Jewova fè nou konnen “bagay ki gen pou rive talè konsa”
“Men yon revelasyon Bondye bay Jezi Kris pou l montre esklav li yo bagay ki gen pou rive talè konsa.” — REV. 1:1.
1, 2. a) Pwofesi Dànyèl ak apot Jan yo ede nou konprann ki sa? b) Ki sa sis premye tèt bèt sovaj la reprezante?
PWOFESI Dànyèl ak Jan yo makònen youn ak lòt yon fason ki pèmèt nou konprann siyifikasyon anpil bagay k ap fèt kounye a e ki gen pou fèt pi devan. Ki sa nou ka aprann lè nou konpare twa bagay ki vin apre yo: vizyon Jan te fè kote l te wè bèt sovaj la, pasaj nan liv Dànyèl la ki pale de bèt ki fè moun pè ki te vin gen dis kòn nan ak fason Dànyèl te entèprete rèv Neboukadnetsa te fè kote l te wè gwo estati a? Si nou byen konprann pwofesi sa yo, ki sa sa ta dwe pouse nou fè?
2 Annou egzamine vizyon Jan te fè kote l te wè bèt sovaj la (Rev., chap. 13). Jan nou te wè sa nan atik anvan an, sis premye tèt bèt sovaj la reprezante Ejip, Asiri, Babilòn, Anpi medo-pès la, Grès ak Anpi women an. Tout pisans mondyal sa yo te rayi desandans madanm nan (Jen. 3:15). Pandan plizyè syèk apre Jan te fè vizyon l lan, Anpi women an, ki se sizyèm tèt bèt sovaj la, te reprezante yon fòs politik ki te gen anpil enfliyans. Sepandan, avèk letan, setyèm tèt la te gen pou l ranplase anpi sa a. Ki pisans mondyal ki t apral ranplase Anpi women an, e ki jan li t ap trete desandans madanm nan?
GRANN BRETAY AK ETAZINI VIN GEN ANPIL POUVWA
3. Ki sa bèt ki fè moun pè ki gen dis kòn nan reprezante, e ki sa dis kòn yo reprezante?
3 Nou kapab idantifye setyèm tèt bèt sovaj ki nan chapit 13 liv Revelasyon an lè nou konpare vizyon Jan an ak vizyon Dànyèl te fè kote l te wè yon bèt ki fè moun pè ki gen dis kòna. (Li Dànyèl 7:7, 8, 23, 24.) Bèt Dànyèl te wè a reprezante Pisans mondyal women an. (Gade tablo ki nan paj 12 ak paj 13 la.) Nan senkyèm syèk epòk nou an, anpi sa a te kòmanse divize. Dis kòn ki te nan tèt bèt sovaj ki fè moun pè a reprezante diferan wayòm ki t apral soti nan anpi sa a.
4, 5. a) Ki sa ti kòn nan te fè? b) Ki pisans setyèm tèt bèt sovaj la reprezante?
4 Gen yon bagay an patikilye yo di sou kat nan kòn sa yo, oswa wayòm, ki soti nan tèt bèt sovaj sa a: Gen yon kòn, yon “ti kòn”, ki rache twa lòt yo. Pati sa a nan pwofesi a te akonpli lè Grann Bretay, yon ansyen tèritwa ki te fè pati Anpi women an, te vin gen anpil pouvwa. Anvan 17yèm syèk la, Grann Bretay pa t gen anpil pouvwa. Gen twa lòt peyi ki te fè pati Anpi women an ki te gen plis pouvwa lontan pase l. Se te Espay, Peyiba ak Lafrans. Grann Bretay te rache kòn sa yo youn apre lòt lè l te fè yo pèdi pouvwa yo. Nan mitan 18yèm syèk la, Grann Bretay te sou wout pou l vin pi gwo pisans ki te gen nan monn nan, men, li potko vin setyèm tèt bèt sovaj la.
