Pwofesi ki gen pou reyalize talè konsa

MEN sa apot Pyè te ekri lè l t ap pale de avni lòm ansanm ak avni tè a : “ Men nou menm, n’ap tann lòt syèl ak lòt tè Bondye te pwomèt la, kote se bagay ki dwat devan Bondye ase k’ap fèt. ” ​(2 Pyè 3:13). Se pa mwayen pwofèt Izayi an premye Bondye te fè pwomès pou gen “ lòt syèl ak lòt tè ” a (Izayi [Ezayi] 65:17 ; 66:22). Lefètke Pyè te site pwofesi sa a, li te montre pwofesi a potko reyalize nèt nan epòk pa l la.

Apre sa, nan zòn ane 96 epòk pa nou an, liv Revelasyon an, yon liv apot Jan te ekri, te fè yon rapò ant “ lòt tè ” sa a ak benediksyon moun pral resevwa anba dominasyon Wayòm nan (Revelasyon 21:1-4). Jodi a, nou wè reyalizasyon pawòl Jezi ansanm ak pawòl apot Pòl te di ki gen rapò ak sitiyasyon ki t ap egziste nan monn nan anvan Wayòm Bondye a vini. Donk, nou kapab espere talè konsa monn nouvo a pral etabli grasa Wayòm nan. Ki jan monn nouvo sa a pral ye ? Liv Izayi a ban nou repons lan.

Benediksyon nou pral jwenn nan monn nouvo a

Pral gen lapè sou latè e tout moun pral adore Bondye nan inite. “ Y’a fè nepe yo tounen kouto digo. Nasyon yo p’ap fè lagè yonn ak lòt ankò. Yo p’ap janm aprann fè lagè ankò. ” — Izayi 2:2-4.

Pral gen lapè ant moun ak bèt. “ Bèt nan bwa ak mouton va viv ansanm. Tig pral kouche menm kote ak jenn kabrit. Jenn ti bèf ak jenn ti lyon pral manje ansanm. Lèfini, se yon timoun ki pral okipe yo. Manman bèf ak manman lous va manje ansanm nan menm savann. Ti bèf ak ti lous va jwe ansanm. Lyon va manje zèb tankou bèf. [...] Pesonn p’ap fè mechanste. Pesonn p’ap fè sa ki mal sou mòn ki apa pou Bondye a [...] ! Paske kè tout moun nan peyi a pral plen konesans Bondye, menm jan fon lanmè a plen dlo. ” — Izayi 11:6-9.

Pral gen anpil manje pou tout moun. “ San mank, pou tout pèp nan montay sa a, Jewova Chèf lame yo pral fè yon festen manje ki plen luil, yon festen diven yo kite poze nan ma a, yon festen manje ki plen luil e ki plen mwèl, yon festen diven yo kite poze nan ma a e yo filtre. ” — Izayi 25:6, NW.

Pap gen lanmò ankò. “ Seyè a pral fè pa janm gen lanmò ankò. Li pral siye dlo nan je tout moun. Li pral wete lawont sa a ki te sou pèp li a toupatou sou latè. Se Seyè a menm ki di sa ! ” — Izayi 25:8.

Moun mouri pral resisite. “ Moun pa ou yo ki te mouri pral leve vivan ankò. Kadav yo pral leve mache. Nou menm ki te anba tè, leve non ! Chante ak kè kontan. [...] Se konsa Seyè a pral fè sa ki te mouri depi lontan yo leve vivan ankò. ” — Izayi 26:19.

Mesi a ap yon jij ki jis. “ Li p’ap gade sou figi moun pou l’ jije yo. Li p’ap rete sou sa yo vin di l’ pou l’ rann jijman. L’ap rann jijman pou pòv yo san patipri. L’ap defann dwa pòv malere nan peyi a san paspouki. ” — Izayi 11:3, 4.

Avèg yo ak soud yo pral geri. “ Je avèg yo pral louvri. Zòrèy moun soudè yo pral debouche. ” — Izayi 35:5.

Dezè yo pral pwodui anpil. “ Dezè ak tè sèk pral kontan yon sèl kontan. Savann yo pral kontan tou, yo pral fleri. Dezè pral kouvri ak flè, yo pral fè fèt. Yo pral chante. ” — Izayi 35:1, 2.

Tè a ap vin yon lòt tè. “ Mwen pral fè yon lòt syèl [yon nouvo gouvènman k ap nan syèl la] ak yon lòt tè [yon nouvo sosyete jis ki pral gen sou tè a]. Pesonn p’ap chonje sa ki te pase nan tan lontan. Sa p’ap janm vin nan tèt yo ankò. Sa m’ pral fè a ap bay kè kontan, moun ap fè fèt san rete. [...] Moun [sa yo ki pral viv nan monn nouvo Bondye pwomèt la] va bati kay pou yo rete. Y’a plante jaden rezen pou yo manje rezen. Yo p’ap bati kay ankò pou se lòt moun ki pou rete ladan yo. Yo p’ap plante jaden ankò pou se lòt moun ki pou manje l’. Pèp mwen an ap viv rive gen menm laj ak pyebwa. Pèp mwen chwazi a va jwi travay yo fè ak men yo kont kò yo. Yo p’ap kraze kò yo travay pou bontan ankò ! Travay yo va rapòte yo ! Pitit yo p’ap konn sa ki rele malè ankò ! M’ap beni yo ansanm ak pitit yo jouk sa kaba. Anvan menm yo fin lapriyè, m’ap gen tan reponn yo. Anvan menm yo fèmen bouch yo, m’ap gen tan ba yo sa yo mande a. ” “ Menm jan lòt syèl ak lòt latè m’ap fè yo ap la pou lontan devan m’, konsa tou pitit nou ak non nou ap la pou lontan. Se Seyè a menm ki di sa. ” — Izayi 65:17-25 ; 66:22.

Bib la anonse yon avni estrawòdinè

Liv Izayi a se pa sèl liv ki anonse benediksyon lèzòm pral jwenn alavni. Bib la chaje ak pwofesi ki dekri bagay estrawòdinè Bondye pral akonpli pa mwayen Wayòm li an Kris ap dirije aa. Èske w ta renmen viv nan paradi a ? Ou kapab ! W ap bezwen chèche konnen sa Bib la anseye toutbonvre konsènan objektif Bondye genyen pou lavni e w ap bezwen wè ki sa pou w fè pou w la. Temwen Jewova yo ap byen kontan ede w.

[Nòt anba paj]

[Foto nan paj 16]

Lèzòm pral viv anpè youn ak lòt e yo pral viv anpè ak bèt yo.

[Foto nan paj 17]

Moun ki mouri pral resisite.

[Foto nan paj 18]

Tout tè a nèt pral tounen yon paradi.