KESYON LEKTÈ YO POZE

Li pa enpòtan pou n ap plede bay tèt nou pwoblèm nan chèche konnen ki kote yon moun ki eskominye ta dwe chita nan Sal Wayòm nan. Piblikasyon nou yo bay paran kretyen yo bonjan ankourajman sou fason yo kapab ede pitit yo nan domèn espirityèl toutpandan timoun nan eskominye e l kontinye ap viv nan menm kay ak yo lè gen yon rezon valab pou sa. Jan sa parèt nan Toudegad 15 novanm 1988, nan paj 19 ak 20 (anglè), paran yo kapab menm etidye Labib ak pitit yo ki poko gen 18 an, ki eskominye e ki kontinye ap viv ansanm avèk yo nan espwa timoun nan ap jwenn ankourajman li bezwen pou l chanje move konduit li genyen ana.

Anrapò ak kesyon ki kote yon moun ki eskominye ta dwe chita nan Sal wayòm nan, sanble li rezonab pou yon timoun ki minè e ki eskominye, chita byen trankil ansanm ak paran l. Etandone yon moun ki eskominye pa oblije chita dèyè nèt nan Sal la, pa gen anyen mal pou timoun nan chita bò kot paran l kèlkeswa kote yo chita nan Sal la. Piske paran yo ta renmen pou pitit yo retounen vin gen yon bon relasyon ak Jewova, san mank, y ap asire yo timoun nan byen pwofite reyinyon yo. Y ap rive fè sa si yo fè timoun nan chita ansanm avèk yo olye pou yo kite l chita yon kote yo pap ka voye je sou li.

E si timoun ki eskominye a pap viv ak paran l, èske li ka toujou chita ansanm avèk yo? Depi lontan, piblikasyon nou yo montre byen klè tout sa yon kretyen dwe fè konsènan relasyon l kapab genyen ak yon moun nan fanmi l ki eskominye ki pap viv nan menm kay ak lib. Sepandan, gen yon gwo diferans ant lè yon moun ki eskominye chita ansanm ak manm fanmi l pandan reyinyon yo ak lè manm fanmi an ap chèche pran kontak ak moun sa a san okenn rezon valab. Si moun ki fidèl nan fanmi an byen konpòte yo anvè moun ki eskominye a e si yo fè tout sa yo kapab pou yo suiv konsèy ki nan Ekriti yo anrapò ak relasyon yo ak moun nan, pa ta dwe gen okenn rezon pou n ap bay tèt nou pwoblèm. — 1 Kor. 5:11, 13; 2 Jan 11.

Kit yon moun ki eskominye chita bò kote yon manm fanmi l nan kongregasyon an, kit li chita bò kote nenpòt lòt moun, depi l byen konpòte l, nou pa ta dwe bay tèt nou pwoblèm pou sa. Selon sikonstans yo, si nou ta entèdi yon moun chita kèlkeswa kote ki fè l plezi, sa ta ka bay pwoblèm. Si moun ki vin asiste reyinyon yo, san wete manm fanmi moun ki eskominye a k ap sèvi Jewova fidèlman, ap fè tout sa yo kapab pou yo respekte prensip biblik yo, e si sa pap fè lòt moun trebiche, nou pa bezwen ap bay tèt nou pwoblèm nan chèche konnen ki kote yon moun ki eskominye ta dwe chita pandan reyinyon yoc.