Lè nou mouri, ki kote n ale?

1-3. Ki kesyon moun konn poze sou lanmò, e ki repons kèk relijyon bay pou kesyon sa yo?

LABIB pwomèt nou yon jou “pap gen lanmò ankò”. (Revelasyon 21:4.) Nan chapit 5 lan, nou te aprann grasa ranson an li posib pou nou gen lavi ki pap janm fini an. Men, moun kontinye mouri (Eklezyas 9:5). Se sa k fè, youn nan gwo kesyon nou konn poze se: Ki sa k rive nou lè nou mouri?

² Repons kesyon sa a enpòtan sitou lè nou gen yon moun pa nou ki mouri. Nou ka ap mande tèt nou: ‘Ki kote l ale? Èske l ap gade nou? Èske l ka ede nou? Èske n ap janm wè l ankò?’

³ Relijyon yo reponn kesyon sa yo divès fason. Genyen ki anseye si w se yon bon moun, ou pral nan syèl e si w se yon move moun ou pral boule nan lanfè. Gen lòt ki di lè w mouri ou tounen yon espri, w al viv ak fanmi w ki deja mouri. Gen lòt ankò ki di, apre w fin mouri epi yo jije w, w ap refèt ankò oswa w ap retounen viv nan yon lòt kò, swa antanke yon lòt moun oswa menm antanke yon bèt.

 4. Ki ide jeneral relijyon yo anseye sou lanmò?

⁴ Ansèyman relijyon yo bay yo pa sanble ditou. Men, prèske yo tout anseye yon sèl ide jeneral. Yo anseye lè yon moun mouri, gen yon pati nan li ki kontinye viv. Èske se vre?

5, 6. Ki sa k rive nou lè nou mouri?

⁵ Jewova konnen sa k rive nou lè nou mouri e li fè nou konnen lè yon moun mouri, li sispann viv. Lanmò se kontrè lavi. Kidonk, lè yon moun mouri, santiman l ak memwa l pa kontinye viv yon lòt kotea. Lè nou mouri, nou pa kapab ni wè, ni tande, ni reflechi ankò.

⁶ Men sa wa Salomon te ekri: “Moun ki mouri yo pa konn anyen ditou.” Moun ki mouri yo pa ka ni renmen ni rayi e “pa gen ni travay, ni plan, ni konesans, ni sajès nan Tonm” nan. (Li Eklezyas 9:5, 6, 10.) Nan Sòm 146:4, Labib fè nou konnen lè yon moun mouri “panse” l mouri.

 7. Ki sa Jezi te di konsènan lanmò?

⁷ Lè Laza, yon bon zanmi Jezi, te mouri, Jezi te di disip li yo: “Laza, zanmi nou an, ap dòmi.” Men Jezi pa t vle di Laza t ap repoze. Jezi te kontinye pou l di: “Laza mouri.” ​(Jan 11:11-14). Donk, Jezi te konpare lanmò ak dòmi. Li pa t di Laza te nan syèl la oswa li te avèk moun nan fanmi l ki mouri. E li pa t di li t ap soufri nan lanfè oswa li te refèt nan yon lòt kò moun oswa nan yon bèt. Non, se kòmsi Laza te nan pwofon somèy. Gen lòt vèsè nan Labib ki konpare lanmò ak yon somèy ki pwofon. Labib di, lè yo te touye Etyèn, “li [te] dòmi nan lanmò”. (Travay 7:60.) Epitou, apot Pòl te ekri konsènan kèk kretyen “k ap dòmi nan lanmò”. — 1 Korentyen 15:6.

 8. Ki jan nou fè konnen Bondye pa t kreye lèzòm pou yo mouri?

⁸ Èske Bondye te kreye Adan ak Èv pou yo te mouri yon lè? Non! Jewova te kreye yo pou yo te viv pou toutan e pou yo te gen yon sante pafè. Lè Jewova te fè lèzòm, li te mete dezi nan yo pou yo viv pou toutan (Eklezyas 3:11). Paran yo pa ta renmen wè pitit yo vin granmoun epi pou yo mouri. Se menm bagay la Jewova santi anrapò ak nou. Men, si Bondye te kreye nou pou nou viv pou toutan, ki rezon ki fè nou mouri?

