Sa a se eritaj espirityèl nou an!

 1. Grasa lanmou Jewova gen lakay li, ki sa l te prezève pou byen limanite?

ANTANKE ‘Bondye vivan an, yon Bondye ki la pou toutan’, Jewova te prezève mesaj li a k ap pote lavi pou limanite. Se sèten, mesaj sa a ap dire lontan paske “pawòl Bondye a la pou tout tan”. (1 Pyè 1:23-25, Bib La.) Se pa ti rekonesan nou rekonesan anvè Jewova dèske, grasa lanmou li gen pou nou, li te prezève enfòmasyon sa yo pou nou nan Bib la, pawòl li te fè ekri a!

 2. Nan Pawòl Bondye te fè ekri a, ki sa l te prezève pou pèp li a te ka sèvi avè l?

² Bondye te prezève non li chwazi a nan Pawòl li a yon fason pou pèp li a te ka sèvi avè l. Premye kote Bib la pale de “[Jewova] Bondye” se lè Bondye ‘t ap kreye syèl la ak tè a’. (Jen. 2:4.) Grasa yon mirak, non Bondye te parèt plizyè fwa sou wòch plat ki te gen Dis Kòmandman yo. Pa egzanp, men sa nou li nan premye kòmandman an: ‘Se mwen menm Jewova, Bondye nou an.’ ​(Egz. 20:1-17). Jis jounen jodi a, moun yo rive konn non Bondye paske Jewova, Souvren Seyè a, te prezève Pawòl li a ansanm ak non l malgre tout efò Satan fè pou l elimine yo. — Sòm 73:28.

 3. Alòske relijyon yo ap nwaye nan erè, ki sa Bondye te prezève pou nou?

³ Jewova te prezève verite ki gen nan Pawòl li a tou. Se pa ti rekonesan nou rekonesan anvè Jewova dèske li ban nou limyè nan domèn espirityèl e li ban nou laverite tandiske relijyon nan monn nan ap nwaye nan erè! (Li Sòm 43:3, 4.) Byenke mas moun ki fè pati monn sa a ap mache nan fènwa, nou menm nou kontan mache nan limyè espirityèl Bondye ban nou an. — 1 Jan 1:6, 7.

4, 5. Ki privilèj espesyal nou genyen depi nan ane 1931?

⁴ Antanke kretyen, nou gen yon eritaj ki gen anpil valè. Gen yon diksyonè ki fè konnen: “Eritaj yon peyi se tout karakteristik, tradisyon oswa fason moun kontinye viv nan peyi sa a pandan plizyè ane, e se yon bagay k ap pase de jenerasyon an jenerasyon.” ​(Collins Cobuild English Dictionary). Eritaj espirityèl nou an gen ladan l benediksyon nou jwenn lefètke nou gen konesans egzak ki soti nan Pawòl Bondye a ansanm ak bonjan konpreyansyon nou gen sou laverite konsènan Bondye ak objektif li. Sa gen ladan l tou yon privilèj ki vrèman espesyal.

⁵ Privilèj sa a te vin fè pati eritaj espirityèl nou an nan ane 1931 nan yon kongrè ki te fèt Columbus, Ohio, Ozetazini. Pwogram yo te remèt moun ki t ap asiste kongrè sa a te gen lèt “JW” sou yo. Men sa yon sè te di: “Anpil moun t ap mande tèt yo ki sa lèt JW yo vle di. Gen moun ki panse yo vle di Just Wait (ret tann) oswa Just Watch (ret gade), e gen lòt moun ki te menm jwenn vrè repons lan.” Anvan sa, yo te rele nou Etidyan Labib, men, jou dimanch ki te 26 jiyè 1931 an, nan yon rezolisyon nou te pran, nou te adopte non Temwen Jewova a (Jehovah’s Witnesses). Se pa ti kontan nou te kontan pote non sa a ki soti nan Bib la! (Li Izayi 43:12.) Men sa yon frè te di: “Mwen pap janm bliye jan moun yo te rele, e jan yo te bat bravo byen fò kote nou te reyini an.” Pa gen okenn lòt moun nan monn nan ki te dakò ak non sa a, men, Bondye kontinye beni nou paske n ap sèvi ak non sa a depi plis pase 80 an. Ala yon privilèj espesyal sa ye dèske nou se Temwen Jewova!

