisa w kite* nou ale lwen wout ou yo?
Poukisa w kite* kè nou vin di jiskaske nou vin pa gen lakrentif pou ou+?
Retounen, poutèt sèvitè w yo,
Poutèt tribi ou genyen yo+.
18 Pèp ou a ki sen te gen peyi a kòm byen pa yo pou yon ti tan.
Advèsè nou yo pilonnen tanp ou an+.
19 Nou te pase twòp tan tankou moun ou pa t janm ap dirije,
Tankou moun ki pa t janm pote non w.