Elicha te wè yon pakèt cha dife — E ou menm?

Wa peyi Siri a te lage koukouwouj dèyè Elicha, yon pwofèt Bondye. Yo te voye dèyè l nan yon vil ki rele Dotàn ki te gen yon miray toutotou l e ki te sou tèt yon mòn. Pandan nuit lan, dirijan Siryen an te voye plizyè sòlda nan lame l la ansanm ak cheval ak chadegè nan vil Dotàn. Lame l la te gentan ansèkle vil la anvan l jou. — 2 Wa 6:13, 14.

Lè sèvitè Elicha a leve nan maten epi l sot deyò, li wè sòlda yo te voye vin pran pwofèt la. Lè l wè sa, li rele byen fò, li di: “Mèt, mèt, malè sou nou! Kisa nou pral fè la a?” Elicha reponn li, li di l: “Ou pa bezwen pè! Nou gen plis moun avèk nou pase yo.” Apre sa, pwofèt la priye Jewova, li di l: “Senyè, tanpri louvri je l pou l wè!” Bib la fè konnen: “Senyè a louvri je domestik la. Domestik la wè tout mòn lan te kouvri ak flanm dife an fòm kavalye ak cha lagè bò kote [Elicha].” ​(2 Wa 6:15-17). Ki sa n ka aprann nan istwa sa a ansanm ak lòt istwa Labib rakonte konsènan Elicha?

Lè lame siryen an te antoure vil kote Elicha te ye a, Elicha te rete kalm paske l te gen konfyans nan Jewova epi l te konnen Jewova t ap pwoteje l tou. Jodi a, nou pa atann pou Jewova fè mirak pou l pwoteje nou, men, nou kapab wè fason Jewova pwoteje pèp li a antanke gwoup. Nan yon sans, nou gen anpil cheval ak cha dife ki antoure nou tou. Si nou wè yo ak je lafwa nou, e si nou toujou konte sou Jewova, n ap “abite an sekirite” e n ap jwenn benediksyon l (Sòm 4:8, NW). Ann egzamine kèk lòt evènman ki te rive nan lavi Elicha pou n wè kòman nou ka jwenn byenfè.

Yon lè, pandan Elicha t ap travay nan yon jaden, pwofèt Eliya te pwoche kote l, li retire rad ofisyèl ki te sou li a epi l mete l sou Elicha. Elicha te konnen ki sa jès sa a vle di. Se sa k fè, li te fè yon fèt, li di papa l ak manman l orevwa epi l kite kay la pou l al sèvi Eliya (1 Wa 19:16, 19-21). Piske Elicha pa t pran tan pou l rann tèt li disponib pou l sèvi Jewova otank sa posib, li te vin yon enstriman nan men Jewova, e finalman, li te vin sèvi antanke pwofèt nan plas Eliya.

Petèt Elicha te fè sizan ap sèvi Eliya. Pandan tan sa a, Elicha “te konn vide dlo sou men Eliya”. (2 Wa 3:11, NW.) Nan epòk sa a, moun yo te gen abitid manje ak men yo, yo pa t konn itilize fouchèt, kouto oswa nenpòt lòt bagay moun itilize pou yo manje. Yon sèvitè te dwe vide dlo sou men mèt li, apre mèt la fin manje, pou mèt la te ka lave men l. Donk, gen kèk nan travay Elicha t ap fè yo ki te parèt rabesan. Malgre sa, li te konsidere se yon privilèj sa ye pou l sèvi Eliya.

Menm jan an tou jodi a, gen anpil kretyen ki antre nan divès fòm sèvis aplentan. Se lafwa yo genyen nan Jewova ak anvi yo genyen pou yo sèvi ak fòs yo otank sa posib nan sèvis li a ki pouse yo fè sa. Gen kèk nan sèvis sa yo ki mande pou kretyen sa yo kite kay yo pou y al travay nan Betèl, nan pwojè konstriksyon ansanm ak lòt fòm sèvis ankò, yon seri travay anpil moun gendwa konsidere kòm rabesan. Okenn kretyen pa dwe konsidere sèvis sa yo tankou sèvis ki rabesan oswa ki pa itil paske Jewova bay sèvis sa yo anpil valè. — Ebre 6:10.

Anvan Bondye “te fè [Eliya] moute nan syèl nan yon toubouyon”, li te mande pwofèt la pou l sot nan vil Gilgal pou l al Betèl. Eliya te mande Elicha pou l pa suiv li nan vwayaj sa a, men, Elicha te di l: “Mwen p’ap kite ou ale pou kont ou.” Toutpandan yo t ap kontinye vwayaj la, pandan de fwa ankò, Eliya te mande Elicha pou l retounen, men, Elicha pa t koute l pi rèd (2 Wa 2:1-6). Elicha te ret atache ak Eliya menm jan Rit te ret atache ak Nawomi (Rit 1:8, 16, 17). Poukisa? Sa klè, se paske Elicha te renmen privilèj Bondye te ba l pou l vin sèvitè Eliya a.

Elicha kite yon bèl egzanp pou nou. Si n gen yon privilèj nan òganizasyon Bondye a, n ap ba l anpil valè si nou toujou sonje se Jewova n ap sèvi. Pa gen pi gwo onè pase sa! — Sòm 65:4; 84:10.

