W ap jwenn byenfè lè w etidye

ÈSKE W konn wè moun k ap chwazi fwi y ap achte? Anpil ladan yo egzamine koulè fwi yo ak gwosè yo pou yo konnen si yo mi. Genyen ki pran sant fwi yo. Gen lòt ki manyen yo oswa ki menm peze yo. Gen lòt ankò ki pran pwa fwi yo, yo kenbe youn nan chak men pou yo ka wè kiyès ladan yo ki gen plis ji. Ki sa k nan tèt moun sa yo? Y ap egzamine detay sou fwi yo, y ap chèche wè ki diferans ki genyen ant fwi yo, yo sonje chwa yo te fè anvan sa, e y ap konpare sa yo wè kounye a ak sa yo konnen sou fwi yo. Byenfè y ap jwenn lefètke yo te pran tan pou yo chwazi fwi yo, sèke yo pral manje yon seri fwi ki byen gou.

Natirèlman, byenfè yon moun jwenn nan etidye Pawòl Bondye a gen plis enpòtans toujou. Lè nou bay etid Pawòl Bondye a yon plas enpòtan nan lavi nou, lafwa nou vin pi solid, nou vin gen plis lanmou pou Jewova e pou pwochen nou, nou vin jwenn pi bon rezilta nan travay predikasyon an e nou montre nou gen plis disènman ak plis sajès ki soti nan Bondye nan desizyon n ap pran yo. Anrapò ak etid sa a ki fè nou jwenn anpil byenfè, men sa Pwovèb 3:15 di: “Pa gen okenn lòt plezi ou jwenn ki ka parèt devan l.” Èske w jwenn byenfè sa yo? Fason w etidye ka jwe yon wòl nan sa. — Kol. 1:9, 10.

Sa sa vle di etidye? Etidye ale pi lwen pase yon senp lekti. Li mande pou w sèvi ak kapasite mantal ou yo pou w egzamine yon sijè avèk swen e afon. Li mande pou w analize sa w li a, pou w konpare l ak sa w konnen deja e pou w note rezon ki fè yo di sa w ap li a. Lè w ap etidye, pran tan pou w byen reflechi sou nenpòt ide yo bay ki kapab nouvo pou ou. Anplis, chèche wè ki jan ou ka aplike pèsonèlman konsèy ou jwenn nan Ekriti yo plis toujou. Antanke Temwen Jewova, l ap bon tou pou w reflechi sou okazyon kote w ka itilize sa w ap etidye a pou w ede lòt moun. Pa gen dout nan sa, etidye mache ak meditasyon.

Lè w ap prepare w pou w etidye, ou konn pran yon seri bagay tankou bib ou, lòt piblikasyon ou prevwa itilize, yon kreyon oswa yon plim, e petèt yon kaye. Men, èske w konn prepare kè w tou? Labib di nou Ezra “te prepare kè l pou l fouye nan lwa Jewova a, pou l mete l an pratik e pou l anseye dekrè ak jistis ann Izrayèl”. (Ezra 7:10.) Ki sa pou w fè pou w prepare kè w?

Lapriyè ede nou gen yon bon atitid lè nou pral etidye Pawòl Bondye a. Nou vle pou kè nou, sètadi moun nou ye pa anndan an, dispoze resevwa enstriksyon Jewova ap ban nou. Chak fwa ou pral kòmanse etidye, mande Jewova pou l ba w lespri sen l pou ede w (Lik 11:13). Mande l pou l ede w konprann sans sa w pral etidye a, pou w wè relasyon sa genyen ak objektif li, fason sa kapab ede w fè diferans ant sa ki byen ak sa ki mal, fason w dwe aplike prensip li yo nan lavi w e pou l ede w wè jan sa w ap etidye a gen yon enfliyans sou relasyon w genyen avèk li (Pwo. 9:10). Pandan w ap etidye a, “kontinye mande Bondye” pou l ba w sajès (Jak 1:5). Sèvi ak sa w aprann yo pou w egzamine tèt ou onètman toutpandan w ap chèche èd Jewova pou l kapab ede w rejte panse ki pa kòrèk ak move dezi. Toujou di Jewova mèsi pou bagay li ede w konprann yo (Sòm 147:7). Lè w priye lè w ap etidye, sa ap fè w vin gen yon relasyon sere sere ak Jewova, paske sa ap ede w obeyi sa Jewova di nan Pawòl li a. — Sòm 145:18.

