Fason w kapab sèten ou fè Jewova plezi

 1. Ki sa kèk sèvitè fidèl Jewova konn ap mande tèt yo?

SA VRÈMAN ankourajan pou n konnen Jewova pran plezi nan pèp li a antanke gwoup! Men sa Bib la di: “Jewova pran plezi nan pèp li a.” (Sòm 149:4). Men, gen moun ki konn tèlman dekouraje pafwa, yo ka ap mande tèt yo: ‘Èske Jewova pran plezi nan mwen pèsonèlman?’ Anpil nan moun Bib la pale de yo ki t ap adore Jewova fidèlman nan tan lontan te konn dekouraje pafwa. Yo te konn twouve l difisil pou yo kwè Jewova pran plezi nan yo. — 1 Sam. 1:​6-10; Jòb 29:​2, 4; Sòm 51:11.

 2. Ki moun ki fè Jewova plezi?

² Bib la montre aklè moun enpafè kapab fè Jewova plezi. Ki jan? Nou dwe montre nou gen lafwa nan Jezi Kris e nou dwe batize (Jan 3:16). Konsa, nou montre tout moun nou repanti pou peche nou e nou pwomèt Bondye n ap fè volonte l (Tra. 2:38; 3:19). Se pa ti kontan Jewova kontan lè n franchi etap sa yo pou n kapab vin bon zanmi l. Toutotan nou kontinye fè efò pou n viv ann amoni ak ve nou te fè Jewova pou n fè volonte l la, Jewova pran plezi nan nou e li konsidere nou kòm bon zanmi l. — Sòm 25:14.

 3. Sou ki sa nou pral pale kounye a?

³ Men, sa k fè pafwa gen moun ki konn santi yo pa fè Bondye plezi? Ki jan Jewova montre li pran plezi nan yon moun? E ki jan yon kretyen kapab vin gen plis konfyans Bondye pran plezi nan li?

REZON KI FÈ KÈK MOUN KA SANTI JEWOVA PA PRAN PLEZI NAN YO

4-5. Menmsi nou santi nou pa vo anyen, ki asirans nou kapab genyen?

⁴ Anpil nan nou ap goumen ak santiman ki fè n panse nou pa vo anyen depi nou toupiti (Sòm 88:15). Men sa yon frè ki rele Adrián di: “Mwen te toujou santi mwen pa vo anyen. Depi lè m gen lespri mwen sonje mwen te konn priye pou fanmi m antre nan Paradi a, byenke mwen te sèten mwen pa t bon ase pou m al nan Paradi a.” Tony, li menm, pa t leve nan yon fanmi Temwen Jewova. Men sa l di: “Paran m pa t janm di m yo renmen m oswa yo fyè de mwen. Sa te fè m santi pa gen anyen m te ka fè pou m fè yo plezi.”

⁵ Pafwa, si n ap goumen ak santiman ki fè n panse nou pa vo anyen, nou bezwen sonje se Jewova li menm ki rale nou vin jwenn li (Jan 6:44). Li wè bon bagay nou gen lakay nou, bagay nou menm nou ka pa wè, e li konnen sa k nan kè nou (1 Sam. 16:7; 2 Kwo. 6:30). Donk, nou kapab fè Jewova konfyans, lè l di nou gen valè pou li. — 1 Jan 3:​19, 20.

 6. Ki jan apot Pòl te santi l lè l t ap panse ak peche li te konn fè anvan yo?

⁶ Gen nan nou anvan n te aprann laverite ki te konn fè yon seri bagay ki ka fè n santi n koupab jis kounye a (1 Pyè 4:3). Menm kretyen ki fidèl yo ap goumen kont tandans pou yo fè peche. Èske kè w ap kondane w? Si sa rive w, sa kapab konsole w pou w konnen gen sèvitè fidèl Jewova ki te goumen ak santiman konsa. Pa egzanp, lè apot Pòl t ap panse ak enpèfeksyon li genyen, sa te fè l mal anpil (Wom. 7:24). Nòmalman, Pòl te repanti pou peche l yo e l te batize. Aktout sa, li te fè konnen li se “pi piti nan apot yo” e se li menm ki “pi mal” pami pechè yo. — 1 Kor. 15:9; 1 Tim. 1:15.

