Ezekyèl
31 Nan 11yèm ane a, nan twazyèm mwa a, nan premye jou nan mwa a, Jewova pale avè m yon lòt fwa ankò, li di m: 2 “Pitit lòm, men sa pou w di Farawon, wa Ejip la, ansanm ak bann moun ki avè l yo+:
‘Ak kiyès glwa w genyen an fè w sanble?
3 Te gen yon Asiryen, yon pye sèd nan peyi Liban,
Ki te gen bèl branch ki chaje ak fèy, ki bay lonbray e ki te byen wo.
Tèt li te rive jis nan nyaj yo.
4 Te gen dlo ki te fè l grandi pou l vin yon gwo pyebwa. Dlo ki soti byen fon yo te fè l vin byen wo.
Te gen dlo toutotou kote yo te plante l la.
Kanal dlo yo te wouze tout pyebwa ki nan savann nan.
5 Se sa k fè li te vin pi wo pase tout lòt pyebwa ki gen nan savann nan.
Gwo branch li yo te vin anpil e yo te vin byen long
Akoz tout dlo ki t ap wouze l yo.
6 Tout zwazo nan syèl la te vin fè nich nan gwo branch li yo.
Tout bèt nan bwa te konn met ba anba branch li yo.
Tout nasyon ki te chaje moun yo te abite anba lonbray li.
7 Li te vin bèl anpil e branch li yo te vin long anpil,
Paske rasin li yo te desann kote ki gen anpil dlo.
8 Pa t gen okenn lòt pye sèd nan jaden Bondye a+ ki te ka konpare ak li.
Pa gen youn nan pye jenevriye yo ki te gen gwo branch menm jan avè l.
Pa t gen okenn pye platàn* ki te gen branch menm jan avè l.
Pa t gen okenn lòt pyebwa nan jaden Bondye a ki te bèl tankou l.
9 Se mwen menm ki te fè l bèl e ki te fè l gen anpil fèy.
Tout lòt pyebwa nan jaden Edenn nan, jaden vrè Dye a, te anvye l.’
10 “Kidonk, men sa Jewova, Seyè ki Souvren an, di: ‘Kòm li* te vin wo anpil, tèt li te rive jis nan nyaj yo e li te vin gen ògèy nan kè l akoz wotè l, 11 m ap lage l nan men moun ki gen anpil pisans k ap dirije nasyon yo+. Li pap manke pa aji kont li. M ap rejte l poutèt li mechan. 12 Yon bann etranje, moun ki pi mechan nan mitan nasyon yo, ap koupe l, y ap kite l sou mòn yo, fèy li yo ap tonbe nan tout vale yo, e branch li yo ki kase ap nan tout rivyè ki nan peyi a+. Tout pèp ki sou tè a ap soti anba lonbray li, y ap abandone l. 13 Tout zwazo nan syèl la ap vin rete sou twon pyebwa a ki tonbe a, e tout bèt nan bwa yo ap vin rete nan branch li yo+. 14 Sa ap rive yon fason pou okenn pyebwa ki bò dlo pa grandi wo konsa oswa pou yo pa fè tèt yo rive jis nan nyaj yo e pou okenn pyebwa ki byen wouze pa chèche rive wotè sa a. Paske, si yo fè sa, yo tout ap mouri, y ap desann anba tè ansanm ak tout moun k ap desann nan twou a*.’
15 “Men sa Jewova, Seyè ki Souvren an, di: ‘Jou l ap desann nan Tonm nan*, m ap fè moun gen lapenn. Se sa k fè m ap bouche tout dlo ki soti byen fon yo, m ap bare dlo yo pou tout dlo yo pa koule. Poutèt li menm, m ap fè Liban vin tou nwa, e tout pyebwa ki nan savann yo ap fennen. 16 M ap fè nasyon yo tranble lè yo tande bri l ap fè lè l ap tonbe a, lè m ap fè l desann nan Tonm nan* ansanm ak tout moun k ap desann nan twou a*. Tout pyebwa ki nan jaden Edenn nan+, pi bon pyebwa ki nan Liban yo, tout pyebwa ki byen wouze yo, ap jwenn rekonfò lè yo desann anba tè. 17 Yo desann nan Tonm* avè l. Y al menm kote ak moun yo touye ak epe yo+ ansanm ak moun nan mitan nasyon yo ki t ap soutni l yo e ki t ap viv anba lonbray li yo+.’
18 “‘Kiyès nan pyebwa ki nan jaden Edenn nan ki te gen glwa e ki te bèl menm jan avè w+? Men, wè pa wè, w ap desann anba tè ansanm ak pyebwa ki nan jaden Edenn nan. W ap kouche nan mitan moun ki pa sikonsi yo, moun yo te touye ak epe yo. Se sa k ap rive Farawon ak tout moun li yo.’ Se sa Jewova, Seyè ki Souvren an, di.”