Jeremi

51 Men sa Jewova di:

“M ap fè yon gwo van soufle

Sou Babilòn e sou moun ki abite Lebkamayi* yo pou m detwi yo+.

 2 M ap voye moun al vannen Babilòn.

Y ap vannen l e y ap fè peyi a rete vid.

Lè jou malè a rive, y ap atake l nan tout direksyon+.

 3 Se pou moun ki konn manyen* banza* yo pa sèvi ak banza yo,

E se pou moun ki gen jile ki gen ti plak an metal yo pa leve kanpe.

Pinga nou gen okenn pitye pou jèn gason l yo+.

Se pou nou detwi tout lame l la.

 4 Kadav yo ap tonbe nan peyi moun Kalde yo.

Y ap pèse yo nan tout lari l yo+.

 5 Paske, Jewova, Chèf lame yo, Bondye Izrayèl ak Jida a, pa abandone Izrayèl ak Jida+. Yo pa tankou fi ki pèdi mari yo.

Men, pou Bondye Izrayèl la, Bondye ki sen an, peyi moun Kalde yo chaje ak peche.

 6 Retire kò nou nan mitan Babilòn,

Chape pou nou sove lavi* nou+.

Nou pa dwe mouri poutèt peche l fè yo.

Paske, lè a rive pou Jewova tire revanj sou li.

L ap fè l peye pou sa l fè+.

 7 Babilòn te yon koup annò nan men Jewova,

E li te lakòz tout tè a vin sou.

Tout nasyon yo te bwè nan diven l lan+.

Se sa k fè yo pèdi tèt yo konsa+.

 8 Babilòn rete konsa li tonbe e li kraze+.

Rele pou li+,

Al chèche luil santi bon pou doulè l genyen an. Petèt l a geri.”

 9 “Nou te eseye geri Babilòn, men li pa t ka geri.

Ann kite l, ann ale, annou chak tounen nan peyi nou+.

Paske, bagay li fè ki fè l merite pou yo jije l yo rive jis nan syèl la.

Yo rive byen wo, jis nan nyaj yo+.

10 Jewova fè nou jwenn jistis+.

Vini, ann rakonte tout sa Jewova, Bondye nou an, fè nan Siyon+.”

11 “File flèch yo+, pran boukliye won yo*.

Jewova chofe wa Medi yo pou yo aji+,

Paske li gen entansyon fini ak Babilòn.

Se konsa Jewova ap tire revanj sou li, se konsa l ap tire revanj pou tanp li an.

12 Mete yon siy* kanpe+ pou moun ki pral atake miray Babilòn yo.

Bay gad yo fòs, mete moun k ap veye yo nan pozisyon yo.

Prepare moun k ap tann anbiskad yo.

Paske, Jewova gen yon plan,

L ap reyalize sa l pwomèt l ap fè moun k ap viv Babilòn yo+.”

13 “O ou menm fi ki abite sou yon pakèt dlo+

E ki gen anpil trezò+,

Lafen an rive pou ou, w ap sispann fè benefis+.

14 Jewova, Chèf lame yo, fè sèman, li di:

‘M ap plen w ak gason, y ap anpil tankou krikèt,

E y ap rele ak kè kontan poutèt yo gen laviktwa sou ou+.’

15 Bondye se Sila a ki fè tè a grasa fòs li,

Se li ki tabli tè a grasa sajès li+,

E ki ouvri syèl la tankou yon dra grasa bon konprann li+.

16 Lè l fè tande vwa l,

Dlo ki nan syèl la pran fè bri,

E li fè nyaj* soti nan dènye bout tè a monte nan syèl la.

Li fè kout zèklè flache nan* lapli,

E li fè van soti nan depo l yo+.

17 Pa gen yon moun ki aji yon fason ki rezonab e ki aji yon fason ki montre yo gen konesans.

Tout moun k ap travay metal yo gen pou yo wont akoz zidòl yo fè yo+.

Paske, zidòl yo fè* yo pa vo anyen

E yo pa gen lavi* nan yo+.

18 Yo pa vo anyen+, yo merite pou moun pase yo nan rizib.

Lè jou a rive pou Bondye regle ak yo, y ap disparèt.

19 Bondye Jakòb la li menm pa tankou bagay sa yo,

Paske, se li menm ki bay tout bagay fòm,

E li se baton eritaj li a*+.

Non l se Jewova, Chèf lame yo+.”

20 “Ou se yon baton pou m fè lagè, yon zam pou m fè lagè,

Paske m ap sèvi avè w pou m kraze nasyon yo.

