LESON 26
Poukisa gen bagay mal ki rive e poukisa moun ap soufri?
Lè gen bagay mal ki rive li nòmal pou yon moun mande: “Poukisa bagay sa yo rive?” Se pa ti kontan nou kontan konnen Bib la bay repons byen klè pou kesyon sa a.
1. Ki jan Satan te fè sa k mal antre nan monn nan?
Satan Ledyab te fè rebèl ak Bondye. Satan te vle dirije lòt moun, se sa k fè li te fè Adan avèk Èv, de premye moun yo, fè rebèl ak Bondye tou. Satan te fè sa lè te bay Èv yon manti (Jenèz 3:1-5). Li te fè l panse Jewova pa vle l jwenn bon bagay. Li te fè konprann lèzòm t ap pi kontan si yo pa obeyi Bondye. Satan te bay premye manti a lè l te fè Èv konnen li pap mouri. Se sa k fè Bib la di Satan se “yon mantè e li se papa manti”. — Jan 8:44.
2. Ki sa Adan ak Èv te chwazi fè?
Jewova te bay Adan ak Èv yon pakèt bon bagay. Li te di yo yo te ka manje fwi tout pyebwa ki gen nan jaden Edenn nan, sof nan youn nan pyebwa yo (Jenèz 2:15-17). Men, yo te deside manje fwi ki sot nan pyebwa sa a kanmenm. Èv “te [...] pran fwi pyebwa a e li te manje l”. Annapre, Adan te “manje l” tou (Jenèz 3:6). Yo toule de te dezobeyi Bondye. Kòm Adan ak Èv te pafè, se te nòmal pou yo fè sa ki byen. Se sa k fè, lefètke yo te chwazi dezobeyi Bondye, yo te peche e yo te montre yo pa t aksepte pou se li ki pou dirije yo, sa yo te chwazi fè a te lakòz yo soufri anpil. — Jenèz 3:16-19.
3. Ki efè sa Adan ak Èv te chwazi fè a gen sou nou?
Lè Adan ak Èv te peche a, yo te vin enpafè, e sa te lakòz tout pitit yo t apral genyen yo vin enpafè tou. Men sa Bib la di konsènan Adan: “Akoz yon sèl moun peche antre nan monn nan, e akoz peche lanmò antre, e konsa lanmò blayi sou tout moun.” — Women 5:12.
Gen plizyè rezon ki lakòz n ap soufri. Pafwa nou soufri akoz move desizyon nou pran, pafwa nou soufri paske lòt moun pran move desizyon. Pafwa tou nou soufri paske nou yon move kote nan yon move moman. — Li Eklezyas 9:11.
FOUYE PLIS
Gade poukisa se pa Bondye ki responsab soufrans ak bagay mal k ap rive jodi a nan monn nan e gade fason li santi l lè l wè n ap soufri.
4. Kiyès ki lakòz n ap soufri?
Anpil moun panse Bondye ap dirije lemonnantye. Èske se vre? Gade VIDEYO a.
Li Jak 1:13 ak 1 Jan 5:19, epi reponn kesyon sa a:
Èske se Bondye ki lakòz moun ap soufri e ki lakòz gen bagay mal ki rive?
5. Ki sa k rive depi lè Satan ap dirije a?
Li Jenèz 3:1-6, epi reponn kesyon sa yo:
Ki manti Satan te bay? — Gade vèsè 4 ak 5.
Ki jan Satan te fè konprann Jewova pa vle lèzòm jwenn bon bagay?
Ki jan Satan fè konprann lèzòm pa bezwen Jewova dirije yo pou yo gen kè kontan?
Li Eklezyas 8:9, epi reponn kesyon sa a:
Ki sa k rive depi lè se pa Jewova k ap dirije monn sa a?
Adan ak Èv te pafè e yo t ap viv nan paradi a. Men, yo te koute Satan e yo te fè rebèl ak Jewova.
Apre yo te fin fè rebèl la, monn nan te vin chaje ak peche ak soufrans e ak lanmò.
Jewova pral elimine peche, soufrans ak lanmò. Lèzòm pral retounen vin pafè e yo pral viv nan Paradi a.
6. Sa fè Jewova mal lè l wè n ap soufri
Dapre ou menm, èske lè n ap soufri sa pa di Bondye anyen? Gade ki sa wa David ak apot Pyè te ekri. Li Sòm 31:7 ak 1 Pyè 5:7, epi reponn kesyon sa a:
Ki jan w santi w lè w konnen Jewova wè soufrans nou yo e sa fè l mal?
7. Bondye pral elimine tout soufrans lèzòm yo
Li Ezayi 65:17 ak Revelasyon 21:3, 4, epi reponn kesyon sa a:
Poukisa li ankourajan pou n konnen Jewova pral elimine tout konsekans bagay mal yo gen sou lèzòm?
Èske w te konnen?
Lè Satan te bay premye manti a, li te lage vèni sou Jewova. Sa vle di li te sal repitasyon Jewova lè l te fè moun panse move bagay sou Jewova, kòmkwa li se yon chèf ki pa gen jistis e ki pa gen lanmou. Lè Jewova pral retire soufrans talè konsa li pral lave non l. Sa vle di li pral fè tout moun konnen se fason li dirije a ki pi bon. Lave Jewova gen pou l lave non l lan se bagay ki pi enpòtan ki gen nan linivè. — Matye 6:9, 10.
GEN MOUN KI DI: “Se Bondye ki te vle nou soufri.”
Ki sa w t ap di?
SA W TE APRANN
Se Satan Ledyab ak de premye moun yo ki premye responsab bagay mal k ap fèt nan monn nan. Lè n ap soufri, sa fè Jewova mal. Talè konsa, li pral retire soufrans nou yo.
Revizyon
Ki manti Satan Ledyab te bay Èv?
Lefètke Adan ak Èv te fè rebèl ak Bondye, ki efè sa gen sou nou tout?
Ki jan nou fè konnen sa fè Jewova mal lè l wè n ap soufri?
APRANN PLIS
Aprann plis sou sa Bib la di peche ye.
Aprann plis sou sa Satan Ledyab te di sou Bondye nan jaden Edenn nan.
Gade bonjan repons nou genyen pou yon kesyon difisil.
“Pou ki rezon Olokos la te rive? Sa k fè Bondye pa t anpeche sa fèt?” (Atik sou Entènèt)
Gade sa yon mesye te aprann konsènan soufrans li wè ki genyen.