Yon tifi retounen ap viv ankò!

Jayiris wè Jezi geri dam ki te gen san ki t ap koule sou li a. Se sèten, Jezi ka ede pitit fi l la tou, men pou li menm ‘lè konsa, pitit fi l la dwe gentan mouri’. (Matye 9:18.) Èske yo ka toujou ede pitit fi l la?

Pandan Jezi kontinye pale ak dam nan, gen kèk mesye ki sot nan kay Jayiris la epi yo di Jayiris: “Pitit fi w la mouri!” Apre sa yo di l: “Poukisa w bezwen kontinye deranje Anseyan an?” — Mak 5:35.

Nouvèl sa a se yon kout kouto pou Jayiris! Imajine sa: Kounye a, mesye sa a moun respekte anpil nan zòn kote l ap viv la pèdi tout espwa nèt lè l aprann pitit fi l la mouri. Sepandan, Jezi tande sa yo di a. Se sa k fè li vire gade Jayiris, e li di l pawòl ankourajan sa a: “Ou pa bezwen pè, annik demontre w gen lafwa.” — Mak 5:36.

Apre sa, Jezi akonpaye Jayiris k ap retounen lakay li. Lè yo rive, yo jwenn moun k ap kriye e k ap rele. Gen yon gwo foul moun ki rasanble, yo t ap frape lestomak yo tèlman yo nan lapenn. Lè Jezi antre nan kay la, li di yon bagay ki fè moun sezi: “Tipitit la pa mouri, se dòmi l ap dòmi.” ​(Mak 5:39). Lè moun yo tande sa, yo tonbe ri Jezi, paske yo konnen tifi a mouri toutbonvre. Sepandan, Jezi sèvi ak pouvwa Bondye ba li pou l montre li posib pou moun mouri leve sot nan lanmò menm jan yo ka reveye yon moun ki nan fon somèy.

Kounye a, Jezi fè tout moun sot deyò, eksepte Pyè, Jak, Jan ansanm ak manman ak papa tifi ki mouri a. Apre sa, li fè senk moun sa yo vin avèk li kote tifi a kouche a. Jezi pran men tifi a, li di: “‘Talita koumi’, sa ki vle di: ‘Tifi, mwen di w: “Leve!”’” ​(Mak 5:41). Menm kote a, tifi a leve, e li kòmanse mache! Imajine jan Jayiris ak madanm li te kontan anpil lè yo wè sa! Pou Jezi montre tifi a retounen ap viv toutbon, Jezi mande pou yo ba l yon bagay pou l manje.

Nan mirak Jezi te fè anvan yo, li te bay moun li te geri yo lòd pou yo pa ap mache fè konnen sa l sot fè pou yo, e se menm lòd sa a li bay paran tifi a tou. Men, malgre sa, paran tifi a ki kontan anpil ansanm ak lòt moun ankò gaye nouvèl la “nan tout zòn nan”. (Matye 9:26.) Si w ta wè youn nan moun ou renmen anpil yo leve sot nan lanmò, èske w pa t ap kontan fè moun konn sa? Se dezyèm rezirèksyon Jezi fè nou jwenn nan Bib la.