Pwogram pou fanmi an — Etid familyal

¹ Pi bèl kado antanke paran kretyen ou kapab pataje ak pitit ou se lanmou ou genyen pou Jewova. Yon bonjan anbyans kote w kapab fè sa se “ lè w chita lakay ou ” pou w etidye Labib an fanmi chak semèn (Det. 6:5-7). Kit ou gen yon konjwen ki kwayan, kit w ap viv nan yon fwaye kote gen manm fanmi w ki pa gen menm relijyon avè w, kit ou se yon paran k ap leve pitit ou poukont ou, ou kapab ede pitit ou vin pi pwòch ou e ou kapab ede yo vin pi pwòch Jewova grasa yon etid familyal regilye.

² Kòmanse etid familyal la : Premye etap la se tabli abitid pou nou etidye an fanmi. Si w pa sèten sou lè etid la dwe fèt, poukisa w pa egzamine kesyon sa a an fanmi (Pwo. 15:22) ? Si w gen timoun piti, ou gendwa prefere fè plizyè seyans etid tou kout nan semèn nan. Chèche konnen ki pwogram ki mache pi byen pou fwaye w. Fikse yon lè presi pou etid la nan pwogram fanmi w, epi pran rezolisyon pou nou respekte l.

³ Ki sa nou kapab etidye ? Kèk fanmi konn prepare pati y ap egzamine nan pwochen etid liv la oswa nan pwochen etid Toudegad la. Lòt fanmi konn etidye sijè yo prepare espesyalman pou jèn yo. Men sa papa yon tigason ak yon tifi te di : “ Yon bagay ki fè etid nou an tounen yon moman timoun yo apresye pi plis nan semèn nan, sèke nou konn jwe sèn ki nan Liv istwa biblik mwen an. Kòm rezilta, pwen yo byen grave nan lespri yo, yo byen konprann yo, e sa pi enpòtan lontan pase kantite paragraf nou egzamine. ”

⁴ Etidye chak semèn : Etid familyal la dwe fèt regilyèman e tout manm fanmi an dwe ap tann li ak kè kontan. Nou kapab montre nou fleksib kanta jou ak lè n ap fè etid la pou nou ka fè fas ak kèk sitiyasyon nou pa t prevwa. Epitou, gendwa gen sitiyasyon ki mande pou nou fè kèk chanjman nan sijè n ap etidye a. Men kèlkeswa chanjman ki ta nesesè, sa pa dwe fè nou kanpe sou pwogram yon etid familyal ki deja tabli. Nan yon fanmi, men kòmantè pitit fi a fè : “ Lè nou oblije chanje lè etid nou an, papa m toujou konn ekri chanjman ki fèt nan lè a sou yon fèy papye epi li konn mete l sou pòt frijidè a, yon fason pou tout moun ka konnen ki lè etid la ap fèt. ” Vrèmanvre, efò sa yo paran yo ap fè pou etid familyal la fèt regilyèman merite felisitasyon. Pandan w ap leve pitit ou “ nan disiplin ak nan avètisman Jewova ”, w ap demontre lanmou w genyen ni pou pitit ou ni pou Papa nou ki nan syèl la. — Efe. 6:4.