Èske se Abraram ki papa yo oswa Dyab la?

Jezi toujou Jerizalèm nan fèt Tabènak (oswa Tonèl) yo e li anseye yon seri verite ki enpòtan. Gen kèk Juif ki di l: “Nou se desandan Abraram e nou pa t janm esklav pèsonn.” Jezi reponn: “Mwen konnen nou se desandan Abraram. Men, n ap chèche touye m, paske nou pa aksepte pawòl mwen. Mwen pale de bagay mwen te wè lè m te avèk Papa m. Men, nou menm, nou fè sa nou tande papa nou di.” — Jan 8:33, 37, 38.

Sa Jezi di yo a byen senp: Li pa gen menm papa avè yo. Kòm chèf relijye juif yo pa konprann sa Jezi vle di, yo reponn: “Se Abraram ki papa nou.” ​(Jan 8:39; Ezayi 41:8). Yo se desandan Abraram. Donk, yo panse yo gen menm lafwa ak Abraram ki te zanmi Bondye.

Sepandan, Jezi ba yo yon repons ki fè yo sezi. Li di yo: “Si nou te pitit Abraram, nou t ap fè travay Abraram.” An reyalite, yon vrè pitit ap imite papa l. Men sa Jezi di ankò: “Men kounye a, se touye n ap chèche touye m, mwen menm ki di nou verite mwen te tande nan bouch Bondye. Abraram pa t fè sa.” Apre sa, Jezi di yon bagay ki ka fè moun poze tèt yo kesyon: “Se travay papa nou n ap fè.” — Jan 8:39-41.

Malgre sa, yo toujou pa konprann de kiyès Jezi ap pale. Yo fè konnen yo se pitit lejitim Abraram, yo di: “Nou pa t fèt nan imoralite. Yon sèl Papa nou genyen, se Bondye.” Men, èske se Bondye ki papa yo vre? Jezi di yo: “Si se Bondye ki te Papa nou, nou t ap renmen m, paske se Bondye ki voye m e ki fè m la a. Epitou, se pa mwen menm poukont mwen ki te deside vini, men se Sila a ki voye m nan ki te deside sa.” Jezi poze yo yon kesyon e li tou reponn kesyon an, li di: “Ki sa k fè nou pa konprann sa m ap di a? Se paske nou pa ka tande pawòl mwen.” — Jan 8:41-43.

Jezi eseye fè yo konprann sa k ap rive yo poutèt yo rejte l. Men kounye a, li di yo: “Nou menm, nou soti nan papa nou, Dyab la, e nou vle fè volonte l.” Ki jan de moun papa yo ye menm? Men sa Jezi fè konnen aklè: “Li te yon asasen depi lè li te kòmanse nan wout li pran an, e li pa t kenbe fèm nan laverite.” Men sa Jezi di yo ankò: “Moun ki soti nan Bondye koute pawòl Bondye. Sa k fè nou menm nou pa koute, se paske nou pa soti nan Bondye.” — Jan 8:44, 47.

Juif yo an kòlè poutèt Jezi kondane yo, yo reponn: “Èske nou pa gen rezon di: ‘Ou se yon Samariten e ou gen yon demon sou ou’?” Yo di Jezi se “yon Samariten” yon fason pou yo meprize l. Jezi pa rete sou pawòl yo di l la, men sa l di: “Mwen pa gen demon sou mwen, men m ap onore Papa m, e nou menm n ap dezonore m.” Pou Jezi montre jan sa l di an enpòtan, li fè yon pwomès ki ka fè moun sezi, li di: “Si yon moun obeyi pawòl mwen, li pa gendwa janm mouri.” An reyalite, Jezi pa vle di tout moun ki suiv li pap janm mouri vre. Okontrè, li vle di moun sa yo pap janm detwi nètale, oswa yo pap sibi “dezyèm lanmò a”, kote moun pap resisite. — Jan 8:48-51; Revelasyon 21:8.

Sepandan, Juif yo pran pawòl Jezi yo nan yon sans literal. Se sa k fè yo di: “Kounye a, nou sèten ou gen yon demon sou ou. Abraram mouri, pwofèt yo mouri tou, epi ou menm, ou di: ‘Si yon moun obeyi pawòl mwen, li pa gendwa janm mouri.’ Èske w pi enpòtan pase Abraram, papa nou, ki mouri? [...] Ki moun ou panse w ye la a?” — Jan 8:52, 53.

Li klè Jezi ap eseye fè mesye yo konprann li se Mesi Bondye te pwomèt la. Sepandan, Jezi pa bay yon repons dirèk pou kesyon yo poze l pou yo konnen kiyès li ye a, men li di: “Si m ap bay tèt mwen glwa, glwa m nan pa anyen. Se Papa m k ap ban m glwa, li menm nou di ki se Bondye nou an. Epoutan, nou pa konnen l. Men, mwen menm, mwen konnen l. E si m ta di mwen pa konnen l, mwen t ap vin yon mantè menm jan avèk nou.” — Jan 8:54, 55.

Jezi retounen pale de Abraram ki te fidèl. Li di: “Abraram, papa nou, te rejwi anpil poutèt li te gen espwa l ap wè jou m nan, e li te wè l e li te rejwi.” Etandone Abraram te kwè nan pwomès Bondye yo, li t ap tann pou l wè Mesi an rive. Juif yo pa kwè nan sa l di yo, yo di: “Ou poko menm gen 50 an, epi w te gentan wè Abraram?” Men repons Jezi bay: “Anverite m ap di nou sa: Anvan Abraram te egziste, mwen te la.” Jezi ap pale de lavi li nan syèl la antanke yon espri pisan anvan l te vin sou tè a. — Jan 8:56-58.

Juif yo an kòlè anpil poutèt Jezi fè konnen li te egziste anvan Abraram. Se sa k fè yo pare pou yo kalonnen l ak kout wòch. Men, Jezi soti sennesòf.