 7. Ki sa nou bezwen sonje anrapò ak peche nou te fè yo?

⁷ Papa nou ki nan syèl la pwomèt l ap padone nou si nou repanti (Sòm 86:5). Donk, si nou vrèman regrèt peche nou te fè yo, nou kapab gen konfyans sa Jewova di se laverite e li padone nou. — Kol. 2:13.

8-9. Ki jan nou kapab konbat santiman ki fè n panse nou pap janm ka fè ase pou n fè Jewova plezi?

⁸ Nou tout ta renmen bay tout nou menm nan sèvis Jewova a. Sepandan, gen moun ki santi yo pap janm ka fè ase pou yo fè Jewova plezi. Men sa yon sè ki rele Amanda di: “Mwen gen tandans panse bay Jewova sa m genyen ki pi bon an vle di pou m toujou ap chèche fè plis. Souvan, mwen toujou chèche fè plis pase sa m kapab. Lè m pa rive fè sa, mwen konn santi mwen desevwa Jewova menm jan mwen desevwa tèt mwen.”

⁹ Ki jan nou kapab konbat santiman ki fè n panse nou pap janm kapab fè ase pou n fè Jewova plezi? Sonje, Jewova pa yon Bondye ki egzijan oswa ki pa rezonab. Li pa janm mande n fè plis pase sa nou kapab fè. Li apresye kèlkeswa sa nou fè pou li depi nou fè tout sa n kapab. Epitou, reflechi sou egzanp nou jwenn nan Bib la konsènan moun ki te sèvi Jewova ak tout nanm yo. Panse ak Pòl. Li te travay di anpil pandan plizyè ane, li te fè plizyè kilomèt ap vwayaje pou l tabli anpil kongregasyon. Aktout sa, lè l te vin pa kapab fè tout sa l te konn fè anvan nan travay predikasyon an, èske Bondye te sispann pran plezi nan li? Non. Li te kontinye fè sa l te kapab, e Jewova te beni l (Tra. 28:​30, 31). Menm jan an tou, nou ka pa kapab bay Jewova sa n te konn ba li anvan. Men, sa k enpòtan pou li, se rezon ki pouse n sèvi l la. Kounye a, ann wè kèk fason Jewova montre li pran plezi nan nou.

KI JAN JEWOVA MONTRE N LI PRAN PLEZI NAN NOU?

10. Nan ki sans nou kapab tande Jewova k ap fè nou konnen li pran plezi nan nou? (Jan 16:27).

¹⁰ Li ban nou Labib. Jewova renmen montre moun li gen afeksyon pou yo, li pran plezi nan yo. Nan de okazyon Labib fè konnen Li te di Jezi li se Pitit Li renmen anpil la, li menm Li pran plezi nan li a (Mat. 3:17; 17:5). Èske w ta renmen tande Jewova k ap di w li pran plezi nan ou? Jewova pa pale avèk nou yon fason pou n tande vwa l, men, li pale avèk nou pa mwayen Pawòl li a. Nan yon sans, nou kapab tande vwa Jewova k ap fè nou konnen li pran plezi nan nou lè n li pawòl Jezi yo ki nan Evanjil yo. (Li Jan 16:27.) Jezi imite pèsonalite Papa l yon fason ki pafè. Donk, lè nou li nan Bib la Jezi te fè disip fidèl li yo ki pa t pafè konnen li renmen yo, nou kapab imajine Jewova k ap di nou pawòl sa yo tou. — Jan 15:​9, 15.

11. Sa k fè lè n jwenn pwoblèm sa pa vle di Jewova pa pran plezi nan nou? (Jak 1:12).

¹¹ Li ban nou sa nou bezwen. Jewova toujou pare pou l ede nou, pa egzanp pou l ban nou sa nou bezwen pou n viv. Pafwa, Jewova ka kite nou fè fas ak difikilte, menm jan li te kite sa rive Jòb, yon moun ki te jis (Jòb 1:​8-11). Lè n jwenn eprèv, sa pa vle di Bondye pa pran plezi nan nou. Okontrè, eprèv yo ban nou okazyon pou nou montre jis nan ki pwen nou renmen Bondye e nou fè l konfyans. (Li Jak 1:12.) Lè n ap fè fas ak eprèv, n ap wè jan Bondye renmen nou ak fason l ap ede n andire.