5 Byenke Grann Bretay te vin pi gwo pisans ki gen nan monn nan, gen koloni ann Amerik dinò ki te pran endepandans yo. Apre sa, Etazini te vin gen pouvwa tou paske Grann Bretay te pwoteje l grasa bato de gè li te genyen yo. Lè jou Seyè a te kòmanse nan ane 1914, Grann Bretay te gentan bati pi gwo anpi ki genyen nan listwa e Etazini te gentan vin pi gwo pisans ki gen sou tè a nan domèn endistrib. Pandan Premye Gè mondyal la, Etazini ak Angletè te vin gen yon relasyon espesyal. Se lè sa a setyèm tèt bèt sovaj la, Pisans anglo-ameriken an, te vin parèt aklè. Ki jan tèt sa a te trete desandans madanm nan?
6. Ki jan setyèm tèt la te trete pèp Bondye a?
6 Yon ti tan apre jou Seyè a te kòmanse, setyèm tèt la te atake pèp Bondye a, anpalan de rès frè Kris yo ki sou tè a (Mat. 25:40). Jezi te fè konnen pandan prezans li an t ap gen yon rès nan desandans madanm nan ki t ap aktif sou tè a (Mat. 24:45-47; Gal. 3:26-29). Pisans mondyal anglo-ameriken an te fè lagè ak moun sa yo ki sen nan je Jewova (Rev. 13:3, 7). Pandan Premye Gè mondyal la, pisans sa a te fè pèp Bondye a pase anpil mizè. Li te entèdi kèk nan piblikasyon pèp Bondye a te fè e li te voye kèk moun ki te reprezante esklav fidèl ki prevwayan an nan prizon. Setyèm tèt bèt sovaj la te menm kanpe travay predikasyon an pandan yon tan. Jewova te konnen sa t apral fèt e li te fè Jan konn sa. Jewova te fè konnen tou rès desandans lan t ap reprann fòs e li t ap ogmante aktivite l nan sèvis li (Rev. 11:3, 7-11). Istwa Temwen Jewova yo nan epòk nou an montre bagay sa yo te fèt toutbonvre.
RAPÒ ANT PISANS MONDYAL ANGLO-AMERIKEN AN AK PYE ESTATI A KI FÈT AN FÈ AK AJIL
7. Ki rapò ki genyen ant setyèm tèt bèt sovaj la ak gwo estati Neboukadnetsa te wè a?
7 Ki rapò ki genyen ant setyèm tèt bèt sovaj la ak gwo estati Neboukadnetsa te wè a? Grann Bretay soti nan Anpi women an, e, nan yon sans, Etazini soti nan anpi sa a tou. E pye estati a menm? Bib la di pye yo fèt an fè ak ajil. (Li Dànyèl 2:41-43.) Sa yo di nan vèsè sa yo tonbe daplon ak fason bagay yo t apral ye nan epòk setyèm tèt la, sa vle di Pisans mondyal anglo-ameriken an, t apral sèl kòk chante sou tè a. Menm jan yon bagay ki fèt an fè ak ajil gen mwens fòs pase yon bagay ki fèt an fè sèlman, se konsa tou Pisans mondyal anglo-ameriken an pi fèb pase pisans li soti ladan l lan. Ki jan sa te parèt klè?
8, 9. a) Ki jan setyèm pisans mondyal la te montre li di tankou bout fè? b) Ki sa ajil ki nan pye estati a reprezante?
8 Pafwa, setyèm tèt la konn montre li di tankou bout fè. Pa egzanp, li te montre li gen pouvwa lè l te genyen Premye Gè mondyal la. Pandan Dezyèm Gè mondyal la tou, li te montre aklè li di tankou bout fèc. Setyèm tèt la kontinye montre li gen yon pòsyon fè nan li menm apre gè sa a. Sepandan, depi lè li te kòmanse gen pouvwa, fè a te melanje ak ajil.