 6. Ki enfòmasyon ki egzak nou jwenn nan eritaj espirityèl nou an?

⁶ Nan eritaj espirityèl nou an, nou jwenn yon bann enfòmasyon ki egzak e ki gen anpil valè moun ki te viv nan tan lontan yo kite pou nou. Pa egzanp, ann konsidere Abraram, Izarak ak Jakòb. Patriyach sa yo dwe te konn pale ak fanmi yo sou fason pou yo fè Jewova plezi. Se sa k fè, sa pa etone nou lè n aprann Jozèf, yon moun ki jis, te refize fè imoralite seksyèl paske li pa t vle “peche [...] kont Bondye”. (Jen. 39:7-9.) Konsa tou, kretyen yo te konn transmèt lòt moun tradisyon yo te genyen yo swa nan pawòl yo swa nan egzanp yo. Pami bagay sa yo, nou ka site kèk enfòmasyon apot Pòl te bay kongregasyon yo konsènan Soupe Seyè a (1 Kor. 11:2, 23). Jodi a, nan Pawòl Bondye te fè ekri a, nou jwenn tout enfòmasyon nou bezwen pou nou ka rive adore l “avèk lespri ak laverite”. (Li Jan 4:23, 24.) Se vre, Bib la tankou yon limyè pou tout moun, men, antanke sèvitè Jewova, nou menm, nou ba l anpil valè.

 7. Ki pwomès ankourajan nou jwenn nan eritaj espirityèl nou an?

⁷ Yon lòt bagay nou jwenn nan eritaj espirityèl nou an se istwa yo rakonte nan piblikasyon nou yo konsènan sèvitè Jewova nan epòk nou an. Istwa sa yo montre ‘se Jewova k’ap ede nou’. (Sòm 118:7.) Menm lè y ap pèsekite nou, nou santi nou an sekirite. Yon bagay ankourajan nan eritaj espirityèl nou genyen k ap vin pi plis chak jou a, se pwomès sa a ki di: “‘Nanpwen zam y ap fòje kont ou k ap reyisi, e depi se lang ki va leve kont ou nan jijman an, w ap kondane l. Sa a se byen [oswa “eritaj”, By] sèvitè Jewova yo eritye, epi jistis yo se lakay mwen sa soti’, se sa Jewova deklare.” ​(Iza. 54:17, NW.) Pa gen youn nan pil zam Satan yo ki ka fè nou soufri pou toutan.

 8. Ki sa nou pral egzamine nan atik sa a ak nan atik ki vin apre a?

⁸ Satan eseye detwi Pawòl Bondye a, li eseye elimine non Jewova epi li eseye anpeche moun konnen verite a. Men, se sèten, Jewova pi fò lontan pase Satan e L ap kontinye kontrekare tout efò Satan ap fè yo. Nan atik sa a ak nan atik ki vin apre a, nou pral egzamine 1) fason Bondye te prezève Pawòl li a, 2) fason Jewova te prezève non l, e 3) fason Jewova, Papa nou ki nan syèl la, montre se nan li laverite soti ak fason li te prezève l pou nou.

9-11. Bay kèk egzanp ki montre Bib la te reyisi chape malgre tout atak yo te fè sou li.

⁹ Jewova te prezève Pawòl li a kont tout opozisyon. Gen yon ansiklopedi ki fè konnen: “Nan yon gwo reyinyon ki te fèt nan vil Toulouz, nan ane 1229, yo te entèdi layik yo sèvi ak [Bib ki te tradui nan lang pèp la] akoz konba yo t ap mennen kont Albijwa yo ak disip Valdo yo [...] Nan asanble ki te fèt nan vil Tarragone, ann Espay nan ane 1234, pandan rèy Jak 1^ye a, yo te bay menm entèdiksyon sa a [...] Se nan ane 1559, Vatikan te pale pou premye fwa sou sa, lè Pap Pòl IV te entèdi moun enprime epi posede [Bib] ki tradui nan lang pèp la san pèmisyon Biwo Sen an.” — Enciclopedia Cattolica.

