Jaden yo pare pou rekòt la
1. Ki travay enpòtan k ap fèt toupatou sou tè a?
1 Apre Jezi te fin preche yon dam samaritèn, men sa l te di disip li yo: “Leve je nou gade jaden yo, yo pare pou rekòt la.” (Jan 4:35, 36). Rekòt espirityèl la te kòmanse e Jezi te predi se toupatou sou tè a travay la t ap gen pou fèt. Depi kote Jezi ye nan syèl la, li toujou aktif nan travay rekòt la (Mat. 28:19, 20). Ki sa k fè nou konnen travay sa a ap kontinye entansifye toutpandan l ap avanse nan faz final li?
2. Ki rezilta nou jwenn ki montre travay rekòt la ap entansifye nan lemonnantye?
2 Yon rekòt k ap fèt sou tout tè a: Pandan ane sèvis 2009 la, te gen 3,2 pousan akwasman nan kantite pwoklamatè yo nan lemonnantye. Peyi kote yo entèdi travay predikasyon an te atenn 14 pousan akwasman nan kantite pwoklamatè yo genyen. Kantite etid biblik pwoklamatè yo te kondui chak mwa te depase 7 619 000. Chif sa a depase kantite maksimòm pwoklamatè nou genyen e li gen prèske senk san mil etid piblik anplis parapò ak kantite etid yo te rapòte ane pase. Tank travay la ap ogmante rapidman nan plizyè rejyon, se tank frè nan zòn sa yo ap mande pou misyonè ki te resevwa fòmasyon nan lekòl Gileyad vin ede yo. Nan plizyè peyi gen gwo akwasman k ap fèt nan tèritwa lang etranje yo. Li klè, Jewova ap akselere travay la pandan fen rekòt la (Iza. 60:22). Èske nou gen yon pwennvi pozitif sou “jaden” yo, sètadi tèritwa pa nou?
3. Ki sa kèk moun ka panse konsènan tèritwa nan zòn pa yo?
3 Ann rekòlte nan zòn pa nou: Gen kèk frè ak sè ki konn di: “Tèritwa m nan pa pwodui anpil.” Se vre, gen kèk tèritwa ki sanble pa pwodui anpil menm jan ak kèk lòt tèritwa, oubyen yo pa pwodui menm jan yo te konn pwodui lontan. Gen kèk Temwen ki ka panse rekòt la gentan rive nan dènye limit li nan zòn sa yo, konsa, kounye a se grapiye y ap grapiye pou yo chèche kèk grenn moun ki rete nan tèritwa a toujou. Èske se konsa bagay yo ye vre?
4. Ki pwennvi kòrèk nou dwe toujou genyen sou ministè a, e poukisa?
4 Moman rekòt, se moman ki gen plis aktivite, depi nan kòmansman pou jis rive nan fen. Nou santi ijans ki genyen nan pawòl Jezi te di yo: “Rekòt la anpil, men pa gen anpil travayè. Kidonk, priye Mèt rekòt la pou l voye travayè nan rekòt li a.” (Mat. 9:37, 38). Se Jewova, Mèt rekòt la, ki deside ki lè pou rekòt la fèt e ki kote pou l fèt (Jan 6:44; 1 Kor. 3:6-8). Ki travay nou gen pou nou fè? Men repons Bib la bay: “Nan maten, plante semans ou e jis nan aswè pinga w ralanti nan travay la.” (Ekl. 11:4-6). Wi, lè rekòt la rive nan faz final li, se pa moman pou nou ralanti nan travay la!
5. Poukisa nou dwe kontinye preche avèk zèl nan tèritwa ki sanble pa bay rezilta?
5 Ann kontinye rekòlte: Menm lè nou preche souvan e menm lè moun yo sanble endiferan, nou gen bon rezon pou n preche avèk zèl e pou nou fè sa san pèdi tan (2 Tim. 4:2). Gwo boulvèsman k ap fèt nan monn nan fè moun yo chanje fason yo panse e yo vin reflechi seryezman sou lavni. Pandan jèn yo ap vin pi gran, yo ka santi yo bezwen sekirite e yo ka bezwen pou lespri yo anpè. Lefètke nou pèsevere nan travay la, sa ka fè yon bon enpresyon sou lòt moun. Wi, moun ki pa t konn koute nou lontan ka deside koute nou avèk letan. Menm moun ki fè espre yo rejte mesaj la bezwen jwenn avètisman. — Eze. 2:4, 5; 3:19.
6. Ki sa k ka ede nou rete zele menm lè nou gen yon tèritwa ki difisil?
6 Ki sa k ka ede nou rete zele menm lè nou gen yon tèritwa ki difisil? Petèt, nou ka etann ministè nou lè nou patisipe nan lòt fòm predikasyon anplis predikasyon kay an kay. Pa egzanp, nou ka preche kote ki gen biznis oubyen nou ka preche nan telefòn. Konsa tou, nou ka varye prezantasyon nou yo selon moun nou rankontre. Nou ka chanje pwogram nou e nou ka patisipe nan ministè a nan aprèmidi oubyen nan lè nou ka jwenn pifò moun lakay yo. Petèt nou ka chèche aprann yon lang etranje pou n ka ede plis moun tande bon nouvèl la. Nou ka gen posiblite etann ministè nou lè nou pran sèvis pyonye pèmanan. Oubyen, nou ka demenaje pou n al abite nan yon zòn kote se kèk krenn moun k ap patisipe nan travay rekòt la. Si nou gen yon pwennvi ki kòrèk sou travay rekòt la, n ap fè tout sa nou kapab pou nou patisipe nan travay enpòtan sa a otank posib.
7. Jiska ki moman nou dwe kontinye patisipe nan travay rekòt la?
7 Kiltivatè yo gen yon tan limite pou yo rekòlte sa yo te plante a. Konsa, yo pa ka rete kè pòpòz ni yo pa ka ralanti nan travay la toutotan l pa fini. Travay rekòt espirityèl la mande pou nou fè menm jan an, pou nou aji san pèdi tan. Jiska ki moman nou dwe kontinye patisipe nan travay rekòt la? Pandan tout “fen sistèm nan” e jiska “lafen”. (Mat. 24:14; 28:20.) Menm jan ak pi gwo Minis Jewova te voye a, nou vle fini travay yo konfye nou an (Jan 4:34; 17:4). Annou kontinye travay nan ministè a avèk zèl, ak lajwa, e ak yon etadespri ki pozitif jiskaske lafen an rive (Mat. 24:13). Rekòt la poko fini!
[Antrefilè nan paj 2]
Moman rekòt se moman ki gen plis aktivite, depi nan kòmansman pou jis rive nan fen