9 Temwen Jewova yo gen lontan depi y ap chèche konprann tout siyifikasyon pye estati a genyen. Dànyèl 2:41 fè konnen melanj fè ak ajil la gen rapò ak yon sèl “gouvènman”, oswa wayòm. Se sa k fè ajil la dwe gen rapò ak kèk bagay nan Pisans anglo-ameriken an ki fè l pi fèb pase Anpi women an, ki se janm an fè estati a. Ajil la gen rapò ak “pitit lèzòm yo”, sa vle di moun ki soti nan mas pèp la (Dàn. 2:43, NW). Nan Pisans anglo-ameriken an, gen moun ki konn leve kanpe pou yo revandike dwa yo nan kanpay yo fè, ki fòme sendika e ki òganize mouvman politik pou yo pran endepandans yo. Moun nan mas pèp la anpeche pisans mondyal sa a montre li di tankou bout fè. Mete sou sa, piske yo pa wè bagay yo menm jan e rezilta eleksyon ki konn fèt yo pa bay moun ki genyen eleksyon yo yon majorite ki ta kapab pèmèt yo itilize pouvwa a jan yo ta renmen an, menm lè moun ki genyen yo se moun ki popilè, yo konn pa ka fè sa yo ta renmen fè yo. Jan Dànyèl te anonse sa, ‘gouvènman sa a t ap gen fòs men li t ap fèb anmenmtan’. — Dàn. 2:42; 2 Tim. 3:1-3.
10, 11. a) Ki sa k ki pral rive “pye” estati a? b) Ki sa nou kapab di konsènan kantite zòtèy yo?
10 Nan 21yèm syèk la, Grann Bretay ak Etazini kontinye gen yon relasyon espesyal. Souvan, yo met tèt yo ansanm pou yo fè yon seri bagay nan monn nan. Pwofesi kote yo pale de gwo estati a ak bèt sovaj la montre byen klè pa gen okenn lòt pisans mondyal k ap ranplase Pisans anglo-ameriken an. Se vre pisans sa a kapab pi fèb pase pisans janm an fè yo te reprezante a, men li pap annik rete konsa li kraze poukont li.
11 Èske kantite zòtèy yo nan gwo estati a gen yon siyifikasyon espesyal? Gen lòt vizyon Dànyèl te fè kote li pale de chif. Pa egzanp, li pale de kantite kòn ki te gen sou tèt diferan bèt. Chif sa yo enpòtan. Sepandan, lè l ap pale de estati a, li pa pale de kantite zòtèy yo. Donk, sanble kantite zòtèy yo pa gen plis enpòtans pase de bra, de janm, de pye, de men ak dis dwèt estati a genyen yo. Sepandan, Dànyèl presize zòtèy yo t ap fèt an fè ak ajil. Dapre sa Dànyèl di yo, nou kapab di se Pisans anglo-ameriken an k ap anplas lè wòch ki reprezante Wayòm Bondye a pral frape pye estati a. — Dàn. 2:45.
RAPÒ ANT PISANS ANGLO-AMERIKEN AN AK BÈT SOVAJ KI GEN DE KÒN NAN
12, 13. Ki sa bèt sovaj ki gen de kòn nan reprezante, e ki sa l fè?
12 Byenke Pisans anglo-ameriken an se yon melanj fè ak ajil, vizyon Jezi te bay Jan yo montre pisans sa a t ap kontinye jwe yon wòl enpòtan nan dènye jou yo. Ki wòl sa a? Jan te fè yon vizyon kote l te wè yon bèt sovaj ki gen de kòn e ki t ap pale tankou yon dragon. Ki sa bèt dwòl sa a reprezante? Kòm li gen de kòn, li reprezante yon pisans ki gen de pati ladan l. Yon fwa ankò, se Pisans anglo-ameriken an Jan te wè. Men fwa sa a, li gen yon wòl espesyal l ap jwe. — Li Revelasyon 13:11-15.