¹⁰ Malgre tout atak yo te fè sou Bib la, Jewova te prezève l. Ozanviwon ane 1382, John Wycliffe ansanm ak moun ki te avè l yo te pibliye premye tradiksyon Labib ann anglè. Yon lòt moun ki te tradui Labib se William Tyndale, men, yo te touye l nan ane 1536. Toutpandan yo te mare l sou yon poto, men sa yo fè konnen li te di byen fò: “Seyè, ouvri je wa Angletè a non.” Apre sa, yo toufe l epi yo boule l.

¹¹ Bib la te reyisi chape anba anpil opozisyon. Pa egzanp, nan ane 1535, Miles Coverdale te pibliye yon tradiksyon Labib ann anglè. Pou l te rive fè sa, Coverdale te sèvi ak tradiksyon Labib Tyndale te fè sou “Nouvo Testaman” an ak “Ansyen Testaman” an, soti nan Jenèz pou rive nan Kwonik. Apre sa, li te tradui lòt liv yo apati lang laten ansanm ak tradiksyon Labib Martin Luther te pibliye ann alman an. Jodi a, moun yo apresye Les Saintes Écritures —Traduction du monde nouveau a paske l se yon tradiksyon ki fasil pou moun konprann, li egzak parapò ak tèks nou jwenn nan Bib la, e li efikas anpil nan travay predikasyon an. Sa fè nou kontan lefètke nou konnen ni demon yo ni okenn moun pap janm ka anpeche Jewova prezève Pawòl li a.

12. Ki wòl Tradiksyon monn nouvo a jwe nan prezève non Bondye?

¹² Jewova te veye pou yo prezève non l nan Pawòl li a. Tradiksyon monn nouvo a jwe yon wòl enpòtan nan sans sa a. Men ki sa komite tradiktè yo, yon gwoup moun ki vwe lavi yo bay Bondye, te ekri nan entwodiksyon liv sa a: “Pi gwo karakteristik tradiksyon sa a, se mete li remete non Bondye nan plas li kòmsadwa nan tèks anglè a. Yo te itilize fason moun yo aksepte non sa a ann anglè, ki se ‘Jewova’, 6 973 fwa nan liv ki te ekri ann ebre yo, e 237 fwa nan liv ki te ekri an grèk yo.” Kounye a, Tradiksyon monn nouvo a disponib ann antye oswa an pati nan plis pase 116 lang, e yo deja enprime plis pase 178 545 862 kopi.

13. Poukisa nou kapab di Bondye te fè lèzòm konn non l depi lè l te kreye yo?

¹³ Depi lè Bondye kreye lèzòm, li te fè yo konn non l. Adan ak Èv te konn non Bondye, e yo te konn fason pou yo byen pwononse l. Apre delij la, lè Kam te fin derespekte Noye, papa l, men sa Noye te di: “Lwanj pou [Jewova], Bondye Sèm lan. Se pou Kanaran [pitit Kam nan] tounen esklav Sèm.” ​(Jen. 4:1; 9:26). Men sa Bondye te di: “Mwen se Jewova. Sa se non mwen. E mwen pap bay pèsonn glwa mwen.” Bondye te di tou: ‘Se mwen menm ki Jewova a. Pa gen lòt! Se mwen menm sèl ki Bondye.’ ​(Iza. 42:8, NW; 45:5). Jewova te veye pou yo prezève non l nan Bib la e pou yo fè tout moun ki sou tè a konn non sa a. Se pa ti privilèj nou genyen pou nou sèvi ak non Jewova e pou n ap sèvi l antanke Temwen! Se kòmsi nou t ap di byen fò: “N ap leve bandwòl nou pou nou louwe non Bondye nou an.” — Sòm 20:5.

