Mwen te enpresyone devan repons ki klè e ki lojik Bib la bay yo

Mwen fèt nan yon vil ki rele Székesfehérvár, nan peyi Ongri. Vil sa a gen yon istwa ki rich ki gen plis pase 1 000 an. Dezyèm Gè mondyal la te ravaje vil sa a, malerezman, m toujou sonje vye imaj sa yo.

Lè m te toupiti, mwen te leve ak granparan m. Mwen sonje yo anpil anpil, sitou granmè m Elisabeth. Li te fè m gen yon lafwa ki solid nan Bondye. Depi lè m gen twazan, chak swa, li te konn repete priyè yo rele pafwa Nòtrepè a avè m. Malgre sa, se jis lè m rive nan fen ventèn mwen, m vin konprann sans priyè sa a genyen.

Nan premye ane mwen yo, se granparan m ki te konn pran swen m paske paran m t ap travay lajounen kou lannuit pou yo te ka sere kòb pou yo achte yon kay ki modès. Men, chak dezyèm samdi, tout fanmi an te konn reyini ansanm pou yo pran yon repa. Mwen te vrèman renmen moman sa yo nou te konn pase ansanm.

Nan ane 1958, rèv paran m te genyen an te reyalize. Yo te rive achte yon kay pou nou toule twa te ka viv ladan l. Finalman, mwen te vin ap viv ak paran m, sa te fè m kontan anpil! Sepandan, sis mwa apre, kè kontan sa a te fini bridsoukou. Papa m te mouri ak yon kansè.

Mwen te nan gwo lapen. Mwen sonje m te fè priyè sa a: “Bondye, m te mande w pou w sove papa m. Mwen bezwen l. Poukisa w pa t reponn priyè m yo?” M te vrèman anvi konnen ki kote papa m ye. M te mande tèt mwen: ‘Èske l al nan syèl? Oubyen èske li sispann egziste pou toutan?’ Mwen te anvye lòt timoun ki te toujou gen papa yo avè yo.

Pandan anpil ane, m te konn al nan simityè a prèske chak jou. M te konn met ajenou devan tonm papa m nan e m te konn fè priyè sa a: “Tanpri Bondye, mwen ta renmen konnen ki kote papa m ye.” Anplis de sa, m te konn priye pou Bondye ede m konprann sans lavi a.

Lè m te gen 13 an, mwen te deside aprann alman. Mwen te panse m te ka jwenn repons kesyon m yo nan pil gwo liv alman yo ak nan richès ki gen nan kilti sa a. An 1967, m te kòmanse etidye nan vil Iéna ki te nan lès peyi Almay. Mwen te chofe pou m li liv filozòf alman yo te ekri, sitou liv ki pale sou sans egzistans lèzòm genyen. Byenke m te jwenn kèk ide enteresan ladan yo, okenn nan yo pa t vrèman satisfè m. M te kontinye priye Bondye pou m jwenn repons kesyon m yo.

Nan ane 1970, m te retounen nan peyi Ongri kote m te rankontre Rose ki t ap vin madanm mwen. Nan epòk sa a, Ongri te anba yon rejim kominis. Yon ti tan apre nou fin marye, mwen menm ak Rose te kouri al nan peyi Otrich. Anfèt, objektif nou se te al viv nan vil Sydney, nan peyi Ostrali, kote tonton m t ap viv la.

Mwen te jwenn travay byen vit nan peyi Otrich. Yon jou, gen yon kòlèg mwen ki te di m mwen ka jwenn repons tout kesyon m yo nan Bib la. Li te ban m kèk liv ki pale sou Bib la. Mwen te li yo byen vit ak anpil antouzyas e m te vle aprann plis bagay toujou. Kidonk, m te ekri Temwen Jewova yo, sètadi moun ki te pibliye liv sa yo, epi m te mande yo plis liv toujou.

Nan jou ki te premye anivèsè maryaj nou, gen yon jèn Temwen Otrichyen ki te vizite mwen menm ak Rose. Li te pote lòt liv pou mwen, e li te ofri m yon etid biblik, yon bagay mwen te aksepte fè. Piske m te chofe pou m aprann, nou te fè etid la de fwa pa semèn, chak etid te konn dire anviwon katrèdtan!

Sa Temwen Jewova yo te anseye m nan Bib la te fè m kontan anpil. Lè yo te montre m non Bondye se Jewova nan Bib ongwa mwen te genyen an, m te prèske pa t ka kwè yo. Mwen te fè 27 an ap mache legliz, menm yon fwa mwen pa t janm tande yo site non Bondye. Mwen te enpresyone devan repons ki klè e ki lojik Bib la bay pou kesyon m yo. Pa egzanp, mwen te aprann moun ki mouri yo pa konn anyen, se tankou yo nan yon pwofon somèy (Eklezyas 9:5, 10; Jan 11:11-15). Anplis de sa, mwen te aprann Bib la pwomèt ap gen yon monn nouvo kote “pap gen lanmò ankò”. (Revelasyon 21:3, 4.) Mwen espere wè Papa m ankò paske nan monn nouvo sa a “pral gen yon rezirèksyon”. — Travay 24:15.

Rose te vin etidye Labib menm jan avè m e li te fè sa ak tout kè l. Nou te fè pwogrè byen vit, nou te fini ak liv etid la nan de mwa sèlman! Nou te asiste tout reyinyon Temwen yo te fè nan Sal Wayòm nan. Lanmou ak inite ki gen pami Temwen yo ak fason yo te dispoze ede youn lòt te vrèman enpresyone nou. — Jan 13:34, 35.

Nan ane 1976, mwen menm ak Rose te jwenn pèmisyon pou n antre nan peyi Ostrali. San pèdi tan, nou te chèche kote Temwen Jewova yo ye. Byen vit, Temwen yo ki nan zòn nan te fè nou santi nou lakay nou. Nan ane 1978, nou te vin Temwen.

Finalman, mwen jwenn repons kesyon ki t ap twouble m depi byen lontan yo. Lefètke m pwoche bò kote Jewova, mwen vin jwenn pi bon Papa mwen ta ka imajine a tou (Jak 4:8). Mete sou sa, esperans mwen genyen pou m rewè papa m nan monn nouvo ki gen pou vini an gen anpil enpòtans pou mwen. — Jan 5:28, 29.

An 1989, mwen menm ak Rose te deside retounen Ongri pou n te ka pataje kwayans nou yo ak zanmi nou, fanmi nou, epi ak lòt moun nou te ka rankontre yo. Nou te gen privilèj pou n anseye plizyè santèn moun Labib. Gen plis pase 70 nan moun sa yo ki vin sèvi Jewova menm jan avèk nou, san wete manman m mwen renmen anpil la.

Mwen te fè 17 an ap priye pou m jwenn repons kesyon m yo. Gen 39 lòt ane ki pase, e mwen toujou ap priye. Se sèlman kounye a mwen ka di: “Mèsi bon Papa m ki nan syèl la paske w reponn priyè m te fè lè m te timoun.”