Anpil moun ap chape lè lafen an — Ou ka pami yo

Bib la fè nou konnen lafen an ap gen destriksyon ladan l. Li di: “Pral gen yon gwo tribilasyon, yon tribilasyon ki potko janm rive depi monn nan egziste pou jiska prezan [...]. An reyalite, si yo pa t retire nan jou sa yo, pa gen moun ki t ap sove.” ​(Matye 24:21, 22). Men Bib la fè nou konnen gen anpil moun k ap sove tou. Li di: “Monn nan ap pase [...], men moun ki fè volonte Bondye ap rete pou toutan.” — 1 Jan 2:17.

Ki sa w dwe fè si w ta renmen sove lè monn sa a ap pase a yon fason pou w ka “rete pou toutan”? Èske w ta dwe kòmanse sere anpil pwovizyon oubyen èske gen lòt preparasyon fizik ou ta dwe fè? Non. Bib la ankouraje n anpil pou nou etabli lòt priyorite. Men sa nou li: “Piske tout bagay sa yo gen pou yo fonn konsa, reflechi sou jan de moun nou dwe ye: nou dwe gen yon konduit ki sen e nou dwe montre nan aksyon nou nou gen atachman pou Bondye, pandan n ap tann jou Jewova a e pandan nou toujou kenbe l nan lespri nou.” ​(2 Pyè 3:10-12). Kontèks la montre nou “tout bagay sa yo” ki dwe fonn nan gen ladan l moun k ap dirije sistèm politik ki nan monn sa a ki kòwonpi ak tout moun ki chwazi dominasyon moun sa yo olye yo chwazi dominasyon Bondye a. Li klè, si nou ta chwazi sere byen materyèl, yo pap ka sove nou nan yon destriksyon konsa.

Vrèmanvre, pou nou chape sa mande pou n renmen Jewova, pou n aprann konnen ki kalite konduit nou dwe genyen pou n fè l plezi epi ki kalite aksyon nou dwe fè pou l kontan (Sefànya 2:3). Olye nou suiv pifò moun jodi a ki pa pran an konsiderasyon prèv klè ki montre n ap viv nan yon moman enpòtan konsa, nou dwe ‘toujou kenbe jou Jewova a nan lespri nou’. Temwen Jewova yo ka sèvi ak Bib la pou yo montre w sa w dwe fè pou w ka chape nan jou sa a k ap vini an.