14. Apa de Bib la, ki lòt kote n ap jwenn non Bondye ankò?

¹⁴ Se pa nan Bib la sèlman nou jwenn non Bondye. Ann konsidere sa ki ekri sou Wòch Mowabit la, yon wòch yo te jwenn nan yon zòn ki rele Dibon, ki nan yon distans 21 kilomèt alès lanmè Sale. Sou wòch sa a, yo jwenn non Omri ki te wa ann Izrayèl, e yo rakonte tou rebelyon Mecha, yon wa nan peyi Mowab, te fè kont Izrayèl (1 Wa 16:28; 2 Wa 1:1; 3:4, 5). Sepandan, sa ki pi enteresan an, sèke yo jwenn non Bondye sou fòm Tetragram nan sou Wòch Mowabit la tou. Tetragram nan parèt plizyè fwa nan lèt Lakich yo tou, yon ban moso po kraze ki fèt an tè yo te jwenn ann Izrayèl.

15. Ki sa Septant lan ye, e ki jan li te fè parèt?

¹⁵ Premye tradiktè Labib yo te jwe yon wòl nan prezève non Bondye. Apre egzil nan peyi Babilòn nan, soti nan ane 607 pou rive nan ane 537 anvan epòk nou an, gen anpil Juif ki pa t retounen Jida ak Izrayèl. Nan twazyèm syèk anvan epòk nou an, gen anpil Juif ki t ap viv Aleksandri ak Ejip, e Juif sa yo te bezwen yo tradui liv ki te ekri ann ebre yo nan lang grèk pou yo, etandone nan epòk sa a lang grèk la te yon lang entènasyonal. Ozanviwon dezyèm syèk anvan epòk nou an, yo te fin ak tradiksyon sa a ki te vin pote non Septant. Gen kèk nan kopi nan tradiksyon sa a ki gen non Jewova ekri ladan l ann ebre.

16. Bay yon egzanp ki montre yo te sèvi ak non Bondye nan yon liv ki te pibliye pou premye fwa nan ane 1640.

¹⁶ Yo jwenn non Bondye tou nan premye liv yo te pibliye nan koloni anglè ki t ap viv ann Amerik yo (Bay Psalm Book). Orijinal liv sa a (yo te enprime l nan ane 1640) se yon tradiksyon liv Sòm nan apati lang ebre a, nan lang anglè epòk la. Yo itilize non Bondye nan kèk vèsè tankou Sòm 1:1, 2 kote yo di yon “moun ki beni” pa mache nan konsèy moun ki mechan an, men “li pran plezi l nan lwa Iehovah”. Pou nou jwenn plis enfòmasyon sou non Bondye, gade bwochi Le nom divin qui demeure à jamais a.

17, 18. a) Ki jan w t ap defini mo “verite” a? b) Ki sa nou jwenn nan “verite ki nan bon nouvèl la”?

¹⁷ Nou jwenn lajwa dèske n ap sèvi “Jewova, Bondye verite a”. (Sòm 31:5, NW.) Gen yon diksyonè ki di: “Laverite sou yon bagay, se tout enfòmasyon ki kòrèk sou bagay sa a. Se pa bagay moun imajine oswa envante.” ​(Collins Cobuild English Dictionary). Nan Bib la, mo ebre lè yo tradui l yo mete “verite” souvan pou li a, gen sans yon bagay ki vrè, yon bagay moun ka fè konfyans, ki fidèl oswa ki reyèl. Nan lang grèk la, mo yo tradui pou “verite” a vle di yon bagay ki konfòm ak reyalite a oubyen yon bagay ki kòrèk e ki dwat.

