“Kounye a m renmen travay fè disip la!”

Malerezman, lè m te gen 13 an, bèl amitye mwen te gen ak Jewova a te kòmanse vin frèt. Kamarad lekòl mwen yo te sanble ka fè tout sa yo vle, e sa te fè m panse m manke yon bagay. Mwen te santi règ paran m te etabli yo ak prensip yo t ap suiv antanke kretyen yo te twò di. E m te vin wè sèvi Jewova tankou yon chay lou. Byenke m te toujou kwè Jewova egziste, m te kòmanse santi m pa pwòch avè l ankò.

Sepandan, pou m pa t vin inaktif, mwen te kontinye preche jis pou m te ka remèt yon rapò. Lè m te konn al preche, mwen pa t janm prepare sa m pral di, se sa k fè li te difisil pou m kòmanse oswa kenbe yon konvèsasyon. Konsa, mwen pa t jwenn bon rezilta nan travay fè disip la e m te kòmanse pèdi jwa m. Sa te vin fè m plis pa anvi preche. Mwen te konn ap mande tèt mwen: ‘Ki jan yon moun fè kontinye preche chak semèn, chak mwa?’

Lè m te gen 17 an, mwen te vle vin endepandan. Donk mwen te fè malèt mwen, mwen te kite kay la pou m t al viv Ostrali. Paran m te tris anpil lè m t aprale. Yo t ap enkyete pou mwen, men, yo te panse mwen t ap kontinye sèvi Jewova.

Lè m te rive Ostrali, relasyon m ak Jewova te vin pi frèt toujou. Se yon lè konsa mwen te konn al nan reyinyon. Mwen te vin ap frekante yon seri jèn ki te menm jan avè m. Nou te konn al nan reyinyon jodi, e demen, nou te konn al bwè al danse nan nayklèb. Lè m ap reflechi ak jan lavi m te ye, mwen rann mwen kont mwen te gen yon pye m nan laverite, yon pye m nan monn nan. Men, mwen pa t santi m vrèman alèz ni nan youn ni nan lòt.

Anviwon dezan annapre, mwen te pase yon ti tan ak yon sè ki te fè m reflechi sou fason m t ap viv san l pa t menm rann li kont. Nou te senk sè selibatè nan yon kay e nou te envite siveyan sikonskripsyon an ak madanm li, ki rele Tamara, ret lakay nou pou yon semèn. Pandan mari Tamara te okipe nan aktivite kongregasyon an, li te konn pase tan avèk nou e li te konn ri avèk nou. Mwen te renmen sa. Li te vrèman amikal e w te ka pale avè l san pwoblèm. Mwen te sezi wè jan yon moun ki renmen Jewova anpil kapab koul konsa.

Tamara te ge anpil. Li te renmen laverite, li te renmen patisipe nan travay predikasyon an, e sa te gen bon efè sou lòt moun. Li te kontan, paske l t ap bay Jewova sa l genyen ki pi bon an, alòske mwen menm, kè m pa t kontan, paske sa m t ap bay Jewova a pa t anyen. Bèl atitid ak bonjan kè kontan li te genyen te gen gwo efè sou lavi m. Egzanp li te bay te fè m panse ak yon verite enpòtan ki nan Bib la: Jewova vle nou tout sèvi l “ak kè kontan” e avèk “rèl lakontantman”. — Sòm 100:2.

Mwen te vle gen kè kontan menm jan ak Tamara, men, sa t ap mande pou m fè kèk gwo chanjman. Mwen te kòmanse ti pa ti pa, e sa te pran tan. Mwen te konn prepare lè m pral preche, e m te pyonye oksilyè tanzantan. Sa te ede m pou m pi alèz e pou m gen plis asirans lè m ap preche. Lefètke m te itilize Bib la pi souvan lè m ap preche, mwen te vin pi renmen travay fè disip la. Sa pa t pran tan pou m te pyonye oksilyè chak mwa.

Mwen te kòmanse fè zanmi ak moun tout laj ki te bay Jewova sa yo genyen ki pi bon an e ki te renmen sèvis y ap ba li a. Bèl egzanp yo bay te ede m reflechi sou sa k pi enpòtan nan lavi m e pou m vin gen yon bon pwogram pou m li Bib la. Mwen te vin renmen preche pi plis toujou, e rive yon lè, mwen te pran sèvis pyonye pèmanan. Se premye fwa depi plizyè ane mwen te santi kè m kontan e m te santi m alèz nan kongregasyon an.

Ennan apre, mwen te rankontre Alex, yon frè ki janti, yon bon moun ki renmen Jewova e ki renmen travay predikasyon an. Li te sèvitè ministeryèl e li te gentan gen sizan depi l pyonye. Anplis de sa, Alex te fè yon ti tan ap sèvi kote ki te gen plis bezwen nan peyi Malawi. Lè l te Malawi, li te konn pase tan ak yon seri misyonè ki te ba l bèl egzanp e ki te ankouraje l pou l kontinye bay Wayòm nan premye plas nan lavi l.

