Ann chèche gen menm etadespri ak Jezi
1. Ki etadespri Jezi te manifeste ?
1 Menmsi nou pa janm wè Jezi, pitit Bondye a, nou rive renmen l toutbonvre grasa sa nou li konsènan lavi l ak ministè l (1 Pyè 1:8). Obeyisans li pou Papa l te fè l abandone pozisyon li te genyen nan syèl la pou l vin sou tè a. Pandan li t ap viv sou tè a, li te sèvi pwochen l san l pa t janm wè tèt li e li te bay vi l pou l sove limanite (Mat. 20:28). Men ki egzòtasyon Pawòl Bondye a fè nou : “ Kenbe menm etadespri sa a, etadespri Kris Jezi li menm tou te genyen. ” Ki jan nou ka imite espri sakrifis li te gen lakay li a ? — Fil. 2:5-8.
2. Nan ki sitiyasyon difisil anpil kretyen konn twouve yo, e ki sa ki ka ede yo fè fas ak sitiyasyon sa a ?
2 Lè nou santi nou fatige : Jezi te pafè se vre, men sa pa t anpeche li te konn fatige. Gen yon lè, li te bay yon Samaritèn yon temwayaj konplè aktout li te “ fatige anba vwayaj ” li te fèk fin fè a (Jan 4:6). Jodi a, gen anpil kretyen ki konn twouve yo nan menm sitiyasyon an. Apre yo fin pase yon semèn ap travay, yo konn tèlman fatige, yo pa santi kouraj yo pou yo soti nan predikasyon. Sepandan, si nou patisipe nan predikasyon regilyèman, n ap rann nou kont ministè nou antanke kretyen se bagay ki ban nou fòs espirityèlman. — Jan 4:32-34.
3. Jezi te toujou dispoze pou l anseye moun, ki jan nou ka imite l nan domèn sa a ?
3 Nan yon lòt okazyon, Jezi ak disip li yo te vle al yon kote ki pa sou je pou yo pran yon ti repo. Sepandan, gen yon gwo foul moun ki dekouvri ki bò yo ye e moun yo al dèyè yo. Olye pou sa te kontrarye Jezi, “ kè l te fè l mal pou yo ” pito, e li te kòmanse “ aprann yo anpil bagay ”. (Mak 6:30-34.) Se menm etadespri a pou nou genyen si nou vle gen etid biblik. Sa mande pou nou toujou ap fè efò e pou nou gen yon amou otantik pou moun n ap preche yo. Si pou lemoman, nou pa gen etid, pa sispann fè efò pou nou jwenn youn.
4. Lè nou pyonye oksilyè, ki jan sa ka ede nou vin gen menm etadespri ak Jezi ?
4 Ann bay kesyon espirityèl yo priyorite : Yon bagay ki ka ede nou konsantre nou sou aktivite espirityèl yo, se sèvis pyonye oksilyè. Men sa yon jèn sè te ekri : “ Manman yon zanmi m te ankouraje nou toule de pou nou vin pyonye oksilyè ansanm avè l pandan yon mwa. Se pa ti kontan m kontan dèske n te fè sa. Mwen te gen posiblite aprann konnen frè ak sè yo pi byen, e sa pa t pran tan pou yo te vin tankou yon fanmi pou mwen. Yon lòt bagay mwen te renmen tou se kantite okazyon m te jwenn pou m pale de Jewova ak pwochen m e pou m anseye yo verite mayifik ki konsène Wayòm nan. Tout bagay sa yo te fè m vin santi m pi pwòch ak Jewova e ak òganizasyon l lan. ” — Sòm 34:8.
5. Poukisa nou dwe toujou ap fè efò pou nou gen menm etadespri ak Jezi ?
5 Se nou tout ki gen yon lit n ap mennen ant enpèfeksyon ki lakay nou ak dezi nou genyen pou nou fè Jewova plezi (Wom. 7:21-23). Nou fèt pou nou reziste devan tandans ki gen nan monn nan ki fè moun pa dispoze fè twòp efò (Mat. 16:22, 23). Jewova kapab ede nou pou nou rive reziste grasa espri sen l (Gal. 5:16, 17). Annatandan delivrans nou rive pou n al nan monn nouvo Bondye pwomèt la, ann chèche gen menm etadespri ak Jezi. N ap rive gen etadespri sa a lè nou fè enterè Wayòm nan ak enterè pwochen nou pase anvan enterè pa nou. — Mat. 6:33 ; Wom. 15:1-3.