M ap sèvi avè w pou m kraze wayòm yo.

21 M ap sèvi avè w pou m kraze cheval la ak moun ki sou li a.

M ap sèvi avè w pou m kraze charyo pou fè lagè a ak moun k ap kondui l la.

22 M ap sèvi avè w pou m kraze ni gason ni fi.

M ap sèvi avè w pou m kraze ni granmoun ni timoun.

M ap sèvi avè w pou m kraze ni jèn gason ni jèn fi.

23 M ap sèvi avè w pou m kraze ni bèje ni twoupo bèt yo genyen yo.

M ap sèvi avè w pou m kraze ni kiltivatè ni bèt yo genyen pou yo vire tè.

M ap sèvi avè w pou m kraze ni gouvènè yo ni lòt chèf yo.

24 M ap fè ni Babilòn ni tout moun ki abite Kalde yo peye

Pou tout sa ki mal yo te fè devan je nou nan Siyon+.” Se sa Jewova di.

25 “O ou menm mòn ki t ap mache kraze brize a, ou menm ki t ap mache detwi tout tè a+,

Mwen leve kont ou+.” Se sa Jewova di.

“M ap lonje men m pou m frape w, m ap fè w degrengole desann sot sou mas wòch yo,

E m ap fè w tounen yon mòn ki kankannen.”

26 “Pèsonn pap pran yon wòch ki nan kwen ou genyen oswa yon wòch fondasyon nan ou,

Paske w ap vin tankou yon dezè pou toutan+.” Se sa Jewova di.

27 “Mete yon siy* kanpe nan peyi a+.

Sonnen yon kòn nan mitan nasyon yo.

Fè nasyon yo leve kont li.

Voye rele ni moun ki nan wayòm Arara a+, ni moun ki nan wayòm Mini an, ni moun ki nan wayòm Achkenaz la+ pou yo atake l.

Bay yon sòlda djòb pou l fè rekritman pou lame ki pral atake l la.

Se pou cheval k ap vin atake l yo tankou yon lame krikèt.

28 Fè nasyon yo leve kont li,

Wi, wa peyi Medi yo+, gouvènè ak lòt chèf ki nan peyi sa a

Ansanm ak tout moun ki nan tout peyi y ap dirije yo.

29 Tè a gen pou l souke, li gen pou l tranble,

Paske sa Jewova gen nan lide l pou l fè Babilòn nan ap reyalize.

L ap fè peyi Babilòn tounen yon kote ki fè moun pè, yon kote ki pap gen okenn moun abite ladan l+.

30 Sòlda Babilòn yo sispann goumen.

Yo chita nan fòtrès yo.

Yo pa gen fòs ankò+.

Yo vin tankou fi+.

Ènmi yo met dife nan kay li yo,

E yo kraze travès ki nan pòtay li yo+.

31 Mesaje vini youn apre lòt,

Wi, moun kouri vini youn apre lòt pou yo bay wa Babilòn nan mesaj,

Pou yo fè l konnen se tout kote yo pran vil li a+,

32 Yo pran pas dlo yo+,

Yo met dife nan bato ki fèt ak wozo yo,

E laperèz anvayi sòlda yo.”

“Babilòn tankou yon kote yo konn bat manje angren.

Lè a rive pou yo danmen l byen danmen.

Talè konsa, lè a ap rive pou yo rekòlte sa k ladan l.”

34 “Nebikadneza*, wa Babilòn nan, devore m+,

Li lage m nan konfizyon,

Li fè m vin tankou yon veso vid,

Li vale m tankou yon gwo koulèv+,

Li plen vant li ak tout bon bagay mwen genyen yo,

E li lave m.

35 ‘Menm jan Babilòn te fè vyolans sou mwen an, se konsa pou yo fè vyolans sou li tou!’ Se sa moun ki abite Siyon an di+.

‘Se pou moun Kalde yo responsab san m.’ Se sa Jerizalèm di.”

36 Kidonk, men sa Jewova di:

“M ap plede kòz ou+,

M ap tire revanj pou ou+,

M ap seche lanmè l la e m ap seche pi l yo+.

37 Babilòn ap tounen yon pil wòch+,

Yon kote chen sovaj rete+,

Yon kote ki fè moun pè, yon kote ki fè moun sezi

E ki pa gen moun rete ladan l+.

38 Yo tout ap gwonde tankou jenn lyon*,

Y ap gwonde tankou ti lyon.”

39 “Lè anvi pou yo manje a vin fò lakay yo, m ap met yon pakèt manje devan yo e m ap fè yo sou

Pou yo ka kontan anpil+.