An 2003, mwen menm ak Alex te marye, e depi lè sa a nou toujou nan sèvis aplentan. Nou aprann anpil bèl leson, e Jewova beni nou plizyè fason.

An 2009, yo te voye nou kòm misyonè nan Timò oryantal, yon ti peyi ki nan Endonezi. Nou te sezi anpil e nou te kontan. Men anmenmtan, nou te pè. Senk mwa annapre, nou te rive Dili, ki se kapital la.

Deplasman an te pote gwo chanjman nan lavi n. Nou te bezwen adapte n ak yon nouvo kilti, nouvo lang, manje nou pa t abitye ak fason moun yo t ap viv. Lè n t ap preche, souvan, nou te konn wè moun ki pòv anpil, ki pa t fè gwo klas, e yo te konn fè yo abi. Nou te ka wè jan lagè ak vyolans te gen efè sou anpil nan yo e jan sa te make yoa.

Travay predikasyon an te vrèman enteresan! Pa egzanp, yon lè mwen te rankontre yon tifi ki rele Mariab ki te gen 13 an e ki te tris. Manman l te gen kèk ane depi l mouri, e se yon lè konsa li te konn wè papa l. Menm jan ak anpil timoun ki te nan laj li, Maria pa t konn sa l vle fè ak lavi l. Mwen sonje yon lè, li te tonbe kriye e li te ouvri kè l ban mwen. Men, mwen pa t konprann sa l t ap di paske mwen potko konn lang nan byen. Mwen te priye Jewova e m te mande l pou l ede m ankouraje l. Apre sa, mwen te kòmanse li yon seri vèsè ankourajan pou li. Nan ane ki te vin apre yo, laverite te chanje Maria. Mwen te kapab wè sa nan atitid li, nan aparans li ak nan lavi l. Li te vin batize, e kounye a l ap etidye Labib ak lòt moun. Jodi a, Maria fè pati yon gwo fanmi k ap sèvi Jewova ansanm avè l, e li santi yo renmen l.

Jewova beni travay predikasyon an nan Timò oryantal. Byenke pifò pwoklamatè yo batize nan dizan ki sot pase la yo sèlman, anpil nan yo se pyonye, sèvitè ministeryèl oswa ansyen. Gen lòt k ap travay nan biwo tradiksyon ki pa nan Betèl e k ap ede pou tradui piblikasyon ki baze sou Bib la nan lang peyi a. Se pa ti kontan m te konn kontan tande yo k ap chante nan reyinyon yo, wè yo k ap souri epi wè jan yo t ap fè pwogrè nan laverite!

Fason nou t ap viv nan Timò oryantal te diferan nèt ak fason lavi a ye nan peyi Ostrali, men, mwen pa ta ka imajine yon lavi ki pi bèl pase sa. Pafwa nou te konn monte nan yon ti bis ki chaje moun, ki gen pwason sèch ak pil legim ki soti nan mache ki nan zòn nan. Gende jou, nou te konn fè yon etid nan yon ti kay ki pa simante, ki fè cho e ki gen imidite, kote poul ap kouri pasipala. Men, malgre tout difikilte sa yo, souvan mwen te konn di tèt mwen: ‘Sa vrèman estrawòdinè!’

Lè m ap reflechi ak sa k te pase yo, mwen gen paran m rekonesans dèske yo te fè tout sa yo kapab pou yo aprann mwen konn chemen Jewova yo e dèske yo pa t lage m, menm lè bagay yo te difisil pou mwen pandan peryòd adolesans mwen. Pawòl ki nan Pwovèb 22:6 yo reyalize nan ka pa m. Manmi ak papi fyè lè y ap gade Alex avè m. Yo kontan wè jan Jewova ap itilize nou nan sèvis li. Depi ane 2016, nou nan sèvis sikonskripsyon nan tèritwa filyal Ostralazi a.

Li difisil pou m kwè yon lè mwen te konsidere travay predikasyon an kòm yon chay. Kounye a m renmen travay fè disip la. Mwen vin rann mwen kont, kèlkeswa sa k rive nan lavi nou, se lè nou sèvi Bondye ak tout kè nou n ap gen kè kontan toutbon. Vrèmanvre, 18 ane mwen fè ap sèvi Jewova ansanm ak Alex yo, se pi bèl ane nan lavi m. Kounye a mwen konprann jan pawòl David te di Jewova nan liv Sòm nan se laverite. Li te di: “Tout moun ki pran refij bò kote w yo ap rejwi. Y ap toujou rele ak kè kontan. [...] E moun ki renmen non w yo ap gen kè kontan poutèt ou menm.” — Sòm 5:11.