13 Bèt sovaj ki gen de kòn nan ankouraje moun fè yon estati bèt sovaj ki gen sèt tèt la. Jan fè konnen estati sa a t ap parèt, li t ap disparèt e li t ap parèt ankò. Se egzakteman sa k te pase yon òganizasyon Grann Bretay ak Etazini t ap fè pwomosyon pou li. Òganizasyon sa a t apral travay pou l ini tout wayòm ki nan monn nan e li t ap reprezante yod. Òganizasyon sa a te parèt apre Premye Gè mondyal la e li te rele Sosyete nasyon yo. Li te disparèt lè Dezyèm Gè mondyal la te kòmanse. Pandan gè sa a, pèp Bondye a te fè konnen selon pwofesi ki nan liv Revelasyon an, estati bèt sovaj la t ap parèt ankò. Vrèmanvre, li te parèt ankò sou non Nasyonzini. — Rev. 17:8.
14. Nan ki sans estati bèt sovaj la se “yon uityèm wa”?
14 Jan fè konnen estati bèt sovaj la se “yon uityèm wa”. Nan ki sans? Jan pa di li se uityèm tèt premye bèt sovaj la. Li se sèlman yon estati bèt sa a. Kèlkeswa pouvwa li genyen an, se nasyon ki fè pati l yo ki ba li l, sitou Pisans mondyal anglo-ameriken an (Rev. 17:10, 11). Men, li resevwa otorite pou l aji antanke wa pou l fè yon bagay byen presi, yon bagay ki pral deklannche yon seri evènman youn dèyè lòt ki pral chanje listwa.
ESTATI BÈT SOVAJ LA DEVORE PWOSTITYE A
15, 16. Ki sa pwostitye a reprezante, e ki sa k rive moun k ap soutni l yo?
15 Selon Jan, gen yon pwostitye senbolik ki monte sou yon bèt sovaj koulè wouj vif e k ap domine l. Bèt sovaj koulè wouj vif la ak estati bèt sovaj la reprezante menm òganizasyon an. Yo rele pwostitye senbolik la “Gran Babilòn nan”. (Rev. 17:1-6.) Pwostitye sa a byen reprezante fo relijyon, san wete Legliz lakretyente yo ki gen anpil enfliyans. Fo relijyon yo bay estati bèt sovaj la jarèt e yo eseye enfliyanse l.
16 Sepandan, pandan jou Seyè a, dlo Gran Babilòn nan chita sou yo a, sa vle di moun k ap ba l jarèt yo, diminye anpil (Rev. 16:12; 17:15). Lè estati bèt sovaj la te fèk parèt, Legliz lakretyente yo, ki fè pati Gran Babilòn nan e ki gen anpil enfliyans, t ap domine sou monn oksidantal la. Sepandan, jodi a, moun yo pa gen respè pou Legliz yo ak responsab Legliz yo. Dayè, anpil moun kwè relijyon responsab anpil gè k ap fèt oswa li jwe yon wòl ladan yo. De jou an jou, gen plis entèlektyèl nan monn oksidantal la ki ta renmen wè relijyon gen mwens enfliyans sou sosyete a e ki pale aklè sou sa.
17. Ki sa k gen pou rive fo relijyon talè konsa, e poukisa?
17 Sepandan, fo relijyon pap annik rete konsa li disparèt. Pwostitye a ap kontinye gen anpil enfliyans, l ap kontinye eseye enfliyanse wa yo jiskaske Bondye mete yon lide nan kè wa sa yo. (Li Revelasyon 17:16, 17.) Talè konsa, Jewova pral fè wa yo ki nan monn Satan an, ki gen Nasyonzini kòm reprezantan yo, atake fo relijyon yo. Y ap fè yo pa gen okenn enfliyans ankò e y ap pran tout richès yo. Sa gen ventan oswa trantan, si w ta di yon moun sa, li pa t ap kwè sa t ap posib. Jodi a, pwostitye a pa sanble l an sekirite menm sou do bèt sovaj koulè wouj vif la. Malgre sa, li pap annik glise sot sou do bèt la tou dousman, se frape y ap frape l atè san l pa atann. — Rev. 18:7, 8, 15-19.