Lefètke sèvitè Jewova yo byen dispoze resevwa enstriksyon Jewova bay, sa fè yon diferans ant yo menm ak moun ki nan monn nan. Yon tandans ki gaye pami moun ki pa gen atachman pou Bondye yo sèke yo gen dout sou sa Pawòl Bondye a di e yo pa vle aksepte sa ki ekri ladan l. Men nou menm, nou pa gen atitid sa a. Nou mete konfyans nou nan Jewova (Pwo. 3:5-7). Si nou pa konprann yon bagay nan Pawòl Bondye a, nou pa kite ògèy fè nou met nan tèt nou dwe gen yon erè ladan l. Toutpandan n ap fouye pou nou jwenn repons kesyon nou yo, nou ret tann Jewova (Mika 7:7). Menm jan ak Ezra, nou gen objektif pou nou aplike sa nou aprann yo e pou nou anseye lòt moun yo. Piske nou gen dezi sa a nan kè nou, sa ap fè nou jwenn anpil byenfè nan etid nou fè.

Olye pou w annik kòmanse etid la avèk paragraf 1 e pou w kontinye pou jis ou rive nan fen etid la, toudabò, chèche gen yon ide jeneral sou tout atik la oswa sou tout chapit w ap etidye a. Kòmanse analize mo ki gen nan tit atik la oswa chapit la. Tit sa a se tèm sa w pral etidye a. Ansuit, byen egzamine rapò soutit yo genyen avèk tèm nan. Egzamine tout foto, tout tablo oswa tout kare ki gen nan atik oswa chapit w ap etidye a. Mande tèt ou: ‘Selon ide jeneral mwen genyen an, ki sa m atann mwen pral aprann nan atik sa a oswa nan chapit sa a? Nan ki sans sa ap itil mwen?’ Si w fè tou sa, sa ap gide w nan etid ou pral fè a.

Kounye a, kòmanse egzamine enfòmasyon yo. Nan atik etid Toudegad yo ak nan kèk lòt liv, gen kesyon yo tou prepare pou paragraf yo. Li bon pou w souliye repons kesyon sa yo lè w ap li paragraf yo. Menmsi pa gen kesyon ki tou prepare pou atik w ap etidye a, ou ka toujou souliye ide enpòtan ou vle sonje yo. Si gen yon ide ki nouvo pou ou, pran yon ti tan anplis pou w egzamine l pou w ka sèten ou konprann li byen. Chèche egzanp oswa rezònman k ap itil ou nan predikasyon oswa ou kapab mete nan yon diskou w ap genyen. Reflechi sou kèk moun an patikilye ou kapab fòtifye lafwa yo si w pataje sa w te etidye a avèk yo. Ekri pwen ou vle itilize yo, epi fè revizyon sou yo lè w fin etidye.

Tank w ap egzamine sa w ap etidye a, chèche vèsè yo bay kòm referans yo. Analize pou w wè rapò ki genyen ant chak vèsè ak ide prensipal paragraf la.

Ou ka jwenn pwen ou pa konprann tousuit oswa pwen ou bezwen fè plis rechèch sou yo. Olye w kite yo detounen atansyon w sou sa w ap etidye a, note yo pou w ka egzamine yo annapre. Souvan yo konn vin esplike yo nan rès atik la oswa nan rès chapit w ap egzamine a. Si yo pa fè sa, ou ka fè lòt rechèch. Ki bagay ou ka note pou w fè rechèch sou yo? Petèt se yon vèsè yo site ou pa fin byen konprann. Oswa ou ka pa wè tousuit rapò vèsè sa a genyen ak sijè w ap egzamine a. Petèt ou santi w konprann yon ide, men ou santi w pa konprann li ase pou w esplike yon lòt moun li. Olye pou w annik pase sou sa, li ka saj pou w fè rechèch apre w fin etidye sa w ap etidye a.