12. Ki sa nou ka aprann nan eksperyans Dmitrii te fè a?

¹² Ann reflechi sou sa k te rive yon frè ann Azi ki rele Dmitrii. Li te pèdi travay li e pandan plizyè mwa li pa t ka jwenn yon lòt travay. Donk, li te deside pase plis tan nan travay fè disip la, konsa li te montre li fè Jewova konfyans. Plizyè mwa te pase, men, li te toujou pa t ka jwenn travay. Annapre, li te vin gen plizyè pwoblèm sante ki te oblije l pran kabann. Li te kòmanse panse li pa yon bon mari ak yon bon papa ankò, e li t ap mande tèt li, èske Jewova fache avè l. Epi, yon jou swa pitit fi l la te vin ak yon papye ki te gen pawòl nou jwenn nan Ezayi 30:15 yo ekri ladan l, ki di: “Si nou ret dousman e nou montre nou gen konfyans, se sa k ap fòs nou.” Li te pote l bò kot kabann papa l la e li te di: “Papi, lè w pa santi w anfòm ou kapab sonje vèsè sa a.” Dmitrii te rann li kont grasa Jewova fanmi l te toujou jwenn manje pou yo manje, rad pou yo mete ak yon kote pou yo rete. Men sa l di: “Sa m te bezwen fè, se ret dousman epi kontinye fè Bondye m nan konfyans.” Si w ap fè fas ak yon eprèv menm jan an, ou kapab gen konfyans Jewova gen sousi pou ou e l ap ede w andire.

13. Kiyès Jewova ka itilize pou l montre li pran plezi nan nou, e ki jan l fè sa?

¹³ Li ban nou frè n ak sè n yo. Jewova sèvi ak frè n ak sè n yo pou l montre li pran plezi nan nou. Pa egzanp, li ka pouse lòt moun di nou yon seri pawòl nan bon moman pou ankouraje n. Yon sè ann Azi te viv sa lè l t ap fè fas ak yon sitiyasyon ki te difisil anpil. Li te pèdi travay li e li te vin malad grav. Annapre, mari l te fè yon peche grav e li te vin pa ansyen ankò. Men sa sè a te di: “Mwen pa t ka konprann poukisa bagay sa yo te rive. Mwen te panse se paske petèt mwen te fè yon bagay ki mal e m te pèdi favè Jewova.” Sè nou an te sipliye Jewova pou L ba l asirans Li pran plezi nan li. Ki jan Jewova te fè sa? Men sa l te remake: “Ansyen yo nan kongregasyon an te pale avè m e yo te ede m wè Jewova toujou renmen m.” Annapre, yon lòt fwa ankò li te mande Jewova pou l ede l. Men sa l di: “Menm jou a mwen te resevwa yon lèt plizyè frè ak sè nan kongregasyon an te voye pou mwen. Pandan m t ap li pawòl ki nan lèt sa a ki te vrèman ankouraje m, mwen te santi Jewova te tande m.” Pa gen dout, souvan Jewova montre li pran plezi nan nou pa mwayen bèl ti pawòl lòt moun di nou. — Sòm 10:17.

14. Bay yon lòt fason Jewova montre li pran plezi nan nou.

¹⁴ Yon lòt fason Jewova montre li pran plezi nan nou, se lè l sèvi ak frè n ak sè n yo pou l ban nou konsèy lè n bezwen sa. Pa egzanp, nan premye syèk la, Jewova te fè apot Pòl ekri 14 lèt pou kwayan parèy li yo. Nan lèt sa yo Pòl te bay frè ak sè yo yon seri konsèy ki dirèk, men, li te fè sa yon fason ki montre li renmen yo. Poukisa Jewova te fè Pòl met konsèy sa yo nan lèt li te ekri yo? Jewova se yon bon Papa, e li disipline pitit “li renmen”. (Pwo. 3:​11, 12.) Donk, si nou resevwa konsèy ki baze sou Bib la, sa pa vle di nou pèdi favè Bondye, okontrè nou bezwen wè sa kòm yon prèv ki montre li pran plezi nan nou (Ebre 12:6). Ki lòt bagay ki montre Jewova pran plezi nan nou?