BÈT YO RIVE NAN BOUT YO
18. a) Ki sa bèt sovaj la pral fè, e ki sa k pral rive? b) Dànyèl 2:44 montre Wayòm Bondye a pral detwi ki wayòm? (Gade kare ki nan tèt paj 17 la.)
18 Apre yo fin detwi fo relijyon, yo pral dige bèt sovaj la, sistèm politik Satan an, pou l atake Wayòm Bondye a. Piske l pa kapab antre nan syèl la, li pral fè wa yo ki sou tè a atake moun k ap soutni Wayòm Bondye a avèk raj. E nou deja konn sa k pral rive (Rev. 16:13-16; 17:12-14). Dànyèl pale de yon bagay ki pral fèt pandan batay sa a. (Li Dànyèl 2:44.) Bondye pral detwi bèt sovaj yo pale de li nan Revelasyon 13:1 an, estati bèt sovaj sa a ak bèt sovaj ki gen de kòn nan.
19. Nan ki sa nou kapab gen konfyans, e ki sa nou dwe fè nan moman n ap viv la?
19 Jodi a, n ap viv nan epòk kote se setyèm tèt la ki pisans mondyal la. Bèt la pap gen lòt tèt ankò paske Bondye pral detwi l. Se Pisans mondyal anglo-ameriken an k ap la lè Bondye pral detwi fo relijyon. Pwofesi Dànyèl ak Jan te ekri yo reyalize nan tout ti detay nèt. Nou kapab gen konfyans Bondye pral detwi fo relijyon talè konsa e batay Amagedòn pral fèt talè konsa. Erezman Bondye ban nou detay sa yo alavans. Èske n ap koute avètisman nou jwenn nan pwofesi sa yo (2 Pyè 1:19)? Kounye a se moman pou nou kanpe ak Jewova e pou n soutni Wayòm li an. — Rev. 14:6, 7.
[Nòt anba paj]
a Nan Bib la, souvan, chif dis la gen rapò ak yon gwoup ki konplè. Nan ka sa a, li gen rapò ak tout wayòm ki te soti nan Anpi women an.
b Byenke de peyi ki vin fòme setyèm pisans mondyal la te egziste depi nan 18yèm syèk la, Jan montre pisans sa a t ap parèt nan kòmansman jou Seyè a. An reyalite, se nan “jou Seyè a” vre vizyon ki nan liv Revelasyon an reyalize (Rev. 1:10). Se pandan Premye Gè mondyal la de peyi sa yo, ki se setyèm tèt la, te kòmanse aji nan tèt ansanm antanke pisans mondyal.
c Dànyèl te wè jan wa sa a t apral fè yon destriksyon terib pandan gè sa a. Men sa li te ekri: “L’ap fè anpil dega.” (Dàn. 8:24). Pa egzanp, Etazini te fè anpil dega nan yon pwen moun potko janm wè sa lè l te lage de bonm atomik sou yon ènmi Pisans mondyal anglo-ameriken an te genyen.
d Gade liv La Révélation: le grand dénouement est proche! la, paj 240, 241, 253.
[Kare nan paj 17]
KI “TOUT WAYÒM SA YO”?
Nan Dànyèl 2:44, Bib la di Wayòm Bondye a “pral kraze tout wayòm sa yo, e l ap mete yon fen nan yo”. (NW.) Pwofesi sa a ap pale sèlman de wayòm diferan pati nan gwo estati a reprezante yo.
E tout lòt gouvènman lèzòm yo? Pwofesi nan liv Revelasyon an ki makònen ak pwofesi Dànyèl la ede nou konprann bagay yo pi byen. Li montre “wa ki sou tout tè a” pral met tèt yo ansanm pou yo goumen ak Bondye “Toupisan an” nan “gran jou” l la (Rev. 16:14; 19:19-21). Donk, nonsèlman wayòm estati a reprezante yo pral detwi lè Amagedòn rive, men, tout lòt gouvènman ki sou tè a pral detwi tou.