Annou fè etid biblik n ap kondui nan papòt ak nan telefòn yo pwogrese
1. Ki objektif nou genyen lè n ap kondui etid biblik ?
1 Se pa ti jwa yon moun jwenn lè l kòmanse yon etid biblik ! Sepandan, jwenn yon moun ki enterese pou etidye Labib se sèlman yon kòmansman. Objektif etid la se pou nou ede moun nan pou l vin yon vrè disip Kris (Mat. 28:19, 20). Ki sa ki ka ede nou atenn objektif sa a ?
2. Ki sa yon etid biblik nan papòt ak nan telefòn ye, e poukisa yo efikas ?
2 Moun ki okipe : Moun yo okipe anpil jodi a. Gen kèk kote, pa gen anpil moun ki dispoze pase inèdtan okonplè lè yo fèk kòmanse ap etidye Labib. Pou nou ede moun sa yo, nou te jwenn ankourajman pou nou kòmanse etid biblik nan papòt kay oubyen nan telefòn. Okòmansman, etid sa yo kapab tou kout e se kapab sèlman kèk tèks biblik nou egzamine nan youn ou de paragraf nan yon piblikasyon, tankou nan liv Sa Labib anseye a. Aktyèlman, gen plizyè pwoklamatè k ap kondui etid biblik nan papòt ak nan telefòn. Yo merite anpil felisitasyon !
3. Poukisa nou dwe fè efò pou nou ogmante kantite tan nou pase nan yon etid n ap kondui nan papòt kay ?
3 Sepandan, èske nou ta dwe kontante nou pou nou kontinye kondui yon etid biblik nan papòt kay nètale ? Non. Byenke n ap montre nou saj lè nou pa pale twòp lè nou fèk kòmanse etidye ak yon moun, Ministè Wayòm me 1990 la te fè kòmantè sa a nan paj 8 : “ Yonfwa yon etid biblik fin etabli e moun nan vin manifeste plis enterè, etid la ka dire plis tan. ” Sa a se yon bagay ki trèzenpòtan. Annou bay yon egzanp pou nou montre sa : Imajine yon timoun k ap mouri grangou, yo ka kòmanse ba l yon ti kantite manje toupiti jiskaske li vin rejwenn apeti l. Men, si yo ta pase plizyè mwa ap nouri l ak ti kantite manje sa a sèlman, nou pa t ap ka espere timoun sa a ap reprann tout fòs li nèt e l ap grandi nòmalman. Se menm jan an tou, yon etidyan Labib bezwen gen yon etid ki pi kòrèk e ki fèt regilyèman, yon fason pou l vin yon sèvitè Bondye ki gen matirite. — Ebre 5:13, 14.
4. Ki avantaj yon etid biblik ki fèt anndan kay genyen ?
4 Etid biblik anndan kay : Li pi bon pou nou kondui yon etid biblik nan yon andwa prive, anndan yon kay oubyen yon lòt kote ki apwopriye. Anbyans lan ap pi favorab pou etidyan an aprann e sa ap ede l konprann sans Pawòl Bondye a (Mat. 13:23). Sa ap ede anseyan an tou pou l pi byen adapte sijè a selon bezwen etidyan an. Anplis de sa, lè etid la dire plis, sa ap pèmèt li egzamine Pawòl Bondye a plis an pwofondè, yon egzamen k ap fòtifye lafwa etidyan an. — Wom. 10:17.
5. Ki jan nou ka fè tranzisyon, soti nan yon etid biblik nan papòt kay pou rive anndan kay ?
5 Ki jan w ka fè tranzisyon, soti nan yon etid nan papòt kay pou rive anndan kay ? Apre plizyè etid ki pa dire anpil tan, èske w pa ta ka annik mande etidyan an pou nou fè etid la dire plis tan, e pou w ta tou di l konbyen tan ? Oubyen, ou ta ka itilize yon metòd endirèk, ou ka mande moun nan : “ Èske ou gen yon ti tan jodi a pou nou chita pou n egzamine sijè sa a ansanm ? ” Oubyen ou ka di l : “ Konbyen tan ou ta renmen pase jodi a ap pale de sijè sa a ? ” Si tout metòd ou itilize pa mache, kontinye fè etid tou kout avè l kanmenm nan papòt kay la. Nan yon lòt okazyon ki apwopriye, eseye fè tranzisyon an ankò pou w antre anndan kay la.
6. Nan ki objektif nou ta dwe akonpli ministè nou, e ki jan sijesyon nou jwenn nan atik sa a kapab ede nou atenn objektif sa a ?
6 Toutpandan n ap kontinye chèche moun ki diy yo, pinga nou janm bliye objektif nou genyen lè nou kòmanse etid biblik e lè n ap kondui yo. Objektif nou se pou nou ede moun ki gen kè onèt yo pou yo vin sèvitè Jewova ki vwe e ki batize. Nou swete pou Jewova beni efò n ap fè pandan n ap akonpli ministè nou nan objektif sa a. — 2 Tim. 4:5.