 9. Poukisa lòd Jewova te bay Adan ak Èv la te rezonab?

⁹ Nan jaden Edenn nan, Jewova te di Adan: “Ou mèt manje nan fwi tout pyebwa ki nan jaden an jan w vle. Men, ou pa dwe manje nan fwi pyebwa konesans sa ki byen ak sa ki mal la, paske jou w manje ladan l, w ap mouri san mank.” ​(Jenèz 2:9, 16, 17). Lòd klè sa a pa t difisil pou Adan ak Èv obeyi e Jewova te gen dwa di yo sa ki byen ak sa ki mal. Si yo te obeyi Jewova, yo t ap montre l yo respekte otorite l. Yo t ap montre tou jis nan ki pwen yo gen rekonesans pou tout sa li te ba yo.

10, 11. a) Kòman Satan te pouse Adan ak Èv dezobeyi Bondye? b) Poukisa pa gen okenn eskiz pou sa Adan ak Èv te fè a?

¹⁰ Malerezman Adan ak Èv te chwazi dezobeyi Jewova. Satan te di Èv: “Èske se vre Bondye di nou pa dwe manje fwi nan okenn pyebwa ki nan jaden an?” Èv reponn: “Nou gen dwa manje fwi nan pyebwa ki nan jaden an. Men, kanta pou fwi pyebwa ki nan mitan jaden an, Bondye te di: ‘Nou pa dwe manje ladan l, non, nou pa dwe manyen l. Si nou fè sa, n ap mouri.’” — Jenèz 3:1-3.

¹¹ Epi, Satan di: “Nou pap mouri pyès. Paske, Bondye konnen jou nou manje fwi pyebwa sa a je n ap ouvri e n ap vin menm jan ak Bondye, n ap konnen sa ki byen ak sa ki mal.” ​(Jenèz 3:4-6). Satan te vle Èv panse li kapab deside sa ki byen ak sa ki mal pou tèt li. Anmenmtan, li te bay manti konsènan sa k t ap rive si Èv te dezobeyi. Satan te di Èv pa t ap mouri, se sa k fè Èv te manje nan fwi a, apre sa, li te bay mari l ladan l. Adan ak Èv te konnen Jewova te di yo pou yo pa manje fwi a. Lè yo te manje l la, yo te chwazi dezobeyi yon lòd ki klè e ki rezonab. Lefètke yo te manje l, yo te montre yo pa respekte Papa yo ki nan syèl la ki gen lanmou. Pa gen okenn eskiz pou sa yo te fè a!

12. Poukisa se yon gwo desepsyon sa ye lefètke Adan ak Èv te dezobeyi Jewova?

¹² Se pa ti desepsyon sa ye lefètke premye paran nou yo pa t gen okenn respè pou Kreyatè yo a! Ki jan w t ap santi w si w te travay di pou w leve yon pitit gason ak yon pitit fi, apre sa, yo fè rebèl avè w, e sa w mande yo fè, se pa sa yo fè? Èske sa pa t ap fè w mal anpil?

13. Ki sa Jewova te vle di lè l te di “w ap retounen nan pousyè”?

¹³ Lè Adan ak Èv te dezobeyi, yo te pèdi posiblite pou yo viv pou toutan. Men sa Jewova te di Adan: “Piske se pousyè w ye, w ap retounen nan pousyè.” ​(Li Jenèz 3:19.) Sa vle di Adan t ap tounen pousyè ankò, se tankou li pa t janm fèt (Jenèz 2:7). Apre Adan fin peche, li mouri e li pa egziste ankò.

