Leson 13

Kouman pou w jwenn vrè relijyon an ?

Èske Bondye dakò ak tout relijyon oswa ak yon sèl ? (1)

Poukisa gen bann relijyon sa yo ki pretann yo kretyen ? (2)

Ki jan w ka rekonèt vrè kretyen yo ? (3-7)

1. Jezi te etabli yon sèl vrè relijyon kretyen. Konsa jodi a dwe gen yon sèl kò oubyen yon sèl gwoup vrè adoratè Jewova Dye (Jan 4:23, 24 ; Efezyen 4:4, 5). Bib la fè konnen se sèlman yon ti gwoup moun ki nan chemen etwat k ap mennen nan lavi a. — Matye 7:13, 14.

2. Bib la te anonse fo ansèyman ak pratik ki pa kretyen ta antre apre lanmò apòt yo dousman dousman nan kongregasyon kretyen an. Gen moun ki ta rale kwayan yo vin swiv yo olye pou yo swiv Kris (Matye 7:15, 21-23 ; Travay 20:29, 30). Se sa k fè nou wè bann relijyon depaman sa yo ki pretann yo kretyen. Kouman pou nou fè rekonèt vrè kretyen yo ?

3. Pi gwo mak vrè kretyen yo se gen lanmou toutbon antre yo (Jan 13:34, 35). Yo pa aprann yo panse yo plis pase moun lòt ras oswa moun lòt koulè. Nitou yo pa aprann yo rayi moun lòt peyi (Travay 10:34, 35). Se sa k fè yo pa patisipe nan lagè. Vrè kretyen yo gen konsiderasyon youn pou lòt kòm frè ak sè. — 1 Jan 4:20, 21.

4. Yon lòt mak vrè relijyon an se dèske manm li yo gen gwo respè pou Bib la. Yo asepte l kòm Pawòl Bondye e yo kwè nan sa l di (Jan 17:17 ; 2 Timote 3:16, 17). Pou yo Pawòl Bondye a pi enpòtan pase lide oswa koutim lèzòm (Matye 15:1-3, 7-9). Yo fè efò chak jou pou lavi yo pa depaman ak sa Bib la di. Donk, yo pa preche yon bagay alòske y ap pratike yon lòt. — Tit 1:15, 16.

5. Vrè relijyon an dwe onore non Bondye tou (Matye 6:9). Jezi te fè lòt moun konnen non Bondye a Jewova. Vrè kretyen yo dwe fè menm bagay (Jan 17:6, 26 ; Women 10:13, 14). Ki moun nan katye w la k ap pale ak lòt moun de non Bondye ?

6. Vrè kretyen yo dwe preche Wayòm Bondye a. Se konsa Jezi te fè. Li te toujou ap pale de Wayòm nan (Lik 8:1). Li te bay disip li yo lòd pou yo preche menm mesaj sa a sou tout tè a (Matye 24:14 ; 28:19, 20). Vrè kretyen yo kwè se Wayòm Bondye a senpman ki pral pote lapè toutbon ak sekirite toutbon sou tè sa a. — Sòm 146:3-5.

7. Disip Jezi yo pa dwe fè pati monn mechan sa a (Jan 17:16). Yo pa chèche antre ni nan zafè politik ni nan polemik sosyal monn nan. Yo evite kondwit, pratik ak vis nwizib kouran nan monn nan (Jak 1:27 ; 4:4). Èske w ka rekonèt yon gwoupman relijye nan katye w la ki gen mak vrè krisyanis la ?

[Foto nan paj 26, 27]

Vrè kretyen yo gen lanmou youn pou lòt, yo gen respè pou Bib la e yo preche Wayòm Bondye a.