LÒT PRÈV KI MONTRE JEWOVA PRAN PLEZI NAN NOU

15. Ki moun Jewova bay lespri sen, e ki asirans sa kapab ban nou?

¹⁵ Jewova bay moun li pran plezi nan yo lespri sen (Mat. 12:18). Nou kapab mande tèt nou: ‘Èske m rive montre kèk aspè nan fwi lespri Bondye a nan lavi m?’ Èske w remake ou vin gen plis pasyans ak lòt moun pase anvan w te vin konnen Jewova? Anfèt, plis w ap aprann demontre fwi lespri Bondye a, se plis w ap kapab wè ou fè Jewova plezi! — Gade kare ki gen tit “Fwi lespri a se...”

16. Ki moun Jewova itilize pou preche bon nouvèl la, e ki jan sa fè w santi w? (1 Tesalonisyen 2:4).

¹⁶ Jewova kontan konfye moun li pran plezi nan yo bon nouvèl la. (Li 1 Tesalonisyen 2:4.) Remake jan yon sè ki rele Jocelyne te vin gen konviksyon sa a pandan l t ap pataje bon nouvèl la ak lòt moun. Yon jou, Jocelyne te leve e li te santi moral li ba. Men sa l di: “Mwen te santi se kòmsi m pa t gen anyen pou m bay, men, mwen te pyonye, e se te jou pou m al preche. Donk, mwen te priye e m te soti al preche.” Jou maten sa a, Jocelyne te rankontre Mary, yon dam byen janti ki te aksepte yon etid Labib. Kèk mwa annapre, Mary te fè Jocelyne konnen, lè l te vin frape pòt li a, li t ap priye Bondye pou ede l. Ki sa Jocelyne te aprann nan eksperyans sa a? Men sa l di: “Mwen te santi se kòmsi Jewova t ap di m: ‘Mwen pran plezi nan ou.’” Nòmalman, se pa tout moun k ap byen reyaji ak travay predikasyon n ap fè a. Men, nou kapab gen asirans, lè n fè tout sa n kapab pou n pataje bon nouvèl la ak lòt moun, sa fè Jewova plezi.

17. Ki sa w aprann nan pawòl Vicky te di konsènan ranson an? (Sòm 5:12).

¹⁷ Jewova pèmèt moun li pran plezi nan yo benefisye ranson an (1 Tim. 2:​5, 6). Men, e si w toujou pa ka kwè Jewova pran plezi nan ou, menm lè w gen lafwa nan ranson an e w batize? Sonje, nou pa ka toujou fè santiman nou konfyans, men nou kapab fè Jewova konfyans. Li konsidere moun ki gen lafwa nan ranson an kòm moun ki jis e li pwomèt l ap beni yo. (Li Sòm 5:12; Wom. 3:26.) Lè Vicky te medite sou ranson an, sa te ede l. Yon jou, apre l te fin byen medite sou ranson an, men sa l te vin rann li kont: “Jewova gen lontan depi l ap pran pasyans avè m. [...] Poutan, se kòmsi mwen t ap di l: ‘Lanmou w pa gen ase fòs pou l rive jwenn mwen. Sakrifis Pitit Gason w lan te fè a pa ase pou l kouvri m.’” Lè Vicky te medite sou ranson an ki se yon kado, li te kòmanse santi Jewova renmen l. Nou menm tou, tank n ap medite sou ranson an, n ap santi Jewova renmen nou e n ap santi li pran plezi nan nou.

18. Ki asirans nou kapab genyen si n kontinye renmen Papa nou ki nan syèl la?

¹⁸ Byenke nou ka fè anpil efò pou n aplike konsèy nou jwenn nan atik sa a, pafwa nou ka santi n dekouraje e nou ka ap mande tèt nou èske Jewova pran plezi nan nou. Si sa rive w, sonje Jewova pran plezi nan “moun ki kontinye renmen l yo”. (Jak 1:12.) Kidonk, kontinye pwoche bò kote Jewova epi chèche wè fason li pran plezi nan ou. Pa janm bliye Jewova “pa lwen okenn nan nou”. — Tra. 17:27.