14. Poukisa nou mouri?

¹⁴ Si Adan ak Èv te obeyi Bondye, yo t ap toujou vivan jodi a. Men, lè yo te dezobeyi Bondye a, yo te peche, e rive yon lè yo te mouri. Peche tankou yon maladi grav nou eritye nan premye paran nou yo. Nou tout fèt ak peche, e se poutèt sa nou mouri (Women 5:12). Men, se pa objektif sa a Bondye gen pou lèzòm. Bondye pa t janm vle pou moun mouri, e Labib rele lanmò yon “ènmi”. — 1 Korentyen 15:26.

15. Ki jan laverite sou lanmò libere nou?

¹⁵ Laverite konsènan lanmò libere nou anba anpil ide ki pa kòrèk. Labib anseye nou moun ki mouri yo pa santi doulè e yo pa nan lapenn. Nou pa ka pale ak yo e yo pa ka pale ak nou. Nou pa ka ede moun ki mouri yo e moun ki mouri yo pa ka ede nou. Yo pa ka fè nou mal, se sa k fè nou pa bezwen pè yo. Men, gen anpil relijyon ki fè konnen moun ki mouri yo ap viv yon kote e nou kapab ede yo si nou peye prèt yo oswa lòt chèf relijye yo. Sepandan, lè nou konnen laverite sou lanmò, nou pa pran nan manti sa yo.

16. Ki manti anpil relijyon anseye konsènan mò yo?

¹⁶ Satan sèvi ak fo relijyon pou l ban nou manti e pou l fè nou panse mò yo toujou vivan. Pa egzanp, gen kèk relijyon ki anseye lè yon moun mouri gen yon pati nan li k al viv yon lòt kote. Èske relijyon w lan anseye w sa, oswa èske l anseye w sa Labib di konsènan mò yo? Satan sèvi ak manti pou l fè moun vire do bay Jewova.

17. Poukisa ide ki fè konprann moun pral boule nan dife lanfè a se yon mank dega pou Jewova?

¹⁷ Sa anpil relijyon anseye se bagay ki terib. Pa egzanp, gen kèk ladan yo ki fè konnen moun k ap fè sa k mal yo pral boule nan lanfè pou toutan. Manti sa a se yon mank dega pou Jewova. Li pa t ap janm kite moun soufri nan fason sa a! (Li 1 Jan 4:8.) Ki jan w t ap santi w si w ta wè yon moun met men yon timoun nan dife pou l pini l? Ou t ap panse yon moun konsa vrèman mechan! Ou pa t ap vle chèche konnen l. Se egzakteman fason sa a Satan vle nou konsidere Jewova!

18. Poukisa nou pa dwe pè mò?

¹⁸ Gen kèk relijyon ki fè konnen lè moun mouri, yo tounen espri. Relijyon sa yo anseye nou dwe gen respè pou espri sa yo paske yo kapab vin zanmi nou ki gen pisans e nou dwe menm pè yo paske yo kapab vin gwo ènmi pou nou. Anpil moun kwè nan manti sa a. Yo pè mò, se sa k fè yo adore yo olye yo adore Jewova. Pa bliye mò yo pa ka santi anyen, donk nou pa dwe pè yo. Jewova se Kreyatè nou. Li se vrè Dye a, se li menm sèl nou dwe adore. — Revelasyon 4:11.

19. Lefètke n konnen laverite sou lanmò, ki jan sa ede nou?

¹⁹ Lè nou konnen laverite sou lanmò, nou libere anba manti relijyon yo bay. E verite sa a ede nou konprann bèl pwomès Jewova fè konsènan lavi nou ak avni nou.

20. Ki sa nou pral aprann nan chapit ki vin apre a?

²⁰ Sa gen lontan depi Jòb, yon sèvitè Bondye, te mande: “Si yon moun mouri, èske l ka tounen viv ankò?” ​(Jòb 14:14). Èske li posib toutbonvre pou yon moun mouri reviv ankò? Repons Bondye ban nou nan Labib fè kè nou kontan anpil. Nou pral wè sa nan chapit ki vin apre a.