Nan lèt apot Pòl te ekri voye bay kretyen ebre yo, yon lèt ki gen anpil enfòmasyon ladan l, li te fè yon ti poz nan mitan lèt la pou l di yo: “Men sa ki pi enpòtan nan sa n ap di la a.” ​(Ebre 8:1). Detanzantan, èske w pran yon ti tan pou w eseye sonje sa ki enpòtan nan sa w ap egzamine a? Annou egzamine rezon ki fè Pòl te fè sa. Nan lèt enspire l la, nan chapit ki vin anvan yo, li te gentan montre Kris, Gran Prèt Bondye chwazi a, te antre nan syèl la (Ebre 4:14–5:10; 6:20). Sepandan, lefètke Pòl te mete aksan sou pwen prensipal sa a nan kòmansman chapit 8 la, li te prepare lespri moun k ap li lèt sa a pou yo reflechi an pwofondè sou rapò pwen sa a genyen ak lavi yo. Li te atire atansyon yo sou yon pwen, sèke Kris te parèt devan Bondye pou yo e li te ouvri chemen pou yo menm yo kapab antre nan “Trèsen an”, nan syèl la (Ebre 9:24; 10:19-22). Asirans sa a yo te genyen an konsènan esperans yo a t ap ede yo aplike konsèy Pòl t apral ba yo pi devan nan lèt sa a konsènan lafwa, andirans ak konduit yo dwe genyen antanke kretyen. Menm jan an tou, lè n ap etidye, si nou konsantre nou sou pwen enpòtan yo, sa ap ede nou konprann fason yo devlope tèm nan e sa ap grave nan lespri nou bonjan rezon nou genyen pou nou aji ann amoni ak sa nou aprann nan.

Èske etid pèsonèl ou fè ap pouse w aji? Sa se yon pwen enpòtan. Lè w fin aprann yon bagay, mande tèt ou: ‘Ki efè sa ta dwe genyen sou atitid mwen e sou objektif mwen gen nan lavi a? Ki jan mwen ka aplike l pou m rezoud yon pwoblèm, pou m pran yon desizyon oswa pou m atenn yon objektif mwen fikse? Ki jan m ka sèvi avè l pou m ede fanmi m? Ki jan m ka sèvi avè l nan predikasyon ak nan kongregasyon an?’ Egzamine kesyon sa yo, priye sou sa, e reflechi sou sitiyasyon ou konn rankontre nan lavi a kote w ka aplike sa w aprann nan.

Apre w fin etidye yon chapit oswa yon atik, pran tan pou w fè yon ti revizyon. Gade si w kapab sonje pwen enpòtan yo ak esplikasyon ki kore pwen sa yo. Sa ap ede w sonje sa w aprann nan e w ap ka itilize l alavni.

Antanke moun ki fè pati pèp Jewova a, nou gen anpil bagay pou nou etidye. Men, ak ki sa pou nou kòmanse? Chak jou, li bon pou nou etidye tèks pou jounen an ak kòmantè yo fè sou tèks la nan bwochi Ann egzamine Ekriti yo chak jou a. Chak semèn, nou gen reyinyon nan kongregasyon an pou nou asiste, lè nou prepare reyinyon sa yo, sa ap ede nou jwenn plis byenfè. Anplis de sa, gen moun ki pran tan pou yo etidye kèk nan piblikasyon nou yo ki te parèt anvan yo te aprann laverite, e se yon bon bagay yo fè. Gen lòt ki chwazi kèk vèsè nan pòsyon lekti Labib nou gen pou nou fè pou semèn nan e ki fè plis rechèch sou vèsè sa yo.

Bon, e si sitiyasyon w pa pèmèt ou byen etidye tout enfòmasyon yo pral egzamine nan reyinyon kongregasyon an pou semèn nan? Evite tonbe nan pyèj pou w annik rabache enfòmasyon yo bay pou w egzamine yo, oswa sa ki t ap pi mal toujou, pou w pa etidye ditou poutèt ou wè w pap ka etidye tout. Olye de sa, chèche wè ki kantite ou ka etidye e fè sa byen. Fè sa chak semèn. Avèk letan, bat pou w prepare rès reyinyon yo tou.

