Malachi
1 Men mesaj Bondye bay:
Men pawòl Jewova te di Malachi* pou l di pèp Izrayèl la:
2 Jewova di: “Mwen te demontre m gen lanmou pou nou+.”
Men, nou menm, nou di: “Ki jan w te demontre w gen lanmou pou nou an?”
Men sa Jewova di: “Èske Ezaou se pa t frè Jakòb+? Epoutan, mwen te renmen Jakòb, 3 men mwen te rayi Ezaou+. Mwen te fè mòn li yo vin dezole+ e mwen te fè eritaj li a vin tounen yon kote pou chen sovaj yo k ap viv nan dezè rete+.”
4 “Byenke Edòm* di: ‘Yo kraze nou, men n ap retounen e n ap rebati kote ki kraze yo’, men sa mwen menm, Jewova, Chèf lame yo, di: ‘Y ap bati, m ap kraze, e moun ap rele zòn sa a “tèritwa kote moun ap fè sa ki mal” e y ap rele moun yo “pèp Jewova kondane pou toutan an+”. 5 N ap wè sa ak pwòp je nou, epi n ap di: “Se pou yo bay Jewova glwa nan tout tèritwa Izrayèl la!”’”
6 “Men sa Jewova, Chèf lame yo, di nou, nou menm prèt ki pa respekte non l yo+: ‘Yon pitit onore papa l+ e yon sèvitè onore mèt li. Bon, si m se yon papa+, kote onè nou dwe ban mwen an+? E si m se yon mèt*, kote lakrentif* nou dwe gen pou mwen an?’
“‘Men, nou menm, nou di: “Ki jan nou pa respekte non w lan?”’
7 “‘Se lè nou ofri manje* ki pa bon sou lotèl mwen an.’
“‘Epi, nou di: “Ki jan nou sal repitasyon w lan?”’
“‘Se lè nou di: “Tab Jewova a+ se yon bagay ki merite pou moun meprize l.” 8 Epi, lè nou bay yon bèt ki avèg kòm sakrifis, nou di: “Pa gen anyen ki mal nan sa.” E lè nou bay yon bèt ki domaje nan pye oswa yon bèt ki malad, nou di: “Pa gen anyen ki mal nan sa+.”’”
“Tanpri, eseye pote l bay moun k ap gouvène nou an. Èske l ap kontan avèk nou? Èske l ap byen resevwa nou?” Se sa Jewova, Chèf lame yo, di.
9 “Kounye a, tanpri, annou sipliye Bondye pou l ka fè nou favè. Lè nou bay kalite ofrann sa yo, èske l ap byen resevwa nou?” Se sa Jewova, Chèf lame yo, di.
10 “Epi, kiyès nan nou ki dispoze fèmen pòt tanp lan*+? Paske nou pap menm limen dife sou lotèl mwen an san yo pa peye nou+. Nou pa fè m plezi, e pa gen yon ofrann nou bay ki fè m plezi+.” Se sa Jewova, Chèf lame yo, di.
11 “Paske, depi kote solèy la leve rive jis kote l kouche*, nasyon yo pral bay non m anpil valè+. Toupatou, moun yo pral fè sakrifis pou fè lafimen monte e y ap fè ofrann pou non m, y ap ban m yon kado ki pwòp, paske nasyon yo pral bay non m anpil valè+.” Se sa Jewova, Chèf lame yo, di.
12 “Men, nou menm, nou sal non m*+ lè nou di: ‘Tab Jewova a pa pwòp, ofrann ak manje ki sou li yo se bagay ki merite pou moun meprize yo+.’ 13 Epitou, nou di: ‘Bagay sa yo se kòve!’ E nou twouse nen nou pou n montre sa ban nou repiyans.” Se sa Jewova, Chèf lame yo, di. “Epi, nou vin ak bèt moun vòlè, bèt ki domaje nan pye ak bèt ki malad. Wi, se mòd bagay sa yo nou pote kòm ofrann. Èske m ka aksepte yo nan men nou+?” Se sa Jewova di.
14 Men sa Jewova, Chèf lame yo, di: “Malediksyon pou moun ki mètdam ki gen yon bèt ki anfòm nan twoupo l, yon mal, men ki fè yon ve e ki fè sakrifis pou Jewova ak yon bèt ki pa anfòm*. Paske, mwen se yon gran Wa+, e nasyon yo pral gen lakrentif pou non m+.”