Entwodiksyon

Chè lektè :

“ Vin suiv mwen. ” ​(Mak 10:21). Anfèt, avèk pawòl sa yo, Jezi Kris envite nou suiv li. Èske w aksepte envitasyon l lan ? Si w fè sa, sa ap gen yon gwo enfliyans sou vi w. Sa k fè sa ?

Jewova te voye sèl Pitit Gason li fè a sou tè a pou l bay vi l kòm ranson (Jan 3:16). Nonsèlman Pitit Gason sa a te mouri pou nou, men tou, li te montre nou fason pou nou viv. Nan tout sa l te fè, li te kenbe entegrite l e li te fè kè Papa l kontan. Epitou, Jezi te montre nou ki jan pou nou imite Papa l. Pawòl ak aksyon Pitit Gason an te reflete chemen ak volonte Papa a pafètman. — Jan 14:9.

Bib la di Jezi se “ yon modèl pou nou, pou nou ka suiv tras li fidèlman ”. (1 Pyè 2:21.) Si nou vle vin pi pwòch Jewova, si nou vle pou lavi nou ki gen yon vrè sans depi kounye a, e si nou vle rete sou wout lavi etènèl la, nou dwe suiv tras Kris fidèlman.

Pou nou kòmanse vwayaj sa a, nou bezwen byen konnen fason Jezi te viv sou tè a. Kidonk, li enpòtan pou nou etidye avèk swen deskripsyon Jezi ki konsève nan Bib la. Lè nou medite sou sa Jezi te di e sou sa l te fè, e lè nou reflechi sou jan nou ka imite l nan pawòl nou ak nan aksyon nou, sa ap ede nou pi byen wè fason pou nou suiv li.

Nou swete pou liv sa a ede w ogmante lanmou w pou Jezi e pou Jewova. E nou swete pou lanmou sa a pouse w suiv tras Jezi fidèlman, yon fason pou w ka fè kè Jewova kontan kounye a e pou toutan.