¹⁸ Jewova te prezève verite espirityèl la e li fè nou gen konesans sou verite sa a ann abondans (2 Jan 1, 2). Konpreyansyon nou gen sou laverite ap vin pi klè chak jou paske Bib la fè konnen: “Chemen moun ki jis yo tankou yon limyè k ap briye kote ekla a ap ogmante jiskaske jou a tabli byen djanm.” ​(Pwo. 4:18, NW). Natirèlman, nou dakò nèt ak pawòl sa yo Jezi te di nan yon priyè li te fè bay Bondye: “Pawòl ou se laverite.” ​(Jan 17:17). Pawòl Bondye te fè ekri a gen ladan l “verite ki nan bon nouvèl la”, yon seri verite tout ansèyman vrè kretyen yo baze sou li (Gal. 2:14). Pami verite sa yo, nou jwenn prèv konsènan non Jewova, souvrènte li, sakrifis ranson Jezi a, rezirèksyon an ak Wayòm nan. Kounye a, ann egzamine fason Bondye te prezève verite espirityèl la malgre efò Satan fè pou kache verite sa a.

19, 20. Kiyès Nimwòd te ye, e ki pwojè ki te echwe nan epòk li a?

¹⁹ Apre delij la, te vin gen yon pwovèb ki di: “Tankou Nimwòd yon chasè pisan ki opoze ak Jewova.” ​(Jen. 10:9, NW). Antanke yon moun ki opoze ak Jewova, Nimwòd, an reyalite, t ap adore Satan e li te menm jan ak opozan sa yo Jezi te di: “Nou menm, nou soti nan papa nou, Dyab la, e nou vle fè volonte l. Li [...] pa t kenbe fèm nan laverite.” — Jan 8:44.

²⁰ Tèritwa Nimwòd t ap dirije sou li a, te gen ladan l Babèl ansanm ak lòt vil ki ant rivyè Tig la ak rivyè Efrat la (Jen. 10:10). Li posib pou se li menm ki te bay lòd pou yo bati Tou Babèl la, e konstriksyon sa a te kòmanse ozanviwon ane 2 269 anvan epòk nou an. Kontrèman ak volonte Jewova ki vle pou tè a ranpli ak moun, moun ki t ap konstwi Tou Babèl la t ap di: “Annou wè! Ann bati yon gwo lavil pou nou rete ak yon gwo gwo kay tou won byen wo ki rive jouk nan syèl la. Konsa tout moun va respekte nou, yo p’ap ka gaye nou toupatou sou latè.” Sepandan, pwojè sa a t apral kraze lè Bondye te “mele lang tout moun ki rete sou latè” a, e li te gaye moun sa yo toupatou sou tè a (Jen. 11:1-4, 8, 9). Si se konsa Satan te prevwa fonde yon sèl relijyon nan objektif pou fè tout moun adore l, ebyen, li te echwe totalman nan konplo sa a! Pandan tout istwa lèzòm, adorasyon Jewova a te toujou ranpòte laviktwa, e chak jou ki pase gen plis moun toujou k ap vin adore Jewova.

21, 22. a) Sa k fè nou ka di fo relijyon an pa janm reprezante yon gwo menas pou vrè adorasyon an? b) Ki sa nou pral egzamine nan atik ki vin apre a?

²¹ Sa poko janm rive pou fo relijyon an reprezante yon gwo menas pou vrè adorasyon an. Sa k fè n di sa? Se paske Gran Pwofesè nou an prezève Pawòl li te fè ekri a, li fè moun konn non l, e li montre li se Sous tout verite espirityèl ki genyen (Iza. 30:20, 21). Lè nou adore Bondye ak laverite sa ban nou lajwa, men, pou sa posib, nou bezwen rete vijilan nan domèn espirityèl, nou dwe fè Jewova yon konfyans total e nou dwe suiv direksyon li ban nou pa mwayen lespri sen.

²² Nan atik ki vin apre a, nou pral pale sou orijin kèk fo doktrin. Nou pral wè tou, fo doktrin sa yo pa kanpe sou anyen lè nou egzamine yo parapò ak sa Bib la di. Anplis de sa, nou pral wè fason Jewova, Sila a ki prezève verite a, beni nou lè l ban nou bonjan verite, verite ki fè pati eritaj espirityèl nou renmen anpil la.