Men sa Eliya te di Elicha toutpandan yo t ap mache: “Di m kisa ou ta vle m fè pou ou anvan Bondye pran m.” Plizyè ane anvan sa, Salomon te mande Jewova yon bagay ki t ap pèmèt li sèvi l pi byen. Menm jan an tou, Elicha te mande yon bagay ki t ap pèmèt li sèvi Jewova pi byen. Li te di Eliya ‘li ta renmen resevwa yon pòsyon doub nan lespri ki sou li a’. (1 Wa 3:5, 9; 2 Wa 2:9.) Ann Izrayèl, premye pitit gason yon Izrayelit te dwe resevwa yon pòsyon doub nan eritaj papa l (Det. 21:15-17). Anfèt, se kòmsi Elicha te mande Eliya pou l eritye l, sa vle di pou l ranplase l antanke pwofèt. Mete sou sa, li klè, Elicha te vle gen menm kouraj Eliya, yon moun ‘ki renmen Jewova anpil’, te genyen an. — 1 Wa 19:13, 14.

Ki repons Eliya te bay sèvitè l la? Men sa pwofèt la te di: “Sa ou mande m la a pa fasil. Men, si ou wè m ak je ou lè m’ap kite ou la, w’ap jwenn sa ou mande a. Men, si ou pa wè m, w’a konnen ou p’ap jwenn li.” ​(2 Wa 2:10). Sanble repons Eliya te ba l la te gen de siyifikasyon. Premyèman, se sèlman Bondye ki t ap ka deside si wi ou non Elicha t ap jwenn sa l mande a. Dezyèmman, pou Elicha te jwenn sa l mande a, li te dwe kontinye kenbe detèminasyon l te pran pou l ret atache ak Eliya a kèlkeswa jan sa ye.

Ki jan Bondye te konsidere demann Elicha te fè pou l jwenn de pòsyon nan lespri ki te sou Eliya a? Istwa a fè konnen: “Yo t’ap mache ansanm, yo t’ap pale yonn ak lòt lè yon cha dife ak chwal dife vin nan mitan yo. Epi li pote [Eliya] moute nan syèl nan yon gwo toubouyon. [Epi Elicha te] wè saa.” Se konsa Jewova te reponn Elicha. Piske Elicha te wè lè Bondye te pran Eliya a, li te resevwa de pòsyon nan lespri ki te sou Eliya a epi l te vin ranplase l antanke pwofèt. — 2 Wa 2:11-14.

Elicha te pran rad ofisyèl ki te tonbe sot sou Eliya a epi l te mete l sou li. Kounye a, rad sa a te montre Elicha se pwofèt Bondye. Yon lòt prèv ankò ki montre Jewova te aksepte l kòm pwofèt, se lè Elicha te vin fè yon mirak pou l fè dlo ki nan rivyè Jouden an fè de bò.

Pa gen dout nan sa, sa Elicha te wè lè Eliya t ap monte nan tanpèt van an te gen gwo efè sou li. Epitou, se pa chak jou yon moun konn wè yon cha dife ak chwal dife! Bagay sa yo te montre Jewova te dakò ak demann Elicha a. Lè Bondye ap reponn priyè nou, nou pa wè cha dife ak chwal dife. Men, nou kapab rive wè fason Bondye itilize kokennchenn pouvwa li genyen an pou l asire l volonte l ap fèt. Mete sou sa, lè n ap gade fason Jewova ap beni pati nan òganizasyon l lan ki sou tè a, se kòmsi nou wè cha selès Jewova a k ap aji. — Eze. 10:9-13.

Elicha te fè anpil eksperyans ki te fè l gen yon konfyans total nan pouvwa estrawòdinè Jewova genyen an. Anfèt, grasa lespri sen Bondye, pwofèt la te rive fè 16 mirak, sa vle di, li te fè de fwa plis mirak pase sa Eliya te fè yob. Dezyèm fwa Elicha te wè cheval ak cha dife se lè lame siryen an te antoure l nan vil Dotàn, jan sa parèt nan kòmansman atik sa a.

Elicha te ret kalm lè ènmi l yo te antoure l nan vil Dotàn. Sa k fè sa? Se paske li te gen yon lafwa ki solid nan Jewova. Nou menm tou nou bezwen gen kalite lafwa sa a. Kidonk, annou priye Bondye pou n mande l lespri sen l yon fason pou nou ka vin gen lafwa ansanm ak lòt kalite ki fè pati fwi lespri a. — Lik 11:13; Gal. 5:22, 23.

Sa k te rive nan vil Dotàn nan te bay Elicha bonjan rezon tou pou l met konfyans li nan Jewova ak nan lame Jewova a ki envizib e k ap bay pwoteksyon. Pwofèt la te rann li kont Bondye te voye lame zanj li yo antoure vil la ansanm ak moun ki te pran vil la daso. Bondye te fè yon mirak pou l sove Elicha ansanm ak sèvitè l la lè l te fè ènmi Elicha yo vin avèg (2 Wa 6:17-23). Nan moman sa a, ki te difisil anpil pou Elicha, li te met tout konfyans li nan Jewova menm jan l te konn fè sa nan lòt sitiyasyon.

Se pou nou fè Jewova, Bondye nou an, konfyans menm jan ak Elicha (Pwo. 3:5, 6). Si nou fè sa, ‘Bondye ap gen pitye pou nou, e l ap vide benediksyon l sou nou’. (Sòm 67:1.) Se vre, nan yon sans literal, pa gen okenn cha dife ak cheval dife ki antoure nou. Sepandan, pandan “gwo tribilasyon” ki gen pou vini an, Jewova pral pwoteje fanmi entènasyonal nou fòme a (Mat. 24:21; Rev. 7:9, 14). Annatandan moman sa a rive, annou toujou sonje “Bondye se yon refij pou nou”. — Sòm 62:8, NW.