Jewova konnen chèf fanmi yo dwe travay di pou yo bay manm fanmi yo sa yo bezwen. Men sa nou li nan Pwovèb 24:27: “Prepare travay ou deyò, epi mete jaden w anfòm.” Men, ou pa dwe neglije bezwen fanmi w genyen nan domèn espirityèl. Labib montre nou chèf fanmi yo dwe “dirije pitit yo ak kay yo yon fason ki kòrèk”. (1 Tim. 3:5, 12.) Ki jan chèf fanmi yo ka fè sa? Men sa Pwovèb 24:3 di: “Grasa disènman, y ap tabli [yon fanmi] fèm.”

Ki jan disènman ka pote byenfè pou yon fanmi? Disènman se kapasite mantal yon moun genyen ki pèmèt li wè pi lwen pase sa ki parèt sou je. Se sa k fè, nou gen tout rezon pou nou di, pou chèf fanmi yo fè yon etid familyal ki efikas, yo dwe etidye fanmi yo anvan. Ki jan manm fanmi w ap pwogrese nan domèn espirityèl? Nan konvèsasyon w ap fè avèk yo, koute sa y ap di avèk atansyon. Èske yo renmen plenyen oswa yo renmen kenbe moun nan kè? Èske se bagay materyèl yo bay plis enpòtans? Lè w nan predikasyon avèk pitit ou, èske yo santi yo alèz si yo rankontre ak kondisip yo pou yo fè yo konnen yo se Temwen Jewova? Èske yo renmen etid familyal la oswa pwogram lekti Labib nou fè an fanmi an? Èske yo vrèman viv jan Jewova mande yo pou yo viv la? Si w suiv yo avèk atansyon, antanke chèf fanmi sa ap ede w konprann ki sa pou w fè pou w ede chak moun nan fanmi w vin gen kalite ki soti nan Bondye e pou w ranfòse kalite sa yo lakay yo.

Chèche atik nan Toudegad ak nan Réveillez-vous! ki pale sou yon seri bezwen presi fanmi an genyen. Apre sa, fè fanmi an konnen alavans ki sa nou pral etidye antanke fanmi yon fason pou yo ka gentan reflechi sou sa nou pral egzamine a. Pandan etid la, chèche pou gen yon bon anbyans kote tout moun santi yo alèz. San w pa chèche reprimande okenn manm fanmi an ni fè yo jennen, mete aksan sou enpòtans sa n ap egzamine a genyen e fè yon aplikasyon presi pou bezwen fanmi an. Fè chak manm fanmi an patisipe nan etid la. Ede yo chak wè kòman Pawòl Jewova a “bon nèt”, paske li ede nou jwenn egzakteman enstriksyon nou bezwen nan lavi a. — Sòm 19:7.

Gen moun ki pa gen konpreyansyon lespri Bondye bay la ki egzamine linivè, ki egzamine evènman k ap pase nan monn nan e ki menm egzamine tèt yo, men ki pa rive konprann vrè siyifikasyon sa yo wè yo. Yon lòt bò, avèk èd lespri Bondye, moun ki etidye Pawòl Bondye a regilyèman ka rive konprann bagay sa yo se travay Bondye fè, oswa se akonplisman pwofesi ki nan Bib la oubyen se reyalizasyon objektif Bondye genyen pou l beni lèzòm ki obeyisan. — Mak 13:4-29; Wom. 1:20; Rev. 12:12.

Menm lè nou konprann tout bagay estrawòdinè sa yo, sa pa ta dwe fè nou vin twò fyè de tèt nou. Okontrè, lè nou egzamine Pawòl Bondye a chak jou, sa ap ede nou pou n toujou gen imilite (Det. 17:18-20). Sa ap pwoteje nou tou kont “pouvwa peche genyen pou l twonpe moun”, paske lè Pawòl Bondye a ret vivan nan kè nou, li ka fè l difisil pou peche atire nou e pou l kraze detèminasyon nou genyen pou nou kenbe tèt avè l (Ebre 2:1; 3:13; Kol. 3:5-10). Konsa, “n ap mache yon fason ki diy devan Jewova, yon fason pou nou fè l plezi nèt. Anmenmtan, n ap kontinye pote fwi nan tout bon travay n ap fè”. (Kol. 1:10.) Se sa ki objektif nou lè n ap etidye Pawòl Bondye a. Si nou rive fè sa, sèke nou jwenn pi gwo byenfè a.