Apre sa, y ap dòmi nètale.

Yo pap janm leve nan dòmi sa a+.” Se sa Jewova di.

40 “M ap desann avèk yo tankou ti mouton y ap mennen labatwa,

Wi, tankou mal mouton ak kabrit.”

41 “Gade jan yo pran Chechak*+!

Gade jan yo pran vil tout moun sou latè te konn fè lwanj pou li a+!

Gade jan Babilòn tounen yon kote ki fè tout nasyon yo pè!

42 Lanmè a monte e li kouvri Babilòn,

Wi, lanmè a kouvri l ak tout lanm li yo.

43 Vil li yo fè moun pè lè yo wè yo, yo tounen kote ki pa gen dlo, yo vin tankou dezè.

Peyi a tounen yon kote moun pap abite, yon kote moun pap pase+.

44 M ap regle ak Bèl+ nan peyi Babilòn.

M ap retire sa li te vale a nan bouch li+.

Moun pap soti nan nasyon yo ankò pou yo vin nan pye l.

Miray Babilòn nan ap tonbe+.

45 Soti nan mitan l, pèp mwen an+!

Chape poul nou pou nou ka sove lavi* nou+, pou gwo kòlè Jewova a pa tonbe sou nou+!

46 Pinga nou dekouraje e pinga nou pè lè nou tande nouvèl nou gen pou nou tande nan peyi a.

Nan yon ane, n ap tande yon nouvèl,

E nan ane apre a n ap tande yon lòt nouvèl.

N ap tande pale de vyolans nan peyi a, e n ap tande pale de dirijan k ap leve kont lòt dirijan.

47 Kidonk, tande sa! Gen jou k ap vini

Kote mwen pral regle ak zidòl Babilòn yo.

Lawont ap tonbe sou tout peyi a,

E tout moun yo touye ladan l yo ap tonbe nan mitan l+.

48 Syèl la ak tè a ak tout sa ki ladan yo

Ap rele ak kè kontan lè Babilòn tonbe+.

Moun k ap vin detwi l yo ap soti nan direksyon nò pou yo vin atake l+.” Se sa Jewova di.

49 “Nonsèlman Babilòn te lakòz moun Izrayèl mouri+,

Men tou, moun sou tout tè a mouri nan Babilòn.

50 Nou menm ki te chape anba kout epe yo, kontinye ale, pa ret kanpe+!

Se pou nou sonje Jewova detan nou byen lwen an.

Se pou nou sonje Jerizalèm+.”

51 “Lawont tonbe sou nou, paske, nou te tande moun ki t ap di move pawòl.

Lawont te fè nou bouche figi nou.

Paske, etranje yo te antre nan kote sakre yo, nan kay Jewova a+.”

52 “Kidonk, tande sa! Gen jou k ap vini”, se sa Jewova di,

“Kote m ap regle ak zidòl li yo,

E moun ki blese ap plenn tout kote nan peyi a+.”

53 “Menmsi Babilòn ta monte nan syèl la+,

Menmsi li ta fòtifye fòtrès li genyen ki byen wo yo,

M ap voye moun pou detwi l+.” Se sa Jewova di.

54 “Tande sa! Gen yon gwo rèl nan Babilòn+,

Gen bri gwo destriksyon k ap fèt nan peyi moun Kalde yo+,

55 Paske Jewova ap detwi Babilòn.

L ap fè l sispann fè bri ak gwo vwa l la.

Bri moun k ap vin atake l yo ap fè a ap tankou bri lanm lanmè.

Moun ap tande bri vwa moun sa yo.

56 Sila a k ap fè destriksyon an ap vin Babilòn+.

Y ap pran sòlda Babilòn yo kòm prizonye+.

Y ap kraze banza yo.

Paske, Jewova se yon Dye ki konn fè vanjans+.

Li pap manke pa tire revanj sou li+.

57 M ap fè chèf li yo ak moun save l yo sou+,

Ni gouvènè l yo, ni lòt chèf li yo, ni sòlda l yo.

Y ap dòmi nètale,

Yo pap janm leve nan dòmi sa a+.” Se sa Wa a di, Sila a ki rele Jewova, Chèf lame yo.

58 Men sa Jewova, Chèf lame yo, di:

“Malgre miray Babilòn nan pwès anpil, y ap kraze l nèt+.

Malgre pòtay li yo wo, y ap boule yo.

Moun yo travay di pou granmesi.

Nasyon yo fatige kò yo, men se dife k ap boule sa yo fè yo+.”