Repons kesyon w yo

◼ Ki jan nou ta dwe abiye lè n ap vizite lokal Temwen Jewova yo ?

Nan lemonnantye, gen Sal Wayòm, Sal asanble, Betèl ak plizyè lòt lokal ki konstwi pou pèmèt moun bay Jewova adorasyon. Lokal sa yo senp, yo pwòp e yo byen antretni. Yo diferan parapò ak lokal nou wè jeneralman nan monn Satan an. Lè n ap vizite lokal yo itilize pou adorasyon Jewova a, yo ta dwe rekonèt nou antanke moun k ap fè volonte Jewova.

Antanke kretyen, “ nou rekòmande tèt nou kòm minis Bondye ” nan tout domèn, san wete abiman nou ak aparans nou ki pwòp e ki byen aranje (2 Kor. 6:3, 4). Anplis de sa, nou bezwen byen konpòte nou. Kèlkeswa moman an, abiman nou ak aparans nou dwe reflete desans ak diyite nou genyen antanke sèvitè Jewova. Sa enpòtan sitou lè n ap vizite syèj mondyal la nan Nouyòk ak lè n ap vizite filyal yo lòt kote sou tè a.

Nan liv Organisés pour faire la volonté de Jéhovah a, yo egzamine enpòtans pou nou byen abiye e pou nou gen yon aparans ki kòrèk lè n ap patisipe nan ministè a ak lè n ap asiste reyinyon yo. Nan paj 138 la, nan paragraf 3 a, men sa yo di : “ Sonje mo Betèl la vle di ‘ Mezon Bondye ’. Pakonsekan, abiman nou, aparans nou ak konduit nou genyen lè n al vizite Betèl pa dwe diferan ak jan nou konn ye lè n al asiste reyinyon nan Sal Wayòm nan kote nou adore Jewova. ” Ni pwoklamatè ki abite toupre Betèl la ni sa ki abite lwen Betèl la dwe respekte prensip elve sa a. Konsa, lè n al vizite Betèl la, n ap demontre rekonesans ak respè nou genyen pou mezon Jewova a. — Sòm 29:2.

Fason nou abiye dwe idantifye nou kòm moun ki “ di yo gen respè pou Bondye ”. (1 Tim. 2:10.) Abiman nou ak aparans nou dwe ede lòt moun gen yon bon pwennvi sou adorasyon n ap bay Jewova a. Sepandan, yo remake gen kèk frè ak sè ki gen tandans abiye yon fason ki rilaks, ki debraye, oswa ki gen tandans mete rad ki sere, ki kout oswa ki dekòlte, lè y ap vizite lokal yo itilize pou adorasyon Jewova a. Stil abiman sa yo pa apwopriye pou kretyen, kèlkeswa moman an. Nan domèn sa a, tankou nan tout lòt domèn, nou bezwen kenbe yon wo nivo ki distenge pèp Bondye a parapò ak moun nan monn nan, toutpandan n ap fè tout bagay pou glwa Bondye. — Wom. 12:2 ; 1 Kor. 10:31.

Konsa, lè w pral vizite syèj mondyal la, oswa lè w pral vizite nenpòt filyal, kit se yon vizit ki pwograme, kit se yon vizit w ap fè antanke touris, mande tèt ou : ‘ Èske fason mwen abiye ak aparans mwen reflete modesti, pwòpte ak diyite kote mwen pral vizite a ? Èske yo onore Dye m ap adore a ? Èske aparans mwen pap distrè lòt moun oswa li pap choke yo ? ’ Se pou abiman nou ak aparans nou toujou “ anbeli ansèyman Sovè nou an, Bondye, nan tout bagay